ادەمى ءازىل الەمى

0 336

IMG_9492

كونگرەسس-حولل كورەرمەنگە لىق تولى. ءبارى دە ءبىر قىزىقتىڭ بولارىن كۇتىپ وتىر. ساحنانىڭ ار جاعىنان داۋىس ەستىلدى: «قۇرمەتتى كورەرمەندەر، ۇيالى تەلەفوندارىڭىزدى دىبىسسىز رەجيمگە قويۋدى سۇرايمىز. ءبىز كونتسەرتىمىزدى باستايمىز. باستايمىز… باستايمىز… قازىر، باستايمىز. مىنە، باستايمىز. باستايىق پا؟». «ءيا، باستايىق» دەپ كورەرمەندەر الدەقايدان شىققان داۋىس­پەن سويلەسىپ تە قويادى، جۇزدەرى جايدارى، الاقاندارىن اياماي سوعىپ، شاپالاقتاپ جاتىر. وسىلايشا زور قوشەمەتپەن ساحناعا حالىقتىڭ سۇيىكتىسى تۇرسىنبەك قاباتوۆ شىعىپ، استانا قالاسى كوڭىلدى تاپقىرلار تەاترىنىڭ «ءازىل الەمى» اتتى شوۋ كونتسەرتى باستالدى.

 

«بيلەتتەرىڭىزدە «ەسترادا جۇلدىزدارىنىڭ قاتىسۋىمەن» دەپ جازىلعان. ۋادە ەتكەنىمىزدەي، ەسترادا جۇلدىزدارى ونەر كورسەتەدى، بىراق بۇل كەشتىڭ باستى جاڭالىعى – تەاترىمىزدىڭ اك­تەرلەرى كاسىبي بيشىلەرمەن جۇپتاسىپ بيلەيدى، ال ءبيدىڭ جەڭىمپازىن سىزدەر انىقتايسىزدار» دەپ، تۇرسىنبەك جينالعان كوپشىلىكتى «شاپالاق مەتر» ولشەۋ قۇرالىمەن تانىستىردى. ەكراندا بەينەلەنگەن ول ولشەۋىش كورەرمەن شاپالاعىن 50 مەن 100 ۇپاي اراسىندا تىركەيدى ەكەن. تەاتر ارتىستەرى – قايرات ادىلگەرەيۇلى، قانات ءالجاپ­پاروۆ، باقىتجان قاسىموۆ، ەربولات تولەگەنوۆ، امانعالي سىپابەكوۆ «ناز» مەملەكەتتىك بي تەاترى مەن كابارە شوۋ «Viva» بيشىلەرىمەن ساحناعا شىعىپ، بيگە دەگەن يكەمدەرىن دە بايقاتتى. الايدا، قانات ءالجاپپاروۆتى بيلەتۋ وڭايعا سوقپاپتى. ونىڭ دايىندىعىن ارنايى تۇسىرىلگەن ۆيدەوروليكتەن كورگەن جۇرت ءىشىن تارتىپ كۇلدى، دەسە دە، بيىنە ابدەن ريزا بولعان ولار قازىلىق ەتەردە شاپالاقتارىن ايامادى. ايتقانداي-اق، ەسترادا جۇلدىزدارى دا ساحنانىڭ ءسانىن كەلتىرىپ، اۋەلەتە ءان شىرقادى. IMG_9556باۋىرجان يساەۆ ءانىن ورىنداپ بولعان سوڭ، تۇرسىنبەك «سەنى مىقتى ۆوكاليست دەيدى عوي، ءبارىمىزدى تاڭعالدىرىپ، ءان ورىنداشى» دەپ قولقا سالدى. «كوپتەگەن انشىلەر فونوگراممامەن ايتادى» دەگەن وي ابدەن سانامىزعا ءسىڭىپ كەتكەنى جاسىرىن ەمەس. باۋىرجاننىڭ ەش مۋزىكانىڭ سۇيەمەلدەۋىنسىز شىعاتىن داۋىسىن ەستۋگە قۇمار بولدىق. ول ەكى ويلانباستان، اتاقتى «O sole Mio» ءانىن كەڭ داۋىسپەن ورىنداعان كەزدە تالانتىنا تامسانا وتىرىپ، ءاندى ۇيىپ تىڭدادىق. سونداي-اق، تامارا اسار، مەيرامبەك بەسباەۆ، «كاسپي» توبى، اسىلبەك ەڭسەپوۆ ونەرلەرىمەن حالىقتى ءتانتى ەتىپ، بارشانى الداعى تاۋەلسىزدىك مەيرامىمەن قۇتتىقتاپ، اق تىلەكتەرىن ايتتى. اۋديتوريامەن بايلانىس تا قالىس قالمادى. اجە بەينەسىندەگى ەربولات تولەگەنوۆ زالدان ءۇش جىگىتتى شىعارىپ، «پەنسيا كىمگە بۇيىرادى؟» دەگەن باعدارلاما جۇرگىزدى. بارلىق سۇراققا جاۋاپ بەرگەن كەنجە بالا اجەنىڭ قولىنان 4000 تەڭگە الىپ، ءبىر بايىپ قالعان جايى بار.

