انورەكسيا ءھام اش بەل قارىنداس

0 247

نەمەسە بيۋتي-يندۋستريانىڭ بۇلىكتەرى تۋرالى بىرەر ءسوز

وتكەن اپتادا استانادان سەكسەن شاقىرىمداي جەر­دەگى سابىندىدا ءبىر تاۋىپكە كورىنىپ كەلگەن­ كورشىمنىڭ قىزىق ءاڭ­گى­مەسى قۇلاعىمدى كوتەردى.

– نەسىن ايتاسىڭ، ءال­گى­ كىسىنىڭ ەمشىلىگىنىڭ داڭق­-دابىرى الىسقا كەت­­­­كەنى سون­شالىق – ءتۇۋ قى­زىل­ور­دادان دا جۇرت اعىلىپ كەپ جاتىر. ءبىر جىگىت جاس كە­لىنشەگىن ارقالاي كە­­لىپ­­تى. ءالى بۋىنى بەكى­­مە­­گەن بالا سياقتى بىلق­-سىلق، ەكى قولىنان ۇس­­­تاپ تارت­­ساڭ عانا تۇرە­گە­­لە­­دى، جەتەكتەسەڭ عانا جۇرەدى…

– سويتسە؟ – دەيمىن شەگىمدى سوزىپ.

– سويتسە، كۇيەۋىنىڭ ايتۋىنشا، الگى كەلىنشەك اشىعامىن دەپ قىلتاماق اۋرۋعا ۇرىنىپتى. قۇدايدىڭ قۇدىرەتى، تاماعىنان ءبىر كەسە سۋ دا وتپەي قالعان عوي. نە ىشسە دە، لوقسىتىپ تاستايدى. كەلگەلى بەرى جاسالعان ەم-دومنان سوڭ، ايتەۋىر، ءبىر كەسە سۋدى ىرعاپ-ىرعاپ ىشەتىندەي جاعدايعا جەتكەنى سول ەكەن.

قولدان اشىعىپ تاپقان مۇنداي اۋرۋدى انورەكسيا دەيدى.

ەرتەسىنە جۇمىسقا بەت العام. ەرتە كوكتەمنىڭ ىزعارى سەزىلەدى. بىراق كۇن ەرەكشە تامىلجىپ تۇر. توزعان قاردى توقىمداي قاعىپ، ەرىتىپ جاتىر. قۇرعاقتاۋ جەرمەن سەكىرىپ باسىپ، ايالداماعا قيق ەتىپ كەلىپ توقتاعان قىرقىنشى اۆتوبۋستىڭ ەسىگى ەندى جابىلا بەرگەندە كىرىپ ۇلگەردىم ايتەۋىر. «قانە، جولاقى بەرىپ جىبەرىڭدەر» دەگەن دەمبەلشە كوندۋكتورعا ءجۇز تەڭگەلىك سولكەبايدى ۇستاتا بەرىپ، «ە، جۇرت اراسىندا كيرەلەڭدەگەن مۇنداي جۇمىسقا مىنا قارىنداسىم سياقتى ىقشام بولساڭ جاراسادى ەكەن، ءا؟» دەدىم ىشتەي. ىلگەكتەي ەكى كوزى بوزارىڭقى، جاعىنا بىردەڭە ءىلىپ قويساڭ تۇراتىنداي-اق ارىق ەكەن قالقاتاي، ەسىكتەن كىرە بەرىستەگى تۋرنيكەت پەن الدىڭعى ورىندىقتىڭ اراسىنداعى كىشكەنە قۋىسقا ەكى ادامنىڭ ءبىرى بولىپ سىيىپ كەتتى. جاقتاۋىنا سۇيەنىپ تۇرعان. «اگراركاعا» جەتە بەرگەندە شۋ ەتە تۇستىك. قالقاتاي جەردە سۇلاپ جاتىر. تىنىسى تارىلىپ قۇلاپ قالىپتى. ار جاعىنداعىسى بەلگىلى ەندى. جەدەل جاردەم شاقىرۋ. قازىر ۇزىنسارىنىڭ كەزى عوي. ورىسشا ايتقاندا «اۆيتامينوز»…

جۇمىستان شىعىپ، تاعى اۆتوبۋسقا ءمىندىم. ەكى «تينەيدجەر» – بوزبالا مەن بويجەتكەن قاعازى شىتىر «Vogue» ءسان جۋرنالىنا ۇڭىلە قالىپتى. قاعابەرىس ءبىر قىزىق دۇنيە ەستىپ قالامىن با دەپ، كەيدە قالالىقتاردىڭ اڭگىمەسىنە قۇلاق قىزدىراتىنىم بار ەدى.

