АНТИЯДРОЛЫҚ ҚОЗҒАЛЫС ЖҰМЫСЫ ЖАЛҒАСУДА

0 460

О

«Невада – Семей» халықаралық антиядролық қозғалысының құрылғанына биыл 25 жыл толып отыр. Белгілі ақын, қоғам қайраткері Олжас Сүлейменов басқаратын ұйым Семей ядролық полигонын жабу мақсатында құрылып, өз дегеніне жетті. Елбасы Нұрсұлтан Назарбаевтың Жарлығымен полигон 1991 жылдың 29 тамызында өз жұмысын тоқтатты. Алайда, қозғалыс мүшелері әлі де тыным табар емес. Полигон зардаптарын жоюмен айналысып отырған олар қазіргі таңда сол аймақ халқына түрлі көмектер көрсетуде.

«Бүгінгі таңда қозғалыс туы­ның астына екі миллионнан астам қазақстандық жиналған. Ұйымымыздың филиалдары Қазақстанның барлық облысында, көптеген қалаларда және әлемнің біраз елдерінде ашылған. Бүгінде филиалдарымыз көптеген Еуропа, Азия мен Америка мемлекеттерде жұмысын атқарып отыр» дейді қозғалыстың вице-президенті Сұлтан Қартоев.

Ұйым тарихына қысқаша тоқ­талсақ, осыдан ширек ғасыр бұрын 28 ақпан күні Алматыдағы Жазушылар үйінде 100 адамның қаты­суымен қозғалыстың алғашқы жиналысы өткен. Осы жерде Олжас Сүлейменов Семей полигонын жабу туралы ұсынысын енгізіп, серіктестерінен қолдау тапты. Сол жылы-ақ олар 11 ядролық сынақ пен алда жоспарланған 18 жарылысты болдыртпай тастады.

«Бүкіл әлемдегі осындай полигондар жабылмайынша біз күре­сімізді тоқтатпаймыз. Қазір ядролық сынақ­тарға мораторий жарияланса да. Екінші мақсатымыз – зардап шеккен аймақты әлеу­меттік-экономикалық жағынан сауықтыру ісінде Елбасына қолдау көрсету. Ядролық сынақ­тардан зиян көрген соңғы азамат сауықпайынша полигон та­қырыбының өзектілігі жойыл­майды» дейді тағы да Сұлтан Қартоев.

Айта кетейік, еліміздің Үкіметі анти­ядролық қозғалыстың 25 жылдығын биыл ескерусіз қал­дырмауды ұйғарды. Осының ішінде ядролық сынақ­тардан ең көп зардап шеккен Шығыс Қазақстан және Павлодар облыстарына назар аударылып отыр. Осы жылы аталмыш өңірлерде кең көлемдегі шараларды өткізу жоспарлануда.

Аманғали ҚАЛЖАНОВ

 

Пікір жазу

Почтаңыз жарияланбайды

5 × two =