«استانا» دەپ كەلەدى الىستاردان

0 97

sdf

استانا جىل ساناپ كوركەيىپ كەلەدى.
باس شاھاردىڭ ءزاۋلىم سارايلارى مەن عيماراتتارى شەت مەملەكەتتەن كەلگەن قاي قوناقتىڭ دا قوس جانارىن ءبىر سۇرىندىرمەي قويمايدى.
ەلوردانىڭ ىرگەسى قالانعالى بەرى بار-جوعى ون التى جىل وتسە دە، دامۋ قارقىنى كوڭىل قۋانتادى.

كورىكتى قالالار قاتارىندامىز

استانا قالاسى ەلىمىزدىڭ نەگىزگى ورتالىعى رەتىندە باستى، ءىرى تۋريستىك شاھارعا اينالدى. ارقانىڭ توسىندەگى اسەم قالا كوپتەگەن حالىقارالىق دەڭگەيدەگى ءىس-شارالاردى ءوز مارتەبەسىنە ساي وتكىزىپ، سان مىڭداعان قوناقتارعا كەڭ پەيىلدىلىگى مەن اقجارقىن نيەتىن تانىتىپ، ءوزىنىڭ مارتەبەسىنە ساي ەكەنىن سان مارتە دالەلدەدى.

وتكەن جىلى عانا ءبىزدىڭ استانامىز تۋريستىك قالالاردىڭ بەدەلدى بۇكىلالەمدىك فەدەراتسياسى (World Tourism Cities Federation – WTCF) قۇرامىنا ەنگەن. بۇل – لوس-اندجەلەس، ريم، بەرلين، ماكاو، پەكين، لوندون، ۆەنا، تاعى باسقا دا ەلۋدەن اسا مەگاپوليستەر مەن تۋريستىك ورتالىقتاردى بىرىكتىرەتىن كولەمى جاعىنان ءتورتىنشى تۋريستىك بىرلەستىك. ءبىر ايتا كەتەرلىگى، بۇرىنعى كەڭەس ەلدەرىنىڭ قالالارى ىشىندە WTCF قاتىسۋشىلارى – تەك ماسكەۋ، مينسك جانە استانا عانا.

قازاقستان استاناسى الگى فەدەراتسيا قۇرامىنا پەكين مەرى ۋونگ انشۋنگتىڭ شاقىرۋى بويىنشا كىرگەنى دە ەسىمىزدە. سول تۇستا پەكين مەرى «بۇكىلالەمدىك تۋريستىك قالالار فەدەراتسياسى كەڭەسىنىڭ توراعاسى رەتىندە مەن استانانى WTCF قۇرامىنا قۋانا ۇسىندىم. فەدەراتسياعا قوسىلا وتىرىپ، قالا ۇيىمداعى باسقا قالالارمەن بىرگە ءساتتى تاجىريبەسىمەن، ءتۋريزمدى دامىتۋ مۇمكىندىكتەرىمەن بولىسەتىندىگىنە سەنىمىم زور» دەگەن ەدى.

حالىقارالىق شارالار بەدەلىمىزدى كۇشەيتەدى

باس قالاعا العاش كەلگەن ادام ناعىز مادەني، رۋحاني سەزىمدى باسىنان كەشىرەدى. ويتكەنى، تاريحي ولشەممەن وتە قىسقا مەرزىمدە قۇرىلعان استانانىڭ ساۋلەتتىك بەينەسىن تاماشالاعان كەز كەلگەن قوناق تاڭ قالماۋى مۇمكىن ەمەس. تاۋەلسىزدىك، بەيبىتشىلىك جانە كەلىسىم سارايلارىنىڭ، «قازاقستان» ورتالىق كونتسەرت زالىنىڭ، كۇنى كەشە عانا ەسىگىن ايقارا اشقان ۇلتتىق مۋزەيدىڭ، «بايتەرەك» مونۋمەنتىنىڭ عاجايىپتارى تاماشالاۋشىسىن سەرگەك كۇيگە جەتەلەيدى.
مامانداردىڭ ايتۋىنشا، ءتۋريزمنىڭ وسىلاي قارقىندى دامۋىنىڭ باستى سەبەبى – جەرگىلىكتى ورگاندار مەن ۇيىمداردىڭ تۋريزم سالاسىمەن تىعىز بايلانىستا جۇمىس جاساۋىندا.

