ارمانىمىز استانامەن استاسقان…

0 305

ەلوردامىز كوز ىلەسپەس جىلدامدىقپەن كوركەيىپ كەلەدى. ەندى ءبىراز جىلدا الەمنىڭ ايتۋلى قالالارىنىڭ ءبىرى بولاتىنىنا بەك سەنىمدىمىن. ون شاقتى جىل بۇرىن عانا الەم ەلدەرىنىڭ كەيبىرى قازاقستاندى بىلمەك تۇگىلى، ەستىمەگەن بولسا، بۇگىندە «استانا» دەسە، ەلىمىزدى بىردەن تانيدى. بۇل – وتكەن جىلى ەلىمىزدە وتكەن ەكسپو حالىقارالىق كورمەسىنىڭ بىردەن-ءبىر جەمىسى دەپ بىلەمىن. يا، بۇل ايتۋلى شارا ۇيىمداستىرىلماس بۇرىن، قازاقستان وزگە قىرىنان دا تانىمال ەدى. وسى ورايدا باسىمنان وتكەن ءبىر جاعدايدى ايتقىم كەلەدى. 2015 جىلى كەزەكتى ىسساپارمەن يتالياعا باردىق. بۇل – مەملەكەت باسشىسىنىڭ ميلان قالاسىنا جاساعان مەملەكەتتىك ساپارى-تىن. ادەتتەگىدەي، شارادان بىرنەشە كۇن بۇرىن سول جاققا جەتىپ العان ءبىز ء(تۇسىرۋ توبى) ءسان الەمىنىڭ وتانى سانالاتىن شاھاردى ارالادىق. تاكسيمەن جۇرۋىمىزگە تۋرا كەلدى. كولىككە وتىردىق. يتاليالىق جۇرگىزۋشى ءبىزدىڭ باسقا ەلدەن كەلگەنىمىزدى بىردەن اڭعارىپ، اڭگىمەگە تارتتى (اڭگىمە اعىلشىن تىلىندە ءوربىدى)

   – قاي جاقتان كەلدىڭدەر؟

   – قازاقستاننان.

   – ول قاي جاقتا؟

   ىشتەي قالاي تۇسىندىرسەم ەكەن دەپ ويلانىپ كەلەمىن. ءبىر ۋاقىتتا:

   – استانا تۋرالى ەستۋىڭىز بار ما؟ – دەدىم.

   جۇرگىزۋشى بىردەن:

   – استانا! ءيا-ءيا! نازارباەۆ، ۆينوكۋروۆ، «استانا ارلانس»، – دەمەسى بار ما؟

   قۋانعانىمنان توبەم كوككە جەتۋگە از-اق قالىپ:

   – ءيا، ءبىز سول جاقتانبىز. استانا قازاقستاننىڭ باس قالاسى، ال نۇرسۇلتان نازارباەۆ – ءبىزدىڭ مەملەكەتىمىزدىڭ پرەزيدەنتى، – دەدىم. ول ەلوردامىزدى تەلەديداردان كورىپ، از عانا ۋاقىتتا جازىق جەرگە جاڭادان سالىنعان قالا ەكەنىنە تاڭ قالىپتى.

   كەۋدەمدى قۋانىش كەرنەپ، شەتەلدەگى قاراپايىم xالىقتىڭ ءبىزدىڭ استانامىزدى تانىپ جاتقانى – جەتىستىك، ماقتانىش دەگەن وي ءتۇيدىم. قيالىمنىڭ قاناتىنا «ءمىنىپ»، وقۋشى كەزىمدە ارمانداعان استاناما «تاۋەكەل» دەپ كەلگەنىمە سول كەزدە تاعى ءبىر ريزا بولدىم. سەبەبى جەتى جىل بۇرىن تۋعان قالام سەمەيدى قيىپ، ەشكىمىم جوق جەرگە كەلۋ شىنى كەرەك، وڭاي بولمادى. سارىارقانىڭ سارى ايازىنا توڭىپ، ءۇي-كۇيسىز جۇرگەن كەزدە استاناعا دەگەن ماxابباتىم، ونىمەن بايلانىستى ارماندارىم ۇستاپ قالا بەردى. كوپ كەشىكپەي ەلوردام وعان دەگەن ماxابباتىمدى قابىل الىپ، ومىرىم تۇبەگەيلى وزگەردى. باس قالامىزدىڭ بەلدى «استانا» تەلەارناسىنا جۇمىسقا قابىلداندىم. ەڭبەكتەنە ءجۇرىپ، شاھاردىڭ تىنىس-تىرشىلىگىن تەز ارادا زەرتتەپ، تانىپ ۇلگەردىم. «ورت-ەۆرازيا» تەلەارناسىندا ىستەپ ءجۇرىپ پرەزيدەنتىمىزدىڭ مەملەكەتتىك، رەسمي ساپارلارىنان xابار تاراتتىم. «سىرت كوز – سىنشى» دەمەكشى، ىسساپارلارعا شىققاندا ءبىزدىڭ مەملەكەت جايلى كوپ ەستيمىز. شىنىمەن دە، شەكارا اسقان سايىن بارعان جەردەگى حالىقتىڭ ءبىزدىڭ ەلگە دەگەن قىزىعۋشىلىعى زور ەكەنىن بايقادىم. سونداي ءبىر جاعدايمەن بولىسسەم دەيمىن. قىرعىزستاننىڭ استاناسى بىشكەكتە بولدىق. كوشەدە ءتۇسىرىلىم جاساپ ءجۇرىپ، ساۋداگەرمەن تىلدەسىپ قالدىم.

