العىس ايتىلىپ، قاتار كوبەيدى

0 106

«نۇر وتان» حالىقتىق دەموكراتيالىق پارتياسىنىڭ قۇرىلعانىنا 14 جىل تولدى. كەشە وسى ايتۋلى داتاعا وراي پارتيانىڭ استانا قالالىق فيليالىندا سالتاناتتى جيىن ءوتتى.

«نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ سالتاناتتى جيىندا باس قوسقان ارىپتەستەرىن پارتيا كۇنىمەن قۇتتىقتاپ، ەلوردالىق پارتيا ۇيىمى مەملەكەت باسشىسى، «نۇر وتان» حالىقتىق دەموكراتيالىق پارتياسىنىڭ توراعاسى نۇرسۇلتان نازارباەۆتىڭ جەتەكشىلىگىمەن جۇرگىزىلىپ جاتقان رەفورمالاردىڭ قولداۋشىسى بولا بەرەتىنىن اتاپ ءوتتى. ەلىمىزدىڭ قوعامدىق-ساياسي ارەناسىندا جەتەكشى ورىنعا يە بولعان پارتيا باستاماسىمەن اتقارىلعان ءتۇرلى شارالارعا بەلسەندىلىكپەن قاتىسقان استانالىقتارعا العىس ايتتى.

بۇگىنگى تاڭدا «نۇر وتان» حدپ استانا قالالىق فيليالى اياسىندا 314 باستاۋىش پارتيا ۇيىمى جۇمىس ىستەيدى. ولاردىڭ قاتارىندا 38 مىڭنان استام پارتيا مۇشەسى بار. پارتيا مۇشەلەرى ءار ۇلتتىڭ وكىلدەرىنەن، ءتۇرلى ماماندىق يەلەرىنەن قۇرالعان.

سالتاناتتى جيىن بارىسىندا بىرقاتار قوعامعا ەڭبەگى سىڭگەن ازاماتتار پارتيا قاتارىنا قابىلداندى. اتاپ ايتقاندا، قازاقستاننىڭ ەڭبەك سىڭىرگەن قايراتكەرى، كومپوزيتور كەڭەس دۇيسەكەەۆ، بەلگىلى وپەرا ءانشىسى قورلان قاليلومبەكوۆا، استانا قالاسى تۇرعىن ءۇي ينسپەكتسياسى باسقارماسىنىڭ باستىعى تالعات رىسبەكوۆ، الماتى اۋدانىنىڭ اكىمى پاۆەل كۋلاگين جانە باسقالارى بولدى. سونىمەن قاتار ءبىر توپ پارتيا بەلسەندىلەرىنە «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەك پەن استانا قالالىق فيليالىنىڭ توراعاسى ي.تاسماعامبەتوۆتىڭ اتىنان «العىس حاتتار»  تابىس ەتىلدى.

وسى جيىنعا قاتىسقان قر پارلامەنتى سەناتىنىڭ دەپۋتاتى، استانا قالاسىنىڭ قۇرمەتتى ازاماتى ۆلاديمير رەدكوكاشين ەلوردالىق ارىپتەستەرىن پارتيانىڭ قۇرىلعان كۇنىمەن قۇتتىقتاپ، ەلىمىزدىڭ الەۋمەتتىك-ەكونوميكالىق دامۋىنداعى كورسەتكىشتەر تۋرالى، ونىڭ ىشىندە ەلوردامىزدىڭ جەتىستىكتەرىن بايانداپ، وسى ورايدا «نۇر وتان» حالىقتىق دەموكراتيالىق پارتياسىنىڭ اتقارىپ وتىرعان بەلسەندى ءرولىن اتاپ ءوتتى.

                                                                                     عالىم قوجابەكوۆ

پىكىر جازۋ

پوچتاڭىز جاريالانبايدى

14 − ten =