Бақытжан МАЛЫБАЕВ, Астана қаласы ІІД Жол полициясы­ басқармасы бастығының орынбасары: ЕКІ МЫҢҒА ЖУЫҚ ЖАҢА НӨМІР БЕРІЛДІ

– Бақытжан Әсембекұлы, қол­да­ныс­тағы көлік нөмірлерін ауыс­­тыру қандай қажеттіліктен туын­­дады?

– Бәрімізге белгілі, қолданыстағы кө­лік нөмірлері 1994 жылы ен­гі­зілген болатын. Жаңа белгілер уа­қыт талабына әрі халықаралық стан­дартқа сай болу мақсатында қол­ға алынды. Біріккен Ұлттар Ұйы­мының жол қозғалысы туралы келі­сіміне қол қойған біздің ел де мем­лекеттік нөмір белгісінің жаңа үлгі­сін таңбалауға кірісті.

– Көліктің қай аймаққа тиесілі еке­нін осы уақытқа дейін әріп ар­­қылы біліп келдік. Ал жаңа нө­мірдің ерекшелігі қандай?

– Рас, көліктер әрпіне қарай ажы­ра­тылып келді. Енді «темір тұл­пардың» қай аймақта тіркелгенін сандық ерекшеліктерге қарай танитын боламыз. Мәселен, Астана қаласының автокөліктері 01 бел­гісін тақса, Алматы – 02, Ақмола об­лысы – 03 және соңғысы 16 Шы­ғыс Қазақстан облысында тір­кел­ген көліктерге тиесілі. Бұдан бө­лек, мемлекеттік нөмірде ел ныша­ны – Ту таңбаланған. Нөмірдің тө­менгі жағындағы «KZ» жазуы бар. Яғни, шетелге шықсаңыз, қазақ­стандық көлік екенін тану мүмкіндігін береді. Халықаралық талап үдесіне сай болғандықтан, бұдан былай елден тысқары қатынау аса қиынға соқпайды. Бүгінде мұндай нөмірлер әлемнің 80-нен астам елінде мақұлданған.

– Астаналықтар жаңа нөмірді қа­лай алады? Бағасы қанша тұ­рады?

– Жаңа нөмірді иелену үшін Жол полициясы басқармасына жолығу қажет. Мемлекеттік баж салығын тө­ле­сеңіз, ескі нөмірді жаңаға ауыс­тыру қиын емес. Оны тіркеу жұ­мыстары көп уақыт алмайды. Сондай-ақ, бұрынғы белгілер де қол­данысқа жарамды. Тек Президент аппараты мен үкіметтік көліктер жаңа үлгідегі нөмірді мін­детті түрде тағатын болады. Ал ба­ғасына келсек, еш өзгерген жоқ. Яғни, 4847 теңге.

– Елорда көшелерінде жаңа нө­мірді иеленген қанша көлікті кез­дестіруге болады?

– Өткен жылдың 26 жел­тоқ­са­нынан бастап астаналық көлік иелеріне 2000-ға жуық жаңа нөмір берілді.