الاشتانۋشى اكادەميك ارداقتالدى

0 163

استاناداعى ۇلتتىق اكادەميالىق كىتاپ­حانادا الاش پارتياسى مەن الاش وردا ۇكىمەتىنىڭ 100 جىلدىعىنا ارنالعان «كەڭەس نۇرپەيىسۇلىنىڭ الاش تاريحىنا قوسقان ۇلەسى» اتتى عىلىمي-تاجىريبەلىك كونفەرەنتسيا ءوتتى.

كونفەرەنتسياعا ءادىل احمەتوۆ، بولات كومەكوۆ، عاريفوللا ەسىم، كامال بۇرحانوۆ، بۇركىتباي اياعان، شەرۋباي قۇرمانبايۇلى سەكىلدى ەلگە تانىمال عالىمدار قاتىستى.  تالانتتى تۇلعانىڭ وتاندىق تاريح عىلىمىنداعى ورنى ەرەكشە. ول ۇزاق جىلدار بويى قازاقستان ۇلتتىق عىلىم اكادەمياسىنىڭ تاريح جونە ەتنولوگيا ينس­تيتۋتىندا قىزمەت ىستەدى. قاتارداعى كىشى عىلىمي قىزمەتكەردەن اكادەميككە دەيىنگى جولدان ءوتتى.

6667

اسىرەسە، عيبراتتى عالىمنىڭ الاش قوزعالىسى تاريحى جونىندە جازعان ەڭبەكتەرىن دارالاپ ايتۋعا بولادى. حح عاسىردىڭ باسىنداعى حالقىمىز باستان كەشكەن وقيعالارعا جاڭاشا وي جىبەرىپ، كۇردەلى ءداۋىردىڭ تەرەڭىنە ءۇڭىلدى. سول زاماندا عۇمىر كەشىپ، وتارلىق جۇيەگە قارسى شىققان الاش ازاماتتارىن اقتاۋدا قىزىل ۇكىمەتتىڭ قۋعىن-سۇرگىن ساياساتىن ارحيۆتىك دەرەكتەرمەن زەردەلەدى. سونىڭ ءبارى «الاش ءھام الاشوردا» اتتى كىتابىندا پاراساتتى دايەكتەلگەن. بۇل كەيىنگى الاشتانۋشىلارعا باعدار بولاتىن قۇندى دۇنيە دەپ سانايمىز.

جاس بۋىنعا ارناپ الاش پارتياسىنىڭ ساياسي ءمانى مەن مازمۇنى جايىندا سالماقتى ەڭبەكتەر جازدى. ونىڭ 20-دان اسا مونوگرافياسى مەن 600-گە جۋىق عىلىمي-زەرتتەۋ ماقالاسى جارىق كوردى.1982 جىلى قازاقستان تاريحىنىڭ 5 تومدىق ۇجىمدىق جيناعىن شىعارۋداعى ەڭبەگى ءۇشىن مەملەكەتتىك سىيلىقتىڭ لاۋرەاتى اتاندى. ول كىسى قاتارداعى عالىم بولىپ عانا قالماي، ءوزىنىڭ عىلىمي مەكتەبىن قالىپتاس­تىرعان ۇلاعاتتى ۇستاز. ول 10-نان اسا عىلىم دوكتورى مەن 40-قا جۋىق عىلىم كانديداتىن تاربيەلەدى. بۇگىندە ولاردىڭ ءبارى دە تاريح عىلىمىنىڭ الدىڭعى ساپىندا كەلەدى.

تاعىلىمعا تولى شارا بارىسىندا اكادەميككە ارنالعان «عىلىم» زالى اشىلدى. ونىڭ لەنتاسىن بەلگىلى عالىمدار ءادىل احمەتوۆ، بولات كومەكوۆ، عاريفوللا ەسىم قيدى. سونىمەن بىرگە اسىل ازاماتتىڭ ۇرپاقتارى كىتاپحاناعا عالىمنىڭ 3700-گە تارتا كىتابى مەن جەكە مۇراعاتىنداعى زاتتارىن تابىس ەتتى. تەكتىنىڭ تۇياعى، عالىم تالدىبەك نۇرپەيىس اكەسىنىڭ ءومىر جولى جايىندا ساليقالى وي ساباقتادى.

ازامات ەسەنجول

پىكىر جازۋ

پوچتاڭىز جاريالانبايدى

three × four =