Ауыл әкімдерінің аппараты кеңейеді

0 71

Ғабидолла ӘБДІРАХЫМОВ, ҚР Президенті Әкімшілігі басшысының орынбасары:

Кеше ҚР Президенті жанындағы Мемлекеттік басқару академиясында «Қазақстан-2050 стратегиясы» ережелеріне сәйкес, озық басқару шешімдерін қабылдау және әкімшілік реформаларды жүзеге асыру мәселелері жөнінде семинар өтті. Семинарға Ұлыбританияның Біріккен Корольдігі Премьер-министрі кеңсесінің бұрынғы жетекшісі Джонатан Пауэл қатысып, мемлекеттік қызметкерлерге дәріс оқыды. Семинарға төрағалық еткен ҚР Президент Әкімшілігі басшысының орынбасары Ғабидолла Әбдірахымов БАҚ өкілдерінің сұрағына жауап берді.

– Елбасының тапсырмасына сәй­­кес, биылғы жылы бірқатар әкім­шілік реформа жүзеге асырылады. Бұл жұмыс 2 бағытта жүргізіледі. Бірінші бағыт – мемлекеттік қызмет саласын одан ары жетілдіру. 26 нау­рыздан бастап ҚР «Мемлекеттік қыз­мет туралы» заңына енгізілген өз­гер­тулер мен толықтырулар күші­не енуіне байланысты бізде мемле­кет­тік қызметтің жаңа моделі жұмыс істей бастайды. Яғни, мемлекеттік қызмет жаңа жүйеге көшеді. Екінші бағытта өзін-өзі басқару саласында маңызды қадамдар жасалады.

– Бұдан басқа, қандай шараларды жүзеге асыру жоспарланып отыр?

– Мемлекеттік қызметкерлердің құқығы жағынан бірқатар өзгеріс­тер болады. Өздеріңіз білетіндей, қазір бізде екі корпус – саяси және әкім­шілік қызмет­керлер бар. Енді саяси қызметкерлер бірін­ші корпус болады. Ал А корпу­сы – бас­қарушы әкімшілік қызметкер­лер және Б корпусы – атқарушы әкімшілік қызметкерлер. Біздің жүйеге жаңа­дан енгені – А корпусы.
А корпусына министрліктердегі қазіргі жұмыс жасап жатқан жауапты хатшылар, комитет төрағалары, ал жергілікті басқару органдарынан аудан әкімдері кіретін болады. Барлығы А корпусына 400 лауазымды адам кіреді.

– А корпусына кіретін мемлекет­тік қызметкерлер қалай іріктеледі?

– Олардың мәселесін Ұлттық кадр комиссиясы қарайды. А кор­пу­сына кіретін лауазымды қыз­мет­кер­лерге арналған тест бағдар­ла­масын Мемлекеттік қыз­мет істері агенттігі дайындап жатыр. Олар тест тапсырғаннан кейін Ұлт­тық кадр ко­мис­сиясында әңгі­ме­лесуден өтеді. Осы­дан кейін әрбір үміткер­дің қан­дай лауазымды қыз­метке баратындығы шешіледі.

– Өзін-өзі басқару саласы туралы айтып берсеңіз…

– Бұл салада да бірқатар жаңалық­тар бар. Біріншіден, орталық орган­­дардың бірнеше өкілеттері жер­­гі­лікті органдарға беріледі. Яғ­ни, 5 мыңға жуық штаттық бір­лік министр­лік­терден алынып, ауыл ап­па­рат­тарын құру үшін берілетін болады. Қазір әрбір ауылда әкім жұмыс істеп жатыр. Бірақ олардың жеткілікті аппараттары жоқ. Сон­дықтан, ауыл әкімдерінің аппараты кеңейеді.

Айнұр САНАБЕК

Пікір жазу

Почтаңыз жарияланбайды

2 × five =