«استانا اقشامى»
ەل جۇرەگى – ەلوردا شەجىرەسى

جىلۋ ەنەرگياسى جەتكىلىكتى مە؟

0 45

كەشە استانا قالاسى قوعامدىق كەڭەسىنىڭ وتىرىسىندا 2019-2021 جىلدارعا ارنالعان قالا بيۋدجەتىنىڭ جوباسى قارالدى. ءتيىستى جوبامەن قالالىق ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆ تانىستىردى.

قۇرىلىس جانە تۇرعىن ءۇي ساياساتى باسقارماسىنا ءۇش جىلعا 48 ملرد تەڭگە ءبولۋ قاراستىرىلعان. سونىڭ 31 ملرد تەڭگەسى كەلەسى جىلعا تيەسىلى. قالاداعى مەكتەپتەر تىعىز­دىعى پروبلەماسىن شەشۋ ءۇشىن 6 مەكتەپ پەن 4 قوسىمشا عيمارات قۇرىلىسىن اياقتاۋعا 5,2 ملرد تەڭگە جانە رەسپۋبليكالىق بيۋدجەتتەن 8 مەكتەپ پەن 4 قوسىمشا عيماراتتى سالۋعا، سارىارقا اۋدانىندا 800 ورىنعا ار­نالعان كاسىپتىك مەكتەپ قۇرى­لىسىن اياقتاۋعا قارجى قاراس­تىرىلعان. بۇعان قوسا، «نۇرلى جول» باعدارلاماسى شەڭبەرىندە تۇرعىن ۇيلەردى سالۋعا 13,6 ملرد تەڭگە بولىنبەك.
1-جەو مەن 2-جەو جاڭعىرتۋ جۇمىستارى دا جالعاسپاق. بۇل ماسەلە بويىنشا قوعامدىق كەڭەس توراعاسى سانسىزباي ەسىلوۆ 3-جەو قۇرىلىسىنىڭ ءبىرىنشى كەزەڭىن اياقتاۋ بويىنشا دا كوپ سۇراقتار تۋىنداپ جاتقانىن جەتكىزدى.
«مەن «استانا-ەنەرگيا» اق ديرەكتورلار كەڭەسىنىڭ مۇشەسىمىن. كۇنى كەشە عانا كەڭەس وتىرىسى ءوتىپ، وندا الداعى ءۇش جىلدىڭ جوسپارلارى تالقىلاندى. سوندا جىلۋ ەنەرگياسى بويىنشا رەزەرۆتەر قالماعانى ايتىلدى. ول تۇسىنىكتى دە، قالا حالقى ميلليوننان استى. 1-جەو مەن 2-جەو بولەتىن جىلۋ ەنەرگياسى ءتيىستى نىساندارعا تاراتىلدى. وتكەن جىلى شاھاردا 2 ملن 400 مىڭ شارشى مەتر تۇرعىن ءۇي پايدالانۋعا بەرىلدى. بيىل سالىناتىن شارشى مەترلەر 2 ميلليوننان اسپاق. ال الەۋ­مەتتىك جانە كاسىپكەرلىك نىساندار جىلۋدى كۇتىپ وتىرمايدى عوي. سوندىقتان بۇل ماسەلەگە مۇقيات بولۋ كەرەك. قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنان ءتيىستى انىقتامانى بىزگە ۇسىنۋدى سۇرايمىن» دەدى س.ەسىلوۆ.
قالادا حوسپيس سالۋ ماسەلەسى قالالىق ءماسليحات وتىرىستارىندا بىرنەشە مارتە قارالدى. قوعامدىق كەڭەس تە مۇنى اتتاپ كەتە المادى. بۇعان قوسا، كەڭەس وتىرىسىندا مەكتەپ اسحاناسى ماسەلەسى دە قايتا كوتەرىلدى. كەڭەس مۇشەسى تولەگەن قۋانىشەۆ بيۋدجەت قارجىسىن بولگەندە ءتيىستى جىلدارعا سايكەس تەپە-تەڭدىكتى ساقتاۋ جايىن قوزعادى.

پىكىر جازۋ

پوچتاڭىز جاريالانبايدى