15 мыңнан аса жұмыс орны ашылды

0 41

Елордада «Жұмыспен қамтудың жол картасы» бағдарламасы аясында жаңа жұмыс орындарын құру жоспары артығымен орындалды. 15 253 бос жұмыс орнын ашу жоспарланып, 15 607 жұмыс орны құрылды, оның ішінде 7 926 адам жұмыспен қамту орталығы арқылы жұмысқа орналастырылды.

– Елорда тұрғындары түрлі саладағы құрылыспен байланысты 151 инфрақұрылымдық жобалар бойынша жұмысқа тартылды. Жұмыспен қамтудың жол картасы бойынша ең көп сұранысқа ие жұмыс орындары – барлық санаттағы электриктер, дәнекерлеушілер, слесарьлар, жүргізушілер. Қазіргі уақытта 45 жоба бойынша жұмыс аяқталды. Осы жобаларды іске асырған мердігерлер 1469 адамды тұрақты жұмыспен қамтыды, – деп хабарлады елордалық Жұмыспен қамту орталығы.
Елордада Жұмыспен қамту жол картасы бойынша жұмысқа қабылдау сәуір айында басталды, өйткені енгізілген төтенше жағдай мен карантинге байланысты көптеген ұйымдар жұмысын уақытша тоқтатты. Осы кезеңде жұмыспен қамту орталығы онлайн режимінде жұмыс істеді. Жұмыссыз азаматтар өздерінің тілектерін ескере отырып, жұмыспен қамту орталығына тіркелді. Үміткерлер сәйкес келетін бос жұмыс орындарын таңдады, содан кейін олар жұмыс берушілермен кездесулерге жіберілді.
– Екі апта сайын тікелей эфирде бос орындар жәрмеңкелері, жұмыс берушілермен ZOOM арқылы дөңгелек үстелдер өткізілді. Жұмыссыз қалған көптеген азаматтар осындай іс-шаралардың арқасында жаңа жұмыс орындарын тауып, мемлекеттің қолдауын сезінді. Жұмыс сипатына және бағдарламаға байланысты қатысушылар 85000 – 250 000 теңге көлемінде жалақы алады, – деп атап өтті Жұмыспен қамту орталығының өкілі.
«Жұмыспен қамтудың жол картасы» мемлекеттік бағдарламасы – пандемия кезінде жұмыссыздықтың алдын алуға және қосымша жұмыс орындарын құруға бағытталған ауқымды жоба.

Пікір жазу

Почтаңыз жарияланбайды

13 + seven =