«شاپالاق مەتر» كورسەتكەن ناتيجە بويىنشا ءۇشىنشى ورىننان باقىتجان قاسىموۆ پەن قانات ءالجاپپاروۆ، ال ەكىنشى ورىن تۇعىرىنان ەربولات تولەگەنوۆ كورىندى. بارىنەن وزا شاۋىپ، امانعالي سىپابەكوۆ 98 ۇپايمەن العا شىقتى. ەندى ولار ناۋرىزعا جوسپارلانعان «ءازىل الەمىنىڭ» كەزەكتى كونتسەرتىندە فينالدا ءبىرىنشى ورىن ءۇشىن باق سىناساتىن بولادى. تۇرسىنبەك جەڭىمپازدى ارنايى سىيلىق كۇتەتىندىگىن ايتىپ، ۇلكەن قىزىقتىڭ شەتىن شىعارىپ، حالىقتى ەلىكتىرىپ قويدى.

«ءازىل الەمىنىڭ» ازىلدەرى ادەتتەگىدەي وتە ءوتىمدى، قىزىق، كۇلكىلى بولدى. ەڭ باستىسى، استارىندا ۇلكەن ماعىنا سايراپ جاتىر. ءار قالجىڭنىڭ ايتار ويى، ارقالار جۇگى اجەپتاۋىر. اباي ايتقان «وسەك، وتىرىك، ماقتانشاق، ەرىنشەك، بەكەر مال شاشپاق» تاقىرىبى، قوعامداعى ءتۇرلى جايتتار، ومىردەگى نەبىر قىزىقتار كەڭىنەن قوزعالدى. تەاتردىڭ ءتىلى ءتاتتى، ماعىناسى ۋىتتى ساتيراسى حالىققا ءتۇرلى وي سالماۋى مۇمكىن ەمەس. ادەيى باقىلادىم. ساحنادا مىسال ەتىپ كورسەتىلگەن ءار وبرازعا بىرەۋلەرى كۇلسە، بىرەۋلەرى «ءيا، راس قوي، سولاي عوي» دەپ ماقۇلداپ، ەندى بىرەۋلەرى ۇندەمەي عانا ويعا شومىپ وتىردى. ياعني، بۇل ارسىز كۇلكى ەمەس، كۇلۋىن كۇلىپ الىپ، ارتىنان ويلاندىرىپ تاستايتىن ماعىنالى كۇلكى بولسا كەرەك. ءتىپتى، «بازار جوق» دەگەن اتاۋ «ءازىل الەمى» بولىپ وزگەرسە دە، بۇل تەاتر ءوز كو­رەرمەندەرىن كوبەيتپەسە، جوعالتپاعانى انىق.

ءمادينا جاقىپ

 

پىكىر جازۋ

پوچتاڭىز جاريالانبايدى

17 + twenty =