«ASTANA» DEP KELEDİ ALISTARDAN

0 97

sdf

Astana jıl sanap körkeyip keledi.
Bas şahardıñ zäwlim sarayları men ğïmarattarı şet memleketten kelgen qay qonaqtıñ da qos janarın bir sürindirmey qoymaydı.
Elordanıñ irgesi qalanğalı beri bar-joğı on altı jıl ötse de, damw qarqını köñil qwantadı.

Körikti qalalar qatarındamız

Astana qalası elimizdiñ negizgi ortalığı retinde bastı, iri twrïstik şaharğa aynaldı. Arqanıñ tösindegi äsem qala köptegen halıqaralıq deñgeydegi is-şaralardı öz märtebesine say ötkizip, san mıñdağan qonaqtarğa keñ peyildiligi men aqjarqın nïetin tanıtıp, öziniñ märtebesine say ekenin san märte däleldedi.

Ötken jılı ğana bizdiñ Astanamız twrïstik qalalardıñ bedeldi Bükilälemdik federacïyası (World Tourism Cities Federation – WTCF) quramına engen. Bul – Los-Andjeles, Rïm, Berlïn, Makao, Pekïn, London, Vena, tağı basqa da elwden asa megapolïster men twrïstik ortalıqtardı biriktiretin kölemi jağınan törtinşi twrïstik birlestik. Bir ayta keterligi, burınğı keñes elderiniñ qalaları işinde WTCF qatıswşıları – tek Mäskew, Mïnsk jäne Astana ğana.

Qazaqstan astanası älgi federacïya quramına Pekïn meri Wong Anşwngtıñ şaqırwı boyınşa kirgeni de esimizde. Sol tusta Pekïn meri «Bükilälemdik twrïstik qalalar federacïyası keñesiniñ törağası retinde men Astananı WTCF quramına qwana usındım. Federacïyağa qosıla otırıp, qala uyımdağı basqa qalalarmen birge sätti täjirïbesimen, twrïzmdi damıtw mümkindikterimen bölisetindigine senimim zor» degen edi.

Halıqaralıq şaralar bedelimizdi küşeytedi

Bas qalağa alğaş kelgen adam nağız mädenï, rwhanï sezimdi basınan keşiredi. Öytkeni, tarïhï ölşemmen öte qısqa merzimde qurılğan Astananıñ säwlettik beynesin tamaşalağan kez kelgen qonaq tañ qalmawı mümkin emes. Täwelsizdik, Beybitşilik jäne kelisim saraylarınıñ, «Qazaqstan» ortalıq koncert zalınıñ, küni keşe ğana esigin ayqara aşqan Ulttıq mwzeydiñ, «Bäyterek» monwmentiniñ ğajayıptarı tamaşalawşısın sergek küyge jeteleydi.
Mamandardıñ aytwınşa, twrïzmniñ osılay qarqındı damwınıñ bastı sebebi – jergilikti organdar men uyımdardıñ twrïzm salasımen tığız baylanısta jumıs jasawında.

Büginde Astana şaharında 132 twrïstik fïrma jumıs isteydi. Elordanıñ halıqaralıq twrïstik narıqta bäsekege qabiletti bolwı üşin olar twrïstik körmelerge belsendi qatıswda jäne üzdiksiz şaqırılwda. Munı da astanalıq kompanïyalardıñ twğan qalasın nasïhattawğa qosqan ülesi dewge äbden keledi.

«Twrïzmniñ eñ tabıstı türleriniñ biri – issaparlıq twrïzm. Munday twrïsterdiñ 70 payızdan astamı Astanada ötetin ärtürli körmeler men konferencïyalarğa, semïnarlarğa qatısw maqsatında keledi. YAğnï, qonaqtardıñ köpşiligi bizdiñ bas qalamızğa issaparlıq maqsatta at basın buradı» deydi sala mamandarı. Osı orayda ayta ketetin bir jayt, jaña ğana aytqan EQIU Sammïti, VII qısqı Azïya oyındarı, jıl sayın ötetin Astana ekonomïkalıq forwmı jäne Astana küni sekildi türli halıqaralıq deñgeydegi iri ekonomïkalıq, sayasï, sporttıq jäne mädenï şaralar twrïzmniñ damwına jäne elorda märtebesiniñ artwına mañızdı äserin tïgizedi. Al 2017 jılı ötetin «EHRO» halıqaralıq mamandandırılğan körmesine alıs-jaqın şet memleketterden 5 mïllïonğa tarta meyman kelmek.

