اسىق جۇرەر استانانى ارالاپ

0 114

كوپشىلىككە ەتەنە تانىس بولىپ كەتكەن مۋلتفيلمدەر ىشىندە «الدار كوسەنىڭ» حيكايالارى ەرەكشە ورىن الادى. قازاقى ءاجۋا، بالانى وزىنە تارتىپ اكەتەتىن تارتىمدىلىعى مول. كىم نە دەسە دە، الدار كوسەنىڭ ءمۋلتفيلمى قازىر قازاق انيماتسياسىنىڭ جارقىن ۇلگىسى بولىپ تۇر.

 امەن اقساقالدىڭ سارا جولىن جالعاستىرۋشى جاستار لەگى انيماتسياعا بىرتىندەپ وزىندىك جاڭالىق اكەلۋگە تىرىسىپ باعۋدا. كەنجەلەپ قالعان

بالالار الەمىنىڭ بولىنبەس بولشەگى – مۋلتفيلم سالاسىن جاڭا، تارتىمدى دۇنيەلەرمەن تولتىرۋ قولعا الىنا باستادى. ولاردىڭ قاتارىندا ءتىپتى «قازاقستاندىق برەند» تۋرالى دا ءاپسانا شىقتى. ول ءاپسانا نەگىزىنە اسىق، باۋىرساق، قۇرت، قىمىز، دومبىرا سيمۆول رەتىندە الىنعانى جونىندە وقىرمان قاۋىم قۇلاعدار دەگەن ويدامىز.

ايتپاعىمىز، وسى ۇلكەن كوشكە ۇلەس قوسۋشىلار قاراسى كوبەيۋدە. قازىرگى تاڭدا كوپتەگەن جەكەمەنشىك ستۋديالار العاشقى تابىستارىمەن بولىسۋدە. ءبىرى ارتىق دۇنيە جاساسا، كەيبىرى كەمشىن ءتۇسىپ جاتادى. بىراق، قايقايسىسى دا قازاق ءمۋلتفيلمى ءۇشىن جانتالاسىپ، وعان جان بىتىرمەككە قۇلشىنۋدا. كوپشىلىكتى وسى تالپىنىس قۋانتادى. وسىنداي تالپىنىستى باستاعان جاس ورتالىق تۋرالى ءسوز ەتۋدى ماقسات تۇتتىق.

قازىر استانادا «جەتىقوڭىر» پروديۋسەرلىك ورتالىعى ەل يگىلىگىنە باعىتتالعان ۇلكەن ىسكە بەل شەشە كىرىستى. العاشقى قارلىعاش مۋلتفيلمدەرى «اسىقتىڭ ءتۇسى» دەپ اتالادى. وزدەرى ونى بۇگىنگى كۇنگە ساي ەتىپ تۇسىرگەندىكتەن، استانامەن بايلانىستىرعان. قىسقاشا بايانداساق، اسىقتىڭ ەلورداعا ساپارى. بۇلدىرشىندەر قازاقى دۇنيەتانىمدى بوتەنسىمەي، كىتاپتان عانا ەمەس، كوزىمەن كورىپ وسۋىنە، اسىقتىڭ ءتۇرلى حيكايالارىنا ءتانتى بولۋىنا باعىتتالعان. انيماتسيالىق فيلم ءتۇسىرۋ اتالمىش پروديۋسەرلىك ورتالىق باسشىسى قۋانتاي امانتايۇلىنىڭ ايتۋىنشا، العاشقى تاجىريبەلەرى.

بۇرىن ورتالىق تەك بەينەباياندار ءتۇسىرىپ، ءتۇرلى جاڭالىققا تولى، ونەردى ناسيحاتتايتىن ماڭىزدى دۇنيەلەرگە عانا كوڭىل ءبولىپ كەلگەن.

«قۇرىلعانىمىزعا كوپ بولا قويعان جوق. جالپى ماقساتىمىز – قازاقتىڭ سالت ءداستۇرىن ناسيحاتتاۋ، ۇلتتىق بولمىسىمىزعا قاتىستى كەز كەلگەن تاقىرىپقا دەندەپ، سودان تۋىندى جاساۋ. انيماتسيا سالاسىنداعى العاشقى قادامىمىز وڭاي بولعان جوق. بالالارعا ۇسىناتىن ماعىنالى مۋلتفيلمدەر كوپ ەمەس. سول سالاعا وزىمىزشە ۇلەس قوسساق دەگەن وي-نيەتىمىز ەدى»، – دەيدى جاس باسشى.