– تۋۋ، مەنىڭ مىنا انيا رۋبيك سياقتى فيگۋرام بولعانىن قالايمىن. نە ىستەسەم ەكەن، ا؟ – دەدى قىزى. بويشاڭ «بويفرەندىڭنىڭ» بۇيىم بولار دەپ ۇسىنعان اقىلى: «اشىعىپ كور!» دەگەنگە سايدى. «ە-ە-ە» دەپ ەسىركەدىك ىشتەي.

قازىر قىزدارىڭدى قويىپ، قازاقتىڭ جىگىتتەرى دە سۋدا وسكەن قامىستاي سەرەيىپ كەلە جاتقانىن بايقايمىز. ويتكەنى، الەمدىك برەندتەردى جارنامالاۋشى مودەلدەرگە ءبارىبىر ەلىكتەمەي-سولىقتاماي تۇرا المايتىن بولدىق قوي. ءتىپتى، كەيبىر ءسان جۋرنالدارى مودەلدەردىڭ تابيعي قالپىنىڭ ءوزىن فوتوشوپپەن جونقالاپ جىڭىشكە قىلىپ كورسەتەتىنى تاعى بار ەكەن. ال، قىستان كوتەرەم شىققان مالداي تەرىسىنە ءىلىنىپ تۇرعان مودەلدەر ارقىلى ءسان يندۋسترياسى، جاتتىعۋ زالدارى مەن كەشەندى ارىقتاتۋ ءدارى-دارمەگىنىڭ، مىقىن ماسساجەرلەرى مەن بۇلشىق ەتكە ارنالعان بوديفلەكس اپپاراتتارىنىڭ نارىعى ىرعىن پايداعا كەنەلىپ جاتقانىن اركەز ءىشىمىز سەزە بەرمەيدى.

جىل باسىندا يزرايل كنەسسەتى تىم ارىق-تۇرىق مودەل قىز-جىگىتتەرگە بۇقارالىق اقپارات قۇرالدارى ارقىلى تاۋار جارنامالاۋعا تىيىم سالاتىن زاڭ قابىلدادى.

اعىلشىنداردىڭ جارناما ستاندارتى كوميتەتى مۇندايدى كورسەتۋ – الەۋمەتتىك جاۋاپكەرشىلىككە جاتپايدى دەگەن شەشىم شىعاردى. ەندەشە، اس-سۋ ىشپەي كۇيلى جۇرەمىن دەپ كۇپىرلىك قىلماي، بەرگەن ىرزىقتان باس تارتپاي، سونى بويعا سىڭىرەتىندەي قيمىل-قارەكەت قىلعان دۇرىسىراق ەمەس پە؟

ۇيات تا بولسا ايتايىق، باياعىدا ءبىزدىڭ كۋرستاعى ءبىر قىزدىڭ قۇربىلارى بۇرىنعىسىنان ءسال تولىسقانىن بەتىنە باسا بەرسە كەرەك، الگى بايعۇس شىج-بىج بوپ ديەتولوگقا ءبىر بارادى، ينتەرنەت اقتارىپ، كەڭەس قازادى، ءسويتىپ ابدەن شارشاعاسىن ويلاي-ويلاي كەلىپ تاپقان تويتارماسى مىناۋ ەكەن: «ەركەك دەگەن يت ەمەس، سۇيەك ءمۇجيتىن». سول سەكىلدى انورەكسيا دا اقىلدىڭ كەمدىگىنەن تاپقان اۋرۋ دەسەك، ارتىق ايتقاندىعىمىز بولماس.

ادىلبەك جاپاق،
adikezh87@gmail.com

پىكىر جازۋ

پوچتاڭىز جاريالانبايدى

fifteen + 4 =