بالام باۋىرمال بولسىن دەسەڭىز…

0 194

22mechta

ەمىزۋلى بالام بار. قازىر ءبىر جاستان ەكى اي استى. ومىراۋدان شىعارۋدى ويلاپ ءجۇر ەدىم. بىراق جاقىندا ءبىر قۇربىم ءدىنىمىز بويىنشا بالانى ەكى جاسقا دەيىن ەمىزۋ كەرەك، ويتكەنى ول بالانىڭ اقىسى ەكەنىن ايتتى. سوندا ەكى جاستان بۇرىن ەمىزۋدى توقتاتسام كۇنا بولادى ما؟

اقمارال

وقىرمان ساۋالىنا ءدىنتانۋشى، Ph.D دوكتورى الاۋ ادىلباەۆ جاۋاپ بەرەدى:

– ءسابيدىڭ دۇرىس ءوسىپ-جەتىلۋى ءۇشىن انا ءسۇتى وتە ماڭىزدى. ەشقانداي جاساندى ءسۇت انا ءسۇتىن الماستىرا المايدى. انا سۇتىمەن قورەكتەندىرۋدىڭ ماڭىزدىلىعى قازىرگى تاڭدا جان-جاقتى دالەل­دەنگەن. سونداي-اق بالا­نىڭ انا سۇتىمەن ەكى جاسقا دەيىن قورەكتەنۋىنىڭ پايدالى ەكەندىگى مەديتسينادا دا ايتىلادى. ال وسى ماسەلە قۇراندا 14 عاسىر بۇرىن ايتىلعان. باقارا سۇرەسىنىڭ 233-اياتىندا: «انالار سابيلەرىن تولىق ەكى جىل ەمىزەدى. (بۇل ۇكىم) ەمىزۋدى كەم­شىلىكسىز اتقارماق بول­عاندار ءۇشىن..»، – دەگەن. ماڭىزدىلىعىنا بايلانىستى بۇل ماسەلە يسلام قۇقىعىندا دا جان-جاقتى قاراستىرىلعان. سەبەبى، ادام بالاسىنىڭ ءومىرى ءۇشىن قورەكتەنۋ وتە ماڭىزدى فاكتور بولىپ تابىلادى. ال وزدىگىنەن ءىشىپ-جەۋگە شاماسى كەل­مەيتىن نارەستەنىڭ ەڭ نەگىزگى قورەگى – انا ءسۇتى. سوندىقتان جاڭا تۋعان ءسابي قورەكسىز قال­ماۋى ءۇشىن بۇل ماسەلە يسلام­داعى بالا قۇقىعى اياسىندا قاراستىرىلىپ، اتا-اناعا مىندەت رەتىندە جۇكتەلگەن. الايدا، يسلام قۇقىعىندا انانىڭ كەلەسى بالاعا اياعى اۋىر بولۋى، دەنساۋلىعى كوتەرمەۋى، ءدارى-دارمەك قابىلداۋى، ءسۇتىنىڭ قۇنارسىزدانۋى ت.ب. سەكىلدى بەلگىلى ءبىر سەبەپتەرگە بايلانىستى بالا باسقا تاعامدارمەن دە قورەكتەنە الاتىن جاعدايعا جەتسە، وندا اتا-انا اقىلداسا وتىرىپ، بالانى ەكى جاسقا تولماسا دا ومىراۋدان شىعارىنا رۇقسات ەتىلگەن. سەبەبى، جوعارىداعى اياتتا بالانى ەمىزۋ بۇيرىق رەتىندە ايتىلماعان. ءارى اياتتىڭ جالعاسىندا: «ەگەر اتا-انا ءوزارا كەلىسىپ، كەڭەسۋ ارقىلى بالانى ەمىزۋدى توقتاتپاق بولسا، كۇنا جاساعان بولمايدى»، – دەپ جەڭىلدىكتى دە قاراستىرعان. ارينە، ەگەر ءسۇتىڭىز قۇ­نارلى، دەنساۋلىعىڭىز جاقسى بولسا، بالانىڭ بولاشاقتا باۋىرمال، مە­يىرىمدى بولىپ ءوسۋى ءۇشىن ەمىزۋدى تولىقتىرعانىڭىز ابزال. بىراق مىندەت ەمەس ەكەنىن دە ايتا كەتۋىمىز قاجەت.

 

پىكىر جازۋ

پوچتاڭىز جاريالانبايدى

eighteen + four =