Алматы
Алматыда «Smart City» жобасы аясында итальяндық инвестиция есебінен көлікті минутпен жалға беретін «Anytime» каршеринг-сервисі ашылды. Жалға алған автомобильмен тек шаһар ішінде ғана емес, қала сыртындағы Медеуге, Үлкен Алматы көліне, тіпті Қапшағайға дейін баруға болады.
Ақмола облысы
Біржан сал ауданында Билер кеңесі құрылды. Бұл кеңеске қазақ билер соты қызметінің негізгі принциптерін жаңғыртып, оның ішінде дауласқан тараптарды дана шешімдерімен татуластыру миссиясы жүктеліп отыр.
Қостанай облысы
Биыл Қостанай облысында 5 млн 214 мың тонна астық жиналып, орташа түсім 12,8 центнерді құрады. Ал қазан айының басынан бері 73 мың тонна бидай темір жол вагондарына тиеліп, оның 54,6 мың тоннасы экспортқа шығарылды.
Қызылорда
Облыс орталығында «Қорқыт-Қобыз» республикалық байқауы өтіп, 17-55 жас аралығындағы 17 өнерпаз бақ сынады. Байқау қорытындысы бойынша астаналық Шолпан Шарапатова бас жүлдені қанжығалады.
Түркістан облысы
Созақ ауданының 90 жылдығы қарсаңында 24 нысан пайдалануға берілді. Бұдан бөлек, осы ауданға қарасты Шолаққорған, Жуантөбе, Жартытөбе, Сызған Қызылкөл ауылдарының негізгі көшелері жарықтандырылды.
Маңғыстау облысы
Ақтаулық ғалымдар электромобильді қуаттайтын станса жасақтады. Екі стансаның толық қуаттау циклі үш сағаттан тұрады. Мұнда күніне 8 көлікті қуаттауға болады.
Қарағанды облысы
«Бизнестің жол картасы – 2020» бағдарламасы бойынша Қарағандыда жас кәсіпкерлер мектебі ашылды. Мұнда 18-29 жас аралығындағы жастарға дәріс өткізіледі. Оқыту барысында тыңдаушыларға бизнес құру кезінде қандай заңнамалық, экономикалық және әлеуметтік мәселелердің кездесетіні туралы айтылады.
