اتتىڭ جەمىن جەپ ءجۇرمىز-اۋ

0 139

f2a5c6816fd7f97da6a6b56a96dd44f6_big

ەرتەڭگىلىك جۇمىسقا كەلەردە يتەرىسىپ، جارماسىپ اۆتوبۋسقا مىنەمىز. ەكى-ءۇش ايالداما وتكەنشە جەڭ جىرتىلىپ، جاعا قيسايعانىنا قاراماي، ءبىر عانا ماقساتتى ويلايسىڭ. ەسىكتەن قۇلاپ قالماۋىڭ كەرەك. سول ەسىگى قۇرعىر جابىلعانشا، سوسىن اشىلعان كەزدە جازاتايىم جاعدايدا ۇشىراپ قالماسام دەيسىڭ. شاماسى بەسىنشى ايالداماعا جەتكەنشە جانىڭ شىداسا بولدى. وندا اۆتوبۋستاعىلاردىڭ شامامەن جارتىسى تۇسەدى. اناۋ-مىناۋ ەمەس، «مينيسترلىكتەر ءۇيى» اتالاتىن جەر. الا تاڭ اتقان سوڭ جۇمىسقا قوعامدىق كولىكپەن جەتەتىن جۇرتتىڭ كوپشىلىگى وسى الىپ اتتىڭ تاعاسى سياقتى دوعالانا سالىنعان ايدىك عيماراتتىڭ ىشىندەگى قاراپايىم قىزمەتكەرلەر شىعار دەپ توپشىلايسىڭ. ودان ءارى ءۇش ايالدامادا ماناعى قيسايعان جاعانى تۇزەپ، شىققان ەستى قايتا كىرگىزىپ، ادام ساناتىنا ەنەسىڭ. ەرتەڭگىلىكتەگى قوعامدىق كولىكتىڭ كوز ۇيرەنگەن كورىنىسى – وسى.

كەشكىلىك جۇمىستان جاي شىعامىز. مۇندا باسقاشا جاعداي. اۆتوبۋستا ادام از بولادى. بىراق، ودان دا تاڭ­عى اۆتوبۋستاعىداي ءيىن تىرەسىپ تۇر­عانى جاقسى ما دەپ ويلايمىز. تاڭعى اۆتوبۋسقا كىرۋ قيىن بولسا، مۇندا ەڭ قيىنى كىرگەن سوڭ. اناۋ دا، مىناۋ دا ورىن بەرەدى. تانىپ جاتقاندارى شامالى. جاسى ۇلكەن دەپ سىيلاعاندارى شىعار. سوندا ءوزىڭنىڭ ەلۋدى ەڭسەرگەنىڭدى سەزەسىڭ.

كۇندەلىكتى ءبىر باعىتتاعى اۆتو­بۋس­تار­عا مىنگەندىكتەن شوفەرلەرى بولماسا دا كوندۋكتورلارى كوز تانىس. ءبارىنىڭ كيىمدەرى ۇقساس بولعانمەن، مىنەزدەرى ارقيلى. ادەتتەرىن دە بىلەمىز. بىرەۋى اندا-مىندا بيلەت بەرمەيدى. اۆتوبۋسقا كىرگىزگەنىنە ريزا بولىپ تۇرا بەرەسىڭ. ەندى بىرەۋى كەيدە تۇسەر كەزدە بيلەتىڭدى قايتا الىپ قالادى. جەتكىزگەندەرىنە ري­زا­سىڭ. ءبىر ايەل كوندۋكتور وتە ءتارتىپتى. ايالدامانىڭ اتىن ايقايلاپ ايتىپ تۇرا­تىن تاعى بىرەۋى بار. نەگىزى ايال­دا­مالاردىڭ اتى اۆتوبۋس ىشىندە راديو جازبا ارقىلى اۆتوماتتى ءتۇر­دە حا­بار­لانادى. ءارى قازاقشا. اينالىپ تۇرا­تىن راديوجازبا «كەلەسى ايال­داما بەيبىتشىلىك پەن كەلىسىم سارايى» دەسە، مىناۋ قوسامجارلانا «پي­را­ميدا» دەپ جار سالادى. رەسمي حابار­لاما «كەلەسى ايالداما ۇلتتىق اكا­دە­ميالىق كىتاپحانا» دەسە، مىناۋ «كەرۋەن» دەيدى. جۇرگىنشىلەرگە سوڭعى، ەكىنشى نۇسقاسى تۇسىنىكتى. الگى كوپ­شى­لىك­تىڭ اسفالتتالعان تروتۋاردان گورى توتە سوقپاقتى ۇناتاتىنى سياقتى.