بۇگىندە استانا شاھارىندا 132 تۋريستىك فيرما جۇمىس ىستەيدى. ەلوردانىڭ حالىقارالىق تۋريستىك نارىقتا باسەكەگە قابىلەتتى بولۋى ءۇشىن ولار تۋريستىك كورمەلەرگە بەلسەندى قاتىسۋدا جانە ۇزدىكسىز شاقىرىلۋدا. مۇنى دا استانالىق كومپانيالاردىڭ تۋعان قالاسىن ناسيحاتتاۋعا قوسقان ۇلەسى دەۋگە ابدەن كەلەدى.

«ءتۋريزمنىڭ ەڭ تابىستى تۇرلەرىنىڭ ءبىرى – ىسساپارلىق تۋريزم. مۇنداي تۋريستەردىڭ 70 پايىزدان استامى استانادا وتەتىن ءارتۇرلى كورمەلەر مەن كونفەرەنتسيالارعا، سەمينارلارعا قاتىسۋ ماقساتىندا كەلەدى. ياعني، قوناقتاردىڭ كوپشىلىگى ءبىزدىڭ باس قالامىزعا ىسساپارلىق ماقساتتا ات باسىن بۇرادى» دەيدى سالا ماماندارى. وسى ورايدا ايتا كەتەتىن ءبىر جايت، جاڭا عانا ايتقان ەقىۇ ءسامميتى، VII قىسقى ازيا ويىندارى، جىل سايىن وتەتىن استانا ەكونوميكالىق فورۋمى جانە استانا كۇنى سەكىلدى ءتۇرلى حالىقارالىق دەڭگەيدەگى ءىرى ەكونوميكالىق، ساياسي، سپورتتىق جانە مادەني شارالار ءتۋريزمنىڭ دامۋىنا جانە ەلوردا مارتەبەسىنىڭ ارتۋىنا ماڭىزدى اسەرىن تيگىزەدى. ال 2017 جىلى وتەتىن «ەحرو» حالىقارالىق مامانداندىرىلعان كورمەسىنە الىس-جاقىن شەت مەملەكەتتەردەن 5 ميلليونعا تارتا مەيمان كەلمەك.

دەرەك پەن دايەك

2013 جىلعى ارنايى ستاتيستيكالىق مالىمەتتەرگە سۇيەنسەك، قالاعا 687 239 تۋريست كەلگەن ەكەن. ونىڭ ىشىندەگى 108,5 مىڭى – الىس شەت ەل ازاماتتارى. بۇعان قاراپ، ءبىر جىل ىشىندە ەلورداعا تابان تىرەيتىن تۋريستەر سانىنىڭ 105 مىڭ ادامعا, ياعني، 16 پايىزعا وسكەنىن كورەمىز. بىلتىر قالاعا كەلگەن ادامداردىڭ جالپى سانىن 2010 جىلعى كورسەتكىشپەن سالىستىرعاندا 67,5 پايىزعا ارتقانىن اڭعارامىز.  

ەلباسى «ەحرو» كورمەسىن قۋاتتاۋدا

ءتۋريزمنىڭ باستى تالاپتارىنىڭ ءبىرى – قوناقۇيلەردىڭ ساپاعا ساي كەلۋى، زامان كوشىنە ىلەسۋى. قازىرگى تاڭدا استانا قالاسىندا 161 قوناقۇي جۇمىس ىستەيدى. ولارداعى جاتىن ورىندار سانى 8442-گە جەتكەن. سونىمەن قاتار، «ليۋكس» ساناتىنداعى نومىرلەر سانى 744-ءتى قۇرايدى. ال بەس جۇلدىزدى قوناقۇيلەر – 5, ءتورت جۇلدىزدى – 11, ءۇش جۇلدىزدى 20 قوناقۇي بار ەكەن. بۇل تسيفرلار الداعى ءۇش جىلدا ەسەلەپ وسەتىنىنە سەنىمدىمىز. ويتكەنى، پرەزيدەنت نۇرسۇلتان نازارباەۆتىڭ ءوزى ەلوردادا وتەتىن «ەحرو» كورمەسىنە باسا ماڭىز بەرىپ، دايىندىق جۇمىستارىن ءجىتى باقىلاۋدا. حالىقارالىق شاراعا وراي تۋريستەردى مارتەبەسىنە ساي كۇتىپ الاتىن مەيمانحانالار مەن مەيرامحانالاردىڭ قاتارىن كوبەيتۋ قاجەتتىگىن دە تاپسىرعان مەملەكەت باسشىسى.