DEREK PEN DÄYEK

2013 jılğı arnayı statïstïkalıq mälimetterge süyensek, qalağa 687 239 twrïst kelgen eken. Onıñ işindegi 108,5 mıñı – alıs şet el azamattarı. Buğan qarap, bir jıl işinde elordağa taban tireytin twrïster sanınıñ 105 mıñ adamğa, yağnï, 16 payızğa öskenin köremiz. Bıltır qalağa kelgen adamdardıñ jalpı sanın 2010 jılğı körsetkişpen salıstırğanda 67,5 payızğa artqanın añğaramız.  

Elbası «EHRO» körmesin qwattawda

Twrïzmniñ bastı talaptarınıñ biri – qonaqüylerdiñ sapağa say kelwi, zaman köşine ileswi. Qazirgi tañda Astana qalasında 161 qonaqüy jumıs isteydi. Olardağı jatın orındar sanı 8442-ge jetken. Sonımen qatar, «lyuks» sanatındağı nömirler sanı 744-ti quraydı. Al bes juldızdı qonaqüyler – 5, tört juldızdı – 11, üş juldızdı 20 qonaqüy bar eken. Bul cïfrlar aldağı üş jılda eselep ösetinine senimdimiz. Öytkeni, Prezïdent Nursultan Nazarbaevtıñ özi elordada ötetin «EHRO» körmesine basa mañız berip, dayındıq jumıstarın jiti baqılawda. Halıqaralıq şarağa oray twrïsterdi märtebesine say kütip alatın meymanhanalar men meyramhanalardıñ qatarın köbeytw qajettigin de tapsırğan Memleket basşısı.

SÜBELİ SÖZ

Samat QABDWLÏN, Astana qalası twrïzm, dene tärbïesi jäne sport basqarması basşısınıñ orınbasarı:

– Astana qalası halıqaralıq twrïzmniñ bastı ortalığına aynalar kün alıs emes dep bilemin. Sebebi, elordadağı qazirgi jağdaydıñ özi bul senimdi küşeyte tüsedi. Men öz salam boyınşa äñgimeleyin, Astanada köptegen bayraqtı sporttıq bäsekeler ötip turadı. Olardıñ qay-qaysısına da alıs-jaqın şet elderden keletin sportşılar köp-aq. Qonaqtardıñ köpşiligi otız mıñ adamdı quşağına sıydırwğa mümkindigi bar «Astana-arena» stadïonına, «Alaw» muz aydınına, «Sarıarqa» respwblïkalıq velotrekke, basqa da sporttıq nısandarımızğa tañday qağıp, tamsanıp ketedi. Statïstïkalıq derekter elordağa ağılğan meymandardıñ jıl sanap artıp kele jatqanın ayğaqtaydı. Bile bilsek, solardıñ deni sporttıq şaralarğa qatıswğa keledi. Endi halıqaralıq «EHRO-2017» körmesine dayındıq üstindemiz. Bul oqïğa da Astana twrïzminiñ salmağın arttırıp, atımızdı şartarapqa jayatınına senimim zor.

Twrïsterdi qabıldawda tamaqtanw orındarınıñ köptep bolwı öte mañızdı. Bul turğıdan da bas şahardıñ qızmet körsetwi oyğa qonımdı. Aytalıq, Astanadağı meyramhanalardıñ qatarı büginde 177-ge jetse, osınıñ barlığı bir mezette 23000 adamdı qabılday aladı. Al 770 kafe-barımız 28950 qonaq küte aladı. Memleket tarapınan şağın jäne orta bïzneske qoldaw da bul salanıñ ilgerilewine septigin tïgizwde.

Astanadağı twrïstik ispen aynalısatın käsipkerler ötken jılı 425,9 mıñ adamğa qızmet körsetipti. Onıñ işinde twrïstik fïrmalar arqılı 56,3 mıñ adamğa, jeke käsipkerler arqılı 31,2 mıñ adamğa qızmet usınılğan.

Astanağa ötken jılı şet memleketten kelgen 198,8 mıñ azamattıñ basım böligi – TMD awmağındağı elderdiñ turğındarı. Naqtıraq aytsaq, 72,6 payızı Resey Federacïyasınan, 11,5 payızı Wkraïnadan, 4,7 payızı Özbekstannan, 2,4 payızı Belorwssïya elinen elordağa at basın burğan. Al TMD-dan özge memleketterden kelgen twrïster sanınıñ basım böligi türkïyalıqtar eken. Qıtaydan, AQŞ-tan, Germanïyadan jäne Ulıbrïtanïyadan Qazaqstandı körgisi kelgender de barşılıq.

Ashat RAYQUL

Pikir jazw

Poçtañız jarïyalanbaydı

two × 2 =