حوش، سول باياعى اۆتوبۋستامىز. الاقانداعى 60 تەڭگەمىزدى العان كوندۋكتور بيلەتىن بەردى. ستۋدەنت كەزدەن جانە ءبىر ادەتىمىز: بيلەتتىڭ نومىرىنە قارايمىز. ەكى جاعىنداعى ساندارى تەڭ بولسا «باقىتتى بيلەت» سانالادى. ول كەزدەگى الماتىداعى بيلەتتەر التى ساندى بولاتىن. ەندى استانادا بەس ساندى ەكەن. ورتاداعىسىن بەيتاراپ قالدىرامىز دا، انا جاقتاعى ەكى سان مەن مىنا جاقتاعى ەكى ساننىڭ قوسىندىلارىن تەڭدەستىرىپ كورەمىز. بىردەي بولسا، قاينەكەڭ بۇگىن «باقىتتى». ءبىر جاعىنىڭ ءبىر سانى ارتىق بولسا – كەزدەسۋ. ءاي، كۇنى بويى كىممەن كەزدەسپەيسىڭ. ەكى سان ارتىق بولسا – داستارحان. راسىندا، ونداي بيلەت ۇستاعان كۇنى اياق استىنان قوناققا بارىپ قالامىز.

سونىمەن، كەزەكتى بيلەتتى الدىق. بۇل جولى باقىتىمىزدى ىزدەۋگە ۇلگەرمەدىك. جايشىلىقتاعى كوك بوياۋلى ەمەس، مىناۋ قىزىل ءتۇستى بيلەت ەكەن. باستاپقىدا ناۋرىزدىڭ قۇرمەتىنە مەرەكەلىك بيلەت پە دەپ ەدىك. جوق، سىرى باسقاشا بولىپ شىقتى. بۇل 20 تەڭگەلىك بالالار بيلەتى ەكەن. سولاي جازىلىپ تۇر. «20 تەڭگە» دەگەن قۇنى دا كورسەتىلىپ تۇر. وسى اۆتوبۋسقا كىرگەندە بىرەر جاس ورىن ۇسىنىپ، كوندۋكتوردىڭ ءوزى جانە ءبىر بوس ورىندى كورسەتىپ جاسىمىزدىڭ ۇلكەن ەكەنىن قايتا-قايتا سەزدىرىپ ەدى. ەندى بەرىپ تۇرعانى – بالانىڭ بيلەتى. كەرەعارلىقتى قاراڭىز.

ويىمىزعا اۋىلدا ايتىلاتىن ءسوزدىڭ ءبىرى تۇسكەنى: «اتتىڭ جەمىن جەپ، تايدىڭ ويىنىن وينايدى». سوعان ۇقساس جاعداي ەكەن. نەسى بار، «قارت» دەپ قۇرمەتتەگەننەن گورى «بالا» دەپ الدارقاتقانى جانى­­مىزعا جاقىن سياقتى. امان بولىڭ­دار، استانانىڭ كوندۋكتورلارى!

قاينار ولجاي

 

پىكىر جازۋ

پوچتاڭىز جاريالانبايدى

3 × 1 =