«ايالاعان استانا» تالانتتارعا جول اشادى

0 120

N1W7xYTsU23FSSosp3igCZce5YWAnD

استانا كۇنى قارساڭىندا قازاقستان تۇرعىندارى «ايالاعان استانا» مۋزىكالىق بالالار بايقاۋىنىڭ قورىتىندىسىن تاماشالايدى.

فينال «بالالىق شاق ءانۇرانى» (4 شىلدە), «جۇلدىزدارمەن دۋەت جانە الەمدىك حيت» (5 شىلدە), «اتامەكەن» (6 شىلدە) دەگەن تاقىرىپتارمەن ءۇش كۇنگە سوزىلادى. وسى كۇندەر قورىتىندىسىنا سايكەس، حالىقارالىق قازىلار القاسى مەن تەلەكورەرمەندەر «بالالار جاڭا تولقىنىندا» قازاقستان نامىسىن قورعاۋعا مۇمكىندىك الاتىن گران-پري يەگەرىن انىقتاماق. سونىمەن قاتار، جۇلدەلى ورىندار، كورەرمەن كوزايىمى مەن 1 ميلليون تەڭگە كولەمىندە ارناۋلى قارجىلاي سىيلىقتار قاراستىرىلعان.

«ايالاعان استانا» جوباسىنىڭ ناۋرىز-ءساۋىر ايلارىندا وتكىزىلگەن ىرىكتەۋ كەزەڭىنە الماتى، تالدىقورعان، تاراز، شىمكەنت، قىزىلوردا، قوستاناي، ورال، اتىراۋ، اقتاۋ، اقتوبە، قاراعاندى، پاۆلودار، سەمەي، كوكشەتاۋ، پەتروپاۆل، استانا سياقتى 16 قالاسىنان 8-12 جاسار مىڭ ونەرلى ورەن قاتىستى. مامىر ايىنىڭ ورتا شەنىندە ساراپشىلار بيىلعى ونەر دوداسىندا فينالعا شىققان ەڭ تالانتتى 17 بالانىڭ ەسىمىن اتادى. ولار – لۋيزا نۇرقۋاتوۆا (اقتاۋ), زاميرا ساعاديەۆا (زەرەندى), دانيا يشانقۇلوۆا (ورال), ساعىنعان قۋانعان، جاحان قابىكەن، مۇحاممەدالي جۇگىنىسوۆ (استانا), ديلناز تولەگەن، دياس ومار (قىزىلوردا), ناستيا پەرشيكوۆا، ماليكا سماعۇلوۆا (پاۆلودار), ديلنۋرا ءبىرجانوۆا (قاراعاندى), عاليمۇرات ءابدىماناپوۆ (جەزكازعان), جانايكەرىم وتەگەنوۆ (قوستاناي), الديار ورەكەن (ەكىباستۇز), ادىلەت مەيرامبەكوۆ (كوكشەتاۋ), ياسمين ماجيتوۆا، الۋا بەرەشەۆا (الماتى).

1 مامىر – حالىقارالىق بالالاردى قورعاۋ كۇنى استانادا «ايالاعان استانا» ۇلتتىق مۋزىكالىق تەلەۆيزيالىق بالالار بايقاۋىنىڭ فيناليستەرىنەن قۇرالعان مۋزىكا مەكتەبى اشىلدى. مەرەكە كۇنى ءبىر-بىرىمەن العاش جۇزدەسكەن بالالار لينا اريفۋللينانىڭ شەبەرحاناسىنداعى ماسكەۋلىك تاجىريبەلى ۇستازدارمەن تانىستى. فيناليستەر ماۋسىم ايى بويى استانالىق مۋزىكا مەكتەبىندە ۆوكالدىق قابىلەتتەرىن شىڭداپ، رۋسلان بۇتاباەۆتىڭ جەتەكشىلىگىندەگى «Zaratushtra Band» جاندى وركەسترىنىڭ سۇيەمەلدەۋىمەن وتەتىن تەلەۆيزيالىق شوۋعا دايىندالادى. فينالدا 12 كونتسەرتتىك ءنومىر قويىلادى. قاتىسۋشىلاردىڭ ءبىر بولىگى جەكەلەي ءان ورىنداسا، ءبىر بولىگى دۋەت پەن تريودا ونەر كورسەتەدى.

اسحات رايقۇل

پىكىر جازۋ

پوچتاڭىز جاريالانبايدى

2 × five =