АССАМБЛЕЯНЫҢ АТЫМТАЙЛАРЫ

«Тәуелсіздік. Келісім. Болашағы Біртұтас Ұлт» атауымен кезекті ХХІV сессиясында Мемлекет басшысы Қазақстан халқы Ассамблеясы жаңа функциялық бағыттарды өз мойнына алғанына тоқталып өтті.

Осы ретте Елбасы «Қайы­рымдылық қызмет туралы жаңа Заңда ҚХА-ға меценаттар қоғамдастығының басты үйлестірушісі қызметін атқару бекітіліп берілді. Тарихта бірінші рет қайырымдылық ұйымдарының, меценаттар мен донорлардың рес­публикалық съезі өткізілді. «Үлкен ел – Үлкен отбасы» жобасы мен Ассамблея жылы аясында 400 мыңнан астам қазақстандыққа қайтарымсыз көмек көрсетілді. Балалар үйлерінің 7800 тәр­бие­лену­шісі мен жетім балалар үшін жалпы құны 5 миллиард теңге болатын білім беруге ар­нал­ған есепшоттар ашылды» деп атап өтті.
Астана қаласында тұрмысы нашар отбасылар мен көп балалы отбасыларға, мүгедектер мен жетім балаларды қолдау мақсатында түрлі шаралар кешені өткізіліп келеді. Ас­самблеяның мерейлі жылына арналған «20-қайырымды іс» атты шарасы аясында 36 шара ұйымдастырылып, оған 157 051 адам қатысты. 7114 адамға 17 988,0 мың теңге көлемінде көмек көрсетілді.
Қайырымдылық акцияларына барлық этномәдени орталықтардың өкілдері тартылды. «Қырғызстан-Астана» қоғамдық бірлестігінің төр­а­­ғасы Шафхат Исмаиловтың бастамасымен мүмкіндігі шек­теулі жандарға әлеуметтік көмек көрсетіліп келеді. Қала­лық Ассамблея мен Есіл ауданы мүгедектер қоғамы ара­сындағы келісімге сәйкес мү­гедектерге ағылшын тілін оқыту, компьютерлік сауат ашу және «дизайнер», «тігінші» мамандықтары бойынша оқыту курстарын ашты. Соның нәтижесінде 135 адам сертификат алды. Мүгедектер қоғамына 12 тігін машинасы мен 12 компьютер сыйға тарту етілді.
«Вайнах» шешен-ингуш этномәдени орталығының да қайырымдылық істері атап өтуге тұрарлық. 2010 жылы М.Жәлел атындағы көшенің бойында мешіт пайдалануға берілсе, осы орталықтың жомарт қолды азаматтарының арқасында «Жастар» шағын ауданындағы қорымның қор­шауы тұрғызылып, абаттандырылды. Қоянды елдімекенінде мешіт тұрғызылды. Өткен жылы «Беркат» консорциумы тек қайырымдылық шараларына 15 млн теңге бөлген екен.
«Таң» татар-башқұрт этно­мәдени орталығы жалғыз­ілікті қарттарды қамқорлығына алып, тұрақты түрде жәрдем көрсетіп келеді. Татар ағайындар был­тырғы Жеңіс күнінде 90 соғыс ардагерін ұлықтап, қаржылай көмек көрсетті.
Тұрмысы төмен адамдарға Хасан Шарипов бастаған өзбек ағайындар да қолдау көр­сетіп отыр. Жыл сайын айт күндері мұқтаж адамдарға қайы­рым­ды­лық дастарқанын жайып, дәмді тағамдарды үлестіріп отырады.
Қаріп-қасеріне қайырымы болмаса, кез келген қоғамның адами келбеті жайында айту қиын. Қазақы болмысымыздағы «атымтай жомарттардың» дәстүрі жаңа пішінге ие болып, оны барлық этномәдени орталығының өкілдері өз қыз­метіне бағыт етіп алды.

Айгүл УАЙСОВА