«ARLANDAR» ŞÏREK FÏNALDA ŞÏRAQTIQ TANITTI

0 162

photo_18344

Bükilälemdik WSB boks serïyasınıñ kezekti mawsımında «Astana arlandarı» tağı da jartılay fïnalğa ötti. Olar osımen öz tarïhında törtinşi ret şïrek fïnaldan äri asıp otır. Bul jolı nemis sportşılarımen qolğap tüyistirgen olar bes salmaq boyınşa da basım tüsip, qonaqtardı taza jeñispen taptap ötti.

Almatıda ötken kezdeswdiñ 52 kelilik birinşi jubında Mïras Jaqıpov pen Ronnï Beblïka öner körsetip, jeñis alğaşqısınıñ ayqın paydasına şeşildi. 3:0. Keyin 60 kg salmaqtağı Samat Bäşenov Artwr Brïlyadan 2:1 esebimen basım tüsip, jartılay fïnalğa degen senimimizdi nıqtay tüsti.

Rïngke üşinşi şıqqan 69 kelilik boksşılardıñ arasındağı kezdesw jergilikti komandanıñ kelesi kezeñge ötwine tikeley qatıstı bolatın. Eger «arlandar» jeñiske jetse, jartılay fïnalğa aldın ala şığıp qoyıp, qalğan qos kezdesw nemister üşin negizsiz bolar edi. Sebebi, osığan deyin komandalardıñ Germanïyadağı teketiresinde 2:3 esebimen qazaq jigitteriniñ mereyi üstem bolğan-dı.

Desek te, osı salmaqtağı Meyirim Nursultanovqa kümänmen qarawdıñ özi qay-qaysımızğa da ar sanalar edi. Boksşımız babında eken, qarsılası Vyaçeslav Kerberdi 3:0 esebimen taza jeñip, «Astana arlandarına» jartılay fïnal joldamasın waqıtınan burın alıp berdi.

81 jäne +91 salmaqtağı Hrvoe Sep pen Rwslan Mırsataev ta basqa komandalastarınan qalıspay, Serj Mïşel men Erïk Pfayferden basım tüsti.

Osılayşa «arlandar» nemis boksşılarınıñ adımın aştırmay, jalpı esepte 8:2 esebimen utıp, jartılay fïnalğa şıqtı. Olardıñ endigi qarsılası – «Baku fires». Alğaşqı kezdesw Almatıda 25 säwirge josparlansa, qarımta jekpe-jek 2 mamır küni Gwba qalasında ötpekşi.

 

Pikir jazw

Poçtañız jarïyalanbaydı

14 − seven =