الەۋمەتتىك بەيىمدەۋ الەۋەتى

ەلوردا ءماسليحاتىندا وتكەن كەزەكتى دەپۋتات كۇنى بارىسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى الما التىباەۆا حالىقتىڭ الەۋمەتتىك ءالسىز توپتارىنىڭ پروبلەمالارىنا توقتالدى.

مۇگەدەكتەردى الەۋمەتتىك بەيىمدەۋ – باسقارما جۇمىسىنىڭ ماڭىزدى اسپەكتىلەرىنىڭ ءبىرى. مۇمكىندىكتەرى شەكتەۋلى كوپتەگەن ادامدار جاقسى ءومىر ءسۇرۋ ماقساتىندا ەلورداعا كوشىپ كەلەدى. الما التىباەۆانىڭ ايتۋىنشا، 2008 جىلى استانا قالاسىنا تۇراقتى تۇرۋعا 427 مۇگەدەك كوشىپ كەلسە، 2010 جىلى  1795, 2013 جىلى 826 ادام قونىستانعان. سونداي-اق، ەرەسەك ادامدار اراسىندا ەندوكريندى، سۇيەك-بۇلشىق ەت جۇيەسى، تۋبەركۋلەز اۋرۋلارى بويىنشا مۇگەدەكتىككە شىعۋ كورسەتكىشى ارتقان.

«قالانىڭ مەديتسينالىق ۇيىم­دارىندا 6 930 ەرەسەك مۇگەدەك ەسەپتە تۇر. ناۋقاستاردى ەرتەرەك ەمدەۋ ءۇشىن تاۋلىك بويعى ستاتسيونارلاردا 59 ورىن بار. ەرەسەك سىرقاتتاردى ەرتەرەك وڭالتۋ رەسپۋبليكالىق ەمحانالاردا دا جۇرگىزىلەدى. تىنىس الۋ-وكپە جۇيەسى اۋرۋلارىنا شالدىققاندار سانيتارلىق-كۋرورتتىق ەم الادى. باسقا اۋرۋ تۇرلەرىمەن اۋىراتىن ناۋقاستاردى وڭالتۋ العاشقى مەديتسينا-سانيتارلىق كومەك جانە ستاتسيونارلاردىڭ پروفيلدىك بولىمشەلەرىندە جۇرگىزىلەدى» دەدى باسقارما باسشىسى.

جەرگىلىكتى بيۋدجەت قاراجاتى ەسەبىنەن مۇگەدەكتەردى الەۋمەتتىك وڭالتۋدىڭ بىرنەشە شارالارى قا­راستىرىلعان. ماسەلەن، ولارعا پروتەز-ورتوپەديالىق كومەك كور­سەتۋ، سۋردوقۇرالدارمەن جانە سۋر­دوكومەكپەن، اربامەن قام­تا­ماسىز ەتۋ، مۇگەدەك بالالارى بار وتباسىلارعا الەۋمەتتىك كومەك كورسەتۋ، سانيتارلىق-كۋرورتتىق ەمدەۋ، ءتىستى پروتەزدەۋ، قالالىق قوعامدىق كولىكتەگى جول ءجۇرۋ جانە ت.ب. بارلىق ساناتتاعى مۇگەدەكتەر كەپىلدىكتى مەديتسينالىق كومەك اياسىندا تولىق دياگنوستيكالىق تەكسەرىلۋدەن اقىسىز وتۋگە قۇقىلى. سونداي-اق، ولار ءدارى-دارمەكتەردى دە تەگىن الادى.

مۇمكىندىكتەرى شەكتەۋلى ادامداردى وڭالتۋ ماسەلەلەرىندە قوعام­دىق بىرلەستىكتەر ماڭىزدى ءرول اتقاراتىنىن ايتا كەلە، الما التى­باەۆا ارنايى الەۋمەتتىك قىز­مەتتەردى كورسەتۋدىڭ جاڭا جۇيەسىن ەنگىزۋ مەملەكەتتىك تاپسىرىس اياسىندا ۇكىمەتتىك ەمەس ۇيىمدارمەن جۇمىستى جانداندىرۋعا مۇمكىندىك بەرگەنىن جانە مۇگەدەكتەردى جۇمىسقا ورنالاستىرۋ ماسەلەسىنىڭ بارىنشا وزەكتى بولىپ تۇرعاندىعىن جەتكىزدى.

قوعامدا ورىن الىپ وتىرعان پروبلەمالاردى، ونىڭ ىشىندە مۇگە­دەكتەردى جۇمىسقا ورنالاستىرۋعا قاتىستى كەلەلى ماسەلەنى شەشۋدە ءوز ويلارىن ايتا كەلە، حالىق قالاۋ­لىلارى مۇمكىندىكتەرى شەكتەۋلى ادامداردى جۇمىسقا ورنالاستىرۋ ماسەلەسىن رەتتەيتىن زاڭنامانىڭ جەتىلدىرىلمەگەنىن جانە الداعى ۋا­قىتتا وڭدەۋ قاجەتتىگىن العا تارتتى.