البيوننان الماتتىڭ الماعى بار

0 120

ەندى ءبىر ايدان كەيىن لوندوندا جازعى وليمپيادا ويىندارىنىڭ جالاۋى جەلبىرەيدى. الەمدەگى ەڭ ۇزدىك سايىپقىراندارى سايىسقا تۇسەدى. ءتورت جىلدا ءبىر رەت وتەتىن ءدۇبىرلى دوداعا قازاقستان سپورتشىلارى دا قىزۋ دايىندالىپ جاتىر.

ەل نامىسىن قورعايتىن ۇلتتىق قۇرامانىڭ ساپىندا ەلوردالىق سپورتشىلار دا بار. سونىڭ ءبىرى – گرەك-ريم كۇرەسىنىڭ شەبەرى، استانالىق المات كەبىسباەۆ. مەكتەپ قابىرعاسىن اتتاعان ساتتەن بوز كىلەمگە اربالعان دارىندى بالا 2001 جىلى استانا قالاسىنداعى قاجىمۇقان اتىنداعى رەسپۋبليكالىق سپورت مەكتەپ-ينتەرناتىنا قابىلدانادى. باپكەرى مەيىرحان راحمەتوۆ ءوز شاكىرتىنىڭ تابيعي تالانتى مەن ەڭبەكقورلىعىنا زور سەنىممەن قاراپ، ەرىنبەي جاتتىعا بەرسە، الەمدىك جارىستاردا ەل نامىسىن قورعايتىن بالۋان بولىپ وسەتىنىنە ۇمىتپەن قارايتىن ەدى.

بىلىكتى باپكەردىڭ ءۇمىتى دە، سەنىمى دە الدانعان جوق. المات كەبىسباەۆ جاسوسپىرىمدەر مەن جاستار اراسىنداعى قازاقستان چەمپيوناتىندا بىرنەشە رەت قاتارىنان جەڭىمپاز اتانىپ، ءوزىنىڭ ۇلتتىق قۇراماعا دا لايىقتى سپورتشى ەكەنىن دالەلدەي ءتۇستى. سوڭعى ءۇش-ءتورت جىلدا ءوز سالماعىندا قارسىلاس شاق كەلتىرمەيتىندەي بولدى.

2009 جىلى ازيا چەمپيوناتىندا كۇمىس مەدال السا، 2011 جىلعى قۇرلىق بىرىنشىلىگىندە التىن جۇلدەگەر اتاندى. كىشى الەم چەمپيوناتىنا بالاناتىن يۆان پوددۋبنىيدىڭ گران-پري تۋرنيرىندە جەڭىمپاز بولىپ، قازاق كۇرەسىنىڭ الەۋەتىن الەمگە تاعى ءبىر دالەلدەپ كورسەتكەنى ەسىمىزدە. ودان كەيىن تۇڭعىش رەت ەرەسەكتەر اراسىنداعى الەم چەمپيوناتىندا باعىن سىناپ، قولا جۇلدەمەن ورالدى. 2011 جىل المات ءۇشىن ەڭ سىندارلى جىل بولعانى انىق. ولاي دەيتىنىمىز، بارلىق سپورت تۇرلەرى بويىنشا لوندون وليمپياداسىنا ىرىكتەۋ جارىستارى ءوتىپ، ناعىز مىقتىلار ءوز ەلدەرىنىڭ نامىسىن قورعاۋ باقىتىنا يە بولىپ جاتتى.

وسىنداي شەشۋشى جارىس استانالىق المات كەبىسباەۆ ءۇشىن تۇركيادا وتكەن الەم چەمپيوناتى بولدى. الەمنىڭ كىل مىقتىلارى كۇش سىناسقان چەمپيوناتقا استانالىق ەرەكشە دايىندالىپ كەلگەنى ايقىن ەدى. ول فينالعا دەيىنگى ءتورت قارسىلاسىن بەت قاراتپاي ۇتتى. الايدا ەڭ سوڭعى بەلدەسۋدە يران بالۋانى وميد ناۋرۋزيگە جول بەرىپ قويدى.

ءسويتىپ، المات ەكى رەت قاتارىنان الەم چەمپيوناتىنىڭ جۇلدەگەرى اتاندى. ال ستامبۇلدا وتكەن جارىستىڭ قورىتىندىسىندا المات كەبىسباەۆ لوندون وليمپياداسىنا ليتسەنزيا الدى.

الماتتىڭ لوندونداعى بەلدەسۋى 6 تامىز كۇنى وتەتىن بولادى. وسى كۇن استانالىق بالۋان ءۇشىن ءساتتى بولۋىن تىلەپ، قازاقستان تۋى جۇلدەگەرلەر قاتارىنان كورىنەدى دەپ ۇمىتپەن قارايمىز.

عالىم قوجابەكوۆ

پىكىر جازۋ

پوچتاڭىز جاريالانبايدى

4 + nineteen =