ءان جۇيرىگى – ءبىرجان سال

0 364

«استانا» كونتسەرت زالىندا اقىن، حالىق كومپوزيتورى ءبىرجان سال قوجاعۇلۇلىنىڭ تۋعانىنا 185 جىل تولۋىنا ارنالعان «ءان جۇيرىگى – ءبىرجان سال» اتتى كەش ءوتتى. ەلوردالىق فيلارمونيا ونەرپازدارى «ءۇش جۇزگە اتى شىققان» ءدۇلدۇلدىڭ اسەم اندەرىن اۋەلەتتى.

كەشتىڭ ءبىر ەرەكشەلىگى – ءبىرجان سال شىعارمالارى بىرنەشە باعىتتا شىرقالدى. قازاق وركەسترىنىڭ سۇيەمەلدەۋىمەن ايتىلعان اندەر، كامەرالىق حور جانە جەكە سوليستەر سالعان تۋىندىلار كونتسەرتتىڭ مازمۇنىن بايىتتى.
«بازارىڭ قۇتتى بولسىن، ارداقتى ەلىم» دەپ اسقاق باستالاتىن «ايتباي» انىمەن اشىلعان كەش ءبىرجاننىڭ وسى سياقتى شوقتىعى بيىك تۋىندىلارىمەن جالعاستى. «سىرعاقتى»، «ايبوزىم»، «ون ساۋساق»، «ءلايلىم شىراق»، «جالعىز ارشا»، «جانبوتا»، «كوكەك»، «بۋرىلتاي»، «تەمىرتاس»، ت.ب. بيىك اندەر بىرىنەن سوڭ ءبىرى اۋەلەپ، كورەرمەندەردىڭ جان سارايىن اشتى.
مادەنيەت سالاسىنىڭ ۇزدىگى نۇراي تاناباەۆ، مادەنيەت قايراتكەرى سەكەن سىزدىق، قازاقستاننىڭ ەڭبەك سىڭىرگەن قايراتكەرى گۇلزيرا بوكەيحانقىزى، حالىقارالىق جانە رەسپۋبليكالىق بايقاۋلاردىڭ لاۋ­رەاتتارى ارايلىم راقىمقىزى، جاقسىگەلدى ماياساروۆ، جازگۇل داڭىلباەۆا ارقالانا ءان سالدى.
مۇقان تولەباەۆتىڭ «ءبىرجان-سارا» وپەراسىنىڭ قويىلعانىنا جەتپىس جىلدان استى. سودان بەرى تۋىندى ساحنادان تۇسپەي كەلەدى. وسى كەشتە دە سودان ءۇزىندى كورسەتىلدى. ءبىرجان بەينەسىن فيلارمونيا ءسوليسى دانيار مۇقان، سارانى قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق اسەرلى سومداپ شىقتى.

پىكىر جازۋ

پوچتاڭىز جاريالانبايدى