ارينە، «كوز – قورقاق، قول – باتىر». مۋلتيپليكاتسيانىڭ كەدەرگىسى كوپ، تۇيتكىلى شەشىلمەگەن سالا ەكەنى بەلگىلى، كەنجەلەپ قالۋىنىڭ دا كوپتەگەن سەبەپتەرى بار. ەڭ باستىسى، ادامنىڭ قاجىرى بولسا، قيىندىقتى جەڭىپ شىعاتىنىن وسى جاس ۇجىمنىڭ تاجىريبەسى دالەلدەپ وتىر. مۋلتفيلمگە كىرىسپەس بۇرىن جەر-جەرگە جار سالىپ، سۋرەتشىلەر ىزدەستىرىپتى. ولارعا كوڭىلى تولىپ، ويىنداعى ماقساتىن ورتاعا جايىپ سالعاندا، قاي قازاقتىڭ دا بالا كۇنگى جان سەرىگى اسىق تۋرالى مۋلتفيلم جاساۋعا توقايلاسادى.

ارنايى ستسەناري جاسالىپ، سول بويىنشا سۋرەتشىلەر ۇزىن-سونار جۇمىسقا كىرىسىپ تە كەتەدى. ءار قيمىلدى جەكە-جەكە قاعازعا ءتۇسىرىپ، وعان جان ءبىتىرۋدىڭ كۇردەلى دە قيامەتتى شارۋاسىن باستان كەشىرگەن ۇجىم ءوز ءونىمىنىڭ بالدىرعاندار كوڭىلىنەن شىعۋىن قالايتىنى ايتپاسا دا تۇسىنىكتى.

«ءتۇسىرىلىپ جاتقان ونىمىمىزگە الدەن سۇرانىس تانىتىپ جاتىر. سوندىقتان ءبىزدىڭ «اسىق» از كۇندە ءوزىنىڭ كورەرمەنىمەن قاۋىشىپ، بىزگە العىسىن ايتادى دەپ سەنەمىز»، – دەيدى ءوزىنىڭ جۇرەك جاردى قۋانىشىن جاسىرا الماعان قۋانتاي امانتايۇلى. نەگىزىندە، مۇنداي اۋقىمدى جوبانى اياق استىنان باستاپ كەتكەن «جەتىقوڭىردىڭ» ۇجىمى تيتىقتاتقان قيىندىعىنا قاراماستان، مۋلتفيلم جاساۋدىڭ قىر-سىرىن مەڭگەرىپ ۇلگەرگەندىكتەرىن ايتادى. كەلەسى جولى انيماتسيالىق ءونىم جاساۋ دا ەش قينالماستان ىستەرىن ارى قاراي جالعاستىرا بەرمەك.

ر.S: «مۋلتيپليكاتور، قويۋشى رەجيسسەر قايىرعالي قاسىموۆتىڭ ونلاين كونفەرەنتسياسى بارىسىندا «قازاق ءتىلدى مۋلتفيلمدەردى كوبىرەك شىعارۋعا قارجىدان باسقا قانداي كەدەرگىلەر بار؟» دەگەن ساۋالىمىزعا جاۋابى مىنانداي بولعان ەدى: «جەكەمەنشىك ستۋديالار، شىمكەنت ستۋديالارى «ساق» جانە «جەبە»، قوستانايدا «كوكشە»… بۇدان بولەك، تاعى باسقا جەكە ستۋديالار «قازاقفيلممەن» بىرىگىپ ءتۇسىرىپ جاتقان ءتۇرلى فيلمدەر بار. ساپالىق جاعىنان دا بىلتىرعا قاراعاندا بيىل وتە ءتاۋىر. ولاردى ەكشەيتىن «قازاقفيلمدەگى» كوركەمدىك كەڭەس. باستى قيىندىق – تاقىرىپقا انيماتسيا تىلىندە ستسەناري جازاتىندار از».

 

شىنار ءابىلدا

پىكىر جازۋ

پوچتاڭىز جاريالانبايدى

2 × five =