   – سەندەر باقىتتىسىڭدار، – دەيدى.

   – تۇسىنبەدىم؟ – دەپ، تاڭ قالدىم.

   – سەن قازاقسىڭ با؟

   – ءيا…

   – ەندەشە، دۇرىس ايتتىم. قازاق xالقىنىڭ باعىنا نۇرسۇلتان نازارباەۆتاي باسشى بۇيىردى. الپاۋىت ەلدەر قازاقستاندى مويىندادى. كوپتىڭ كورگىسى كەلەتىن استانالارىڭىز بار. ەڭ باستىسى – بەيبىتشىلىكتە ءومىر ءسۇرىپ جاتىرسىزدار…

    ويلانىپ قالدىم. راس، ىشتە ءجۇرىپ بارىمىزدى بايقامايمىز. قانشا ادام بىزدەگى بەيبىت ءومىردى اڭساپ ءجۇر دەسەڭىزشى؟!

   تاعى ءبىر مىسال. رەسەيدىڭ استراxان قالاسىندا قازاعىمىز كوپ. كەزەكتى ءبىر ساپارىمىزدا سونداي ءبىر قانداسىمىز قازاق ەكەنىمىزدى كورىپ، قاسىما كەلىپ تانىستى. ەلۋدى ەڭسەرگەن ەل اعاسى. سول جاقتى بۇرىننان مەكەن ەتكەن ەكەن. بالا كەزىنەن اكەسى: «ءبىزدىڭ وتانىمىز – قازاقستان!» – دەپ ۇيرەتىپتى. «وتانىما ورالۋ – ارمانىم»، – دەيدى. اسىرەسە ەلىمىزدىڭ بۇگىنگى جاعدايىنا قىزىعىپ، ەل اۋزىندا جۇرگەن اسەم قالا استانانى كورگىسى كەلەتىنىن ايتتى. جىل وتكەن سايىن مۇنداي ازاماتتاردىڭ كوبەيەتىنى ءسوزسىز. ال ءبىز سياقتى استاناعا ارمان قۋىپ كەلگەن جاستار باس قالامىزدىڭ كوركەيۋىنە تامشىداي بولسىن ۇلەسىن قوسۋى ءتيىس. ويلاپ وتىرسام، استاناعا كەلگەن جەتى جىلدا جەتكەن جەتىستىكتەرىم از ەمەس ەكەن. ومىرىمدەگى ماڭىزدى شەشىمدى دە وسىندا قابىلدادىم. استانادا نەكەگە تۇرىپ، شاڭىراق كوتەردىك. بۇگىندە ەكى بالالى انامىن. ورىندالماستاي كورىنگەن ارمانىمىزعا قول جەتكىزدىك. باسپانالى بولدىق. ەندىگى ماقساتىمىز – ەلىمىزدىڭ باس قالاسىندا تامىر جايساق، بالالارىمىز وسى شاھاردا ءوسىپ-جەتسە دەيمىز. ال ءوزىمىز استانانىڭ وركەندەۋىنە بارىنشا ۇلەس قوسقىمىز كەلەدى. ەلوردامىز قانات جايىپ كەلەدى، ونىمەن بىرگە استانالىقتاردىڭ دا سانى ارتۋدا. استانانىڭ بولاشاعى زور.

ايجان ىلياسقىزى،
جۋرناليست

پىكىر جازۋ

پوچتاڭىز جاريالانبايدى

15 − three =