بارەكەلدى، بالاپانوۆ!

0 126

جۋىردا رەسەيدىڭ ۋفا قالاسىندا وتكەن «ۋرال موڭو-2012» تۇركى جاستارى فەستيۆالىنىڭ باس جۇلدەسىن استانالىق جاس ءانشى نۇربول بالاپانوۆ قانجىعاسىنا بايلاپ قايتتى.

باشقورتستاندا ەكى جىلدا ءبىر وتەتىن تۇركى جاستارىنىڭ مۋزىكالىق «ۋرال موڭو» فەستيۆالىن ءانشى قاۋىم جاقسى بىلەدى. بۇل فەستيۆالدىڭ ماقساتى – تۇركى جۇرتىنىڭ ءداستۇرلى اندەرى مەن ۇلتتىق بەت-بەينەسىن ايشىقتايتىن سالتتارىن ساحنادا كورسەتە ءبىلۋ. قازىرگى تاڭدا فەستيۆال «تۇركسوي» حالىقارالىق ۇيىمى مەن باشقورتستاننىڭ مادەنيەت مينيسترلىگىنىڭ قولداۋىمەن جۇزەگە اسىپ وتىر. 1995 جىلى فەستيۆال حالىقارالىق مارتەبەگە يە بولعان ەدى. سودان بەرى ۋفادا كۇللى تۇركى جاستارى باس قوسىپ، ونەر بايگەسىندە باق سىناسىپ كەلەدى. بيىل العاش رەت باس جۇلدە قازاقتىڭ دارىندى ءانشىسى نۇربول بالاپانوۆقا بۇيىردى.

جاس ءانشىنىڭ ەسىمى قالىڭ كوپشىلىككە ەتەنە تانىس بولماسا دا، ءبىرشاما بەلگىلى.ويتكەنى، ول جاستىعىنا قاراماستان استانا قالاسى اكىمدىگى مەملەكەتتىك فيلارمونياسىنىڭ كلاسسيكالىق جانە ەسترادالىق ۆوكال ءبولىمىنىڭ ءانشىسى. ال، بۇل ۇجىم ونەر الەمىنە قادام باسقالى بەل-بەلەستەردى باعىندىرۋمەن ورگە ءجۇزىپ كەلەدى. سوڭعى كەزدە نۇربول بالاپانوۆتىڭ ونەردەگى العاشقى قادامدارى سونىڭ جارقىن دالەلى رەتىندە باعالانىپ  ءجۇر. ونىڭ تىنىمسىز ەڭبەگى، ونەردەگى ىزدەنىسى، جاڭا رەپەرتۋار تاڭداۋداعى تالعامپازدىعى، بايقاۋلار مەن فەستيۆالدەرگە قاتىسۋعا ءاردايىم دايارلىعى – مۇنىڭ بارلىعى ونىڭ ونەردەگى ىزگى تابىستارى. وسى تابىستارى تالانتتى جاستىڭ ماقساتشىل مۇددەمەن اسقاق اسۋلاردى بەتكە العاندىعىن ناقتى كورسەتسە كەرەك.

نۇربول بالاپانوۆ – سەمەي ءوڭىرىنىڭ تۋماسى. بىراق قازىرگى كەزدە استاناداعى قازاق ۇلتتىق ونەر ۋنيۆەرسيتەتىنىڭ ستۋدەنتى. ول ستۋدەنتپىن دەپ ءوزىنىڭ انشىلىك قابىلەتىن شەكتەپ، ياكي داعدارىپ قالمادى. بىلىم الۋمەن قاتار ونەردەگى ىزدەنىسىن دە جوسپارلى تۇردە جۇزەگە اسىرىپ ءجۇر. قايتا ءوزىنىڭ وسىنداي ىزدەنگىش تالپىنىسىمەن از ۋاقىت ىشىندە ءبىراز جەتىستىكتەرگە قول جەتكىزىپ ۇلگەرگەن تالاپتى جاس. سان بايقاۋعا قاتىسىپ، ەرەكشە داۋىسىمەن كوزگە ءتۇسىپ، كورەرمەن سۇيىسپەنشىلىگىنە بولەنۋ – ەرەكشە قۇبىلىس. اربىر ءانشى ءۇشىن ساحنانىڭ زور شابىت سىيلايتىن سيقىرلى قۋاتى جانە بار. بايقاۋلارعا قاتىسۋ –نۇربول ءۇشىن ەڭ الدىمەن كاسىبي دەڭگەيىن كوتەرىپ، بىلىكتىلىگىن ارتتىرۋعا تاپتىرماس ستيمۋل. مۇنداي مۇمكىندىك كونكۋرسانتتار اراسىندا ءبىر-ءبىرىنىڭ ءان سالۋ وزگەشەلىگىن زەردەلەۋگە جول اشادى. ويتكەنى، ءار بايقاۋدىڭ وزىندىك قولتاڭباسى بولادى. ءار بايقاۋ انشىلەرگە ءتۇرلى يمپۋلس، ەموتسيونالدى ءدۇمپۋ بەرىپ وتىرادى. مەيلىنشە سەزىمتال كەلەتىن ءانشىنىڭ جان راحاتىن تىڭدارمانمەن بولىسۋىنە دە سەپتىگىن تيگىزەدى.

ول 2011 جىلدى دا تابىستى ەتىپ وتكىزدى. «جاس قانات – 2011» جاس ورىنداۋشىلار بايقاۋىندا ءى ورىندى جەڭىپ العانىن ەلوردالىق جۇرتشىلىق جادىنان شىعارا قويماعان بولار. ۋكرايناداعى «مولودا گاليچينا – 2011» حالىقارالىق جاس ورىنداۋشىلار بايقاۋىندا ءى ورىن، «كريشتالەۆي گرونا – 2011» حالىقارالىق بايقاۋىندا ءى ورىن، «جۇلدىز-2011» (قاراعاندى) رەسپۋبليكالىق ەسترادالىق ورىنداۋشىلار كونكۋرسىندا ءىى ورىن يەگەرى اتانعان. ونىڭ ۇستىنە 2011 جىلدىڭ قورىتىندىلارى بويىنشا، فيلارمونيانىڭ «ۇزدىك ەسترادالىق ءانشىسى» بولىپ تانىلدى. حاكاسيادا وتكەن «وت ىرى – 2011» حالىقارالىق ەتنيكالىق ەسترادا بايقاۋىنىڭ باس جۇلدەسىنىڭ يەگەرىاتاندى. سول بايقاۋدا ونى كورەرمەن وتە تاماشا قابىلدادى. «نۇربول ساحناعا شىققان سايىن جۇرتشىلىق قايتا-قايتا شاپالاقتاپ، ونىڭ اندەرىنە ءتانتى بولدى. بايقاۋ تاريحىندا مۇنداي بولىپ كورگەن ەمەس. گالا-كونتسەرتتە دە نۇربولدى جۇرت ساحنادان جىبەرگىسى كەلمەي، بيسكە ءان ورىنداتتى»، – دەپ جازادى حاكاسيالىق جۋرناليست ۆەرا سامرينا.

شىنار ءابىلدا

پىكىر جازۋ

پوچتاڭىز جاريالانبايدى

1 × 3 =