سۇبەلى ءسوز

سامات قابدۋلين، استانا قالاسى تۋريزم، دەنە تاربيەسى جانە سپورت باسقارماسى باسشىسىنىڭ ورىنباسارى:

– استانا قالاسى حالىقارالىق ءتۋريزمنىڭ باستى ورتالىعىنا اينالار كۇن الىس ەمەس دەپ بىلەمىن. سەبەبى، ەلورداداعى قازىرگى جاعدايدىڭ ءوزى بۇل سەنىمدى كۇشەيتە تۇسەدى. مەن ءوز سالام بويىنشا اڭگىمەلەيىن، استانادا كوپتەگەن بايراقتى سپورتتىق باسەكەلەر ءوتىپ تۇرادى. ولاردىڭ قاي-قايسىسىنا دا الىس-جاقىن شەت ەلدەردەن كەلەتىن سپورتشىلار كوپ-اق. قوناقتاردىڭ كوپشىلىگى وتىز مىڭ ادامدى قۇشاعىنا سىيدىرۋعا مۇمكىندىگى بار «استانا-ارەنا» ستاديونىنا، «الاۋ» مۇز ايدىنىنا، «سارىارقا» رەسپۋبليكالىق ۆەلوترەككە، باسقا دا سپورتتىق نىساندارىمىزعا تاڭداي قاعىپ، تامسانىپ كەتەدى. ستاتيستيكالىق دەرەكتەر ەلورداعا اعىلعان مەيمانداردىڭ جىل ساناپ ارتىپ كەلە جاتقانىن ايعاقتايدى. بىلە بىلسەك، سولاردىڭ دەنى سپورتتىق شارالارعا قاتىسۋعا كەلەدى. ەندى حالىقارالىق «ەحرو-2017» كورمەسىنە دايىندىق ۇستىندەمىز. بۇل وقيعا دا استانا ءتۋريزمىنىڭ سالماعىن ارتتىرىپ، اتىمىزدى شارتاراپقا جاياتىنىنا سەنىمىم زور.

تۋريستەردى قابىلداۋدا تاماقتانۋ ورىندارىنىڭ كوپتەپ بولۋى وتە ماڭىزدى. بۇل تۇرعىدان دا باس شاھاردىڭ قىزمەت كورسەتۋى ويعا قونىمدى. ايتالىق، استاناداعى مەيرامحانالاردىڭ قاتارى بۇگىندە 177-گە جەتسە، وسىنىڭ بارلىعى ءبىر مەزەتتە 23000 ادامدى قابىلداي الادى. ال 770 كافە-بارىمىز 28950 قوناق كۇتە الادى. مەملەكەت تاراپىنان شاعىن جانە ورتا بيزنەسكە قولداۋ دا بۇل سالانىڭ ىلگەرىلەۋىنە سەپتىگىن تيگىزۋدە.

استاناداعى تۋريستىك ىسپەن اينالىساتىن كاسىپكەرلەر وتكەن جىلى 425,9 مىڭ ادامعا قىزمەت كورسەتىپتى. ونىڭ ىشىندە تۋريستىك فيرمالار ارقىلى 56,3 مىڭ ادامعا، جەكە كاسىپكەرلەر ارقىلى 31,2 مىڭ ادامعا قىزمەت ۇسىنىلعان.

استاناعا وتكەن جىلى شەت مەملەكەتتەن كەلگەن 198,8 مىڭ ازاماتتىڭ باسىم بولىگى – تمد اۋماعىنداعى ەلدەردىڭ تۇرعىندارى. ناقتىراق ايتساق، 72,6 پايىزى رەسەي فەدەراتسياسىنان، 11,5 پايىزى ۋكراينادان، 4,7 پايىزى وزبەكستاننان، 2,4 پايىزى بەلورۋسسيا ەلىنەن ەلورداعا ات باسىن بۇرعان. ال تمد-دان وزگە مەملەكەتتەردەن كەلگەن تۋريستەر سانىنىڭ باسىم بولىگى تۇركيالىقتار ەكەن. قىتايدان، اقش-تان، گەرمانيادان جانە ۇلىبريتانيادان قازاقستاندى كورگىسى كەلگەندەر دە بارشىلىق.

اسحات رايقۇل

پىكىر جازۋ

پوچتاڭىز جاريالانبايدى

eleven + four =