الەم ساحنالارىنا ءسان بەرگەن

0 31

«استانا وپەرانىڭ» جەتەكشى ءسوليسى، قازاقستاننىڭ ەڭبەك سىڭىرگەن قايراتكەرى، كوپتەگەن حالىق­ارالىق بالەت بايقاۋىنىڭ گران-پري يەگەرى باقتيار ادامجان الەم ساحنالارىن باعىندىرۋدا.

قازاقستاندىق جۇلدىزدىڭ بالەتتىك ماۋسىمى تامىز ايىندا يتاليادا باستالدى، وندا ول «روبەرتو بوللە جانە ونىڭ دوستارى» اتاقتى گالا-كونتسەرتىندە ونەر كورسەتتى. ال قىركۇيەكتىڭ 14, 15, 16 كۇندەرى باقتيار ادامجان ريم وپەراسى تەاترىنىڭ عالامات پرەمەراسى – ايگىلى حورەوگراف رولان پەتيدىڭ «پاريج قۇداي اناسىنىڭ سوبورى» بالەتىندە كۆازيمودو پارتياسىن كەرەمەت ورىندادى. ءارتىسىمىزدىڭ ونەرىن رەسەي، يامايكا جانە اۆستراليا ەلدەرى اسىعا كۇتۋدە.
تانىمال ءبيشى تالعامپاز كورەرمەندەردىڭ، سىنشىلار مەن ءباسپاسوزدىڭ نازارىن وزىنە اۋدارۋدا. «كەش شىمىلدىعى ريككاردو دريگونىڭ مۋزىكاسىنا جازىلعان ماريۋس پەتيپانىڭ حورەوگرافياسىنداعى «كورسارمەن» اشىلدى، ساحنادا – تاڭعاجايىپ باقتيار ادامجان. ول ءوزىنىڭ جىلدام قيمىلدارىمەن، ۇساق تەحنيكاسىمەن ءارى ۇيلەسىمدى قوزعالىسىمەن بىرگە كەڭ ادىممەن قالىقتاي تۇسكەن سەكىرۋلەرىمەن كورەرمەن نارازىن جاۋلاپ الدى…» دەپ جازدى La Voce di New York ينتەرنەت-گازەتىنە امەريكالىق ءتىلشى ماريا- تەرەزا انتونيوتستسي.
2 جانە 3 تامىز كۇندەرى ب.ادامجان 15 000 كورەرمەنگە شاقتالعان اتاقتى ارەنا دي ۆەرونا ساحناسىندا يتاليالىق فەستيۆال اياسىندا «جۇلدىز­دار اپتاسىن» تامامداعان «روبەرتو بوللە جانە ونىڭ دوستارى» اتتى ەكى گالا-كونتسەرتتە ونەر كورسەتتى.
– بۇل گالا- بالەتتە ونەر كورسەتۋگە اركىمدى شاقىرا بەرمەيدى. ونداعى بالەت شوۋىنا قاتىسۋ ءۇشىن ءاردايىم تىنباي ەڭبەك ەتەمىن. مەنى گالا-بالەتتىڭ تەحنيكالىق، جارقىن جاعىن كورسەتۋ ءۇشىن شاقىرادى، ماعان كۇردەلى كلاسسيكالىق پا-دە-دەلەردى ۇسىندى. مەن سۇرانىسقا يە الەمنىڭ ەكى جۇلدىزى – ۆەنا وپەراسىنىڭ پريما-بالەريناسى ليۋدميلا كونوۆالوۆا جانە نيدەرلاندى ۇلتتىق بالەتىنىڭ پريما-بالەريناسى مايا ماحاتەليمەن بىرگە ونەر كورسەتتىم. وسىنداي تانىمال بالەرينالارعا ساحنادا سەرىك بولۋدى سەنىپ تاپسىرعاندارى مەنى قۋانتادى. روبەرتو بوللە – ۇلكەن كاسىپقوي، ارتىستەردى ءوزى ىرىكتەيدى، ەگەر ءبىر رەت ونەر كورسەتۋىڭ ناشار بولسا، ول ەندى قايتىپ سەنى شاقىرمايدى. سەبەبى مىڭداعان اۋديتوريامەن جۇمىس جۇرگىزىلەدى، ول قاشان دا انشلاگپەن وتەتىن تولى زالداردى جينايدى، – دەپ اڭگىمەلەدى باقتيار ادامجان.
ب.ادامجاننىڭ instagram پاراقشاسىنا جازىلعانداردىڭ جالپى سانى – 19 مىڭ ادام، ونىڭ 5 مىڭى – يتاليالىق­تار. ولاردىڭ بارلىعى ءتۇرلى پىكىرلەر قالدىرىپ، سان الۋان سۇراقتار قويادى. «ونىڭ ونەرىن قاي قالادان جانە قاي ەلدەن تاماشالاۋعا بولادى؟» دەگەن پىكىر كوپ جازىلادى. ءارتىستىڭ جۇمىس كەستەسى ءبىر جىل العا جوسپارلانعان، بىراق ونداعى باستى ەل – قازاقستان بولىپ قالا بەرمەك.
– قازان ايىندا مەن اندريس ليەپانىڭ شاقىرتۋىمەن كرەمل سارايىنىڭ ساحناسىندا ونەر كورسەتۋدى جوسپارلاپ وتىرمىن. مەنى 16 جەلتوقسان كۇنى يامايكادا ونەر كورسەتۋگە شاقىردى، بىراق ءالى جاۋابىمدى بەرگەن جوقپىن، سەبەبى بيىل قازاقستان تاۋەلسىزدىگىنە 30 جىل تولاتىندىقتان، بۇل كۇندى ءوز وتانىمدا اتاپ وتكىم كەلەدى. قاڭتاردا The Ballet International Gala جوباسىنا قاتىسۋ ءۇشىن اۆسترالياعا بارامىن. كونتسەرتكە اۆستراليانىڭ مەملەكەت باسشىسى كوڭىل بولگەن، ونىڭ تاپسىرماسى بويىنشا الەمدىك تەاترلار گاسترولدىك ساپارمەن ونەر كورسەتەتىن ۇزدىك الاڭ جاساقتالعان. سەرىكتەس رەتىندە ونەر كورسەتۋ ءۇشىن ترۋپپامىزدىڭ ءبيشىسى شۇعىلا ادەپحانعا ۇسىنىس جاسادىم. مۇمكىندىگىنشە، قازاقستاندىق بالەتتىڭ جوعارى دەڭگەيىن پاش ەتۋ ءۇشىن ءوزىمىزدىڭ بالەرينالارىمىز­بەن ىنتىماقتاس بولۋعا تىرىسامىن، – دەپ قورىتىندىلادى باقتيار ادامجان.

كوكتەم قارقىن

پىكىر جازۋ

پوچتاڭىز جاريالانبايدى

6 + five =