«Astana aqşamı»
El jüregi – elorda şejiresi

Jumıspen qamtw — bastı nazarda

0 43

Elordada jumıssızdıq deñgeyi 4,5 payızdı quraydı. Bïıl qalanıñ Jumıspen qamtw ortalığına 10 mıñnan astam adam eki qolğa bir jumıs izdep kelgen. Nätïjesinde 1,5 mıñ turğın turaqtı jumısqa, 2 mıñ­day adam qoğamdıq jumısqa tartıldı. Täjirïbe jïnaqtaw üşin jastar praktïkasına 500-den asa jas jiberildi.

Buğan qosa, ortalıq qızmetine jügingen 610 mümkindigi şektew­li azamattıñ 336-sına jumıs tabıldı. Sol sïyaqtı bas bostandığınan ayırw orındarınan bosap şıqqan 30 adamnıñ 13-i, probacïya qızmetiniñ esebinde turğan 45 adamnıñ 16-sı jumıspen qamtıldı. Kämeletke tolmay turıp ata-ananıñ qamqorlığınsız qalğan 10 azamat ortalıqqa jumıs izdep kelip, solardıñ jetewiniñ ötinişteri qanağattandırıldı.
Qala äkimdiginde ötken «Eñbek» nätïjeli jumıspen qamtw jäne jappay käsipkerlikti damıtwdıñ memlekettik bağdarlamasın jüzege asırwğa arnalğan baspasöz mäslïhatında qalalıq Jumıspen qamtw ortalığınıñ dïrektorı Abay Baymoldïn osınday statïstïkanı keltirip, atqarılıp otır­ğan jumıs barısın bayandadı.
– Qazirgi kezde Nur-Sultan qalasınıñ mälimetter bazasında 6 mıñnan asa bos jumıs ornı bar. Osındağı 2 mıñnan astam orınnıñ jalaqısı 100 mıñ teñgeden asadı. Qısqa merzimdik käsibï oqıtwğa 913 adamdı jiberw josparlanwda. Bügingi tañda olardıñ 362-si oqwğa jiberildi. Tört mıñday adam jumıssızdar esebinde tur. Ötken jıldıñ qazan ayında «Enbek.kz» attı elektrondı eñbek bïrjası iske qosıldı. Munıñ artıqşılığı – kez kelgen adam üylerinen şıqpay, jumıs taba aladı. Joğarıda aytqanımday, bizdiñ qızmetimizge 10 mıñnan astam adam jüginse, solardıñ köbisi atalmış portal arqılı jumıs taptı. Negizinen, jumısşı mamandıqtarı suranısqa ïe. Atap aytqanda, qalağa elektromonterler, elektrmen jäne gazben dänekerlewşiler, santehnïkter, kran maşïnïsteri, tiginşiler, ämbebap şaştarazdar kerek, – dedi ortalıq dïrektorı.
Onıñ aytwınşa, ötken jılı atawlı älewmettik kömek alw üşin 900 otbası ğana ötiniş berse, bïıl ötinişter sanı edäwir köbeygen. Bïılğı säwir ayınıñ özinde 3 mıñday ötiniş kelip tüsken. Al qazirgi kezde bul körsetkiş 8 mıñnan asıp ketken.
Memleket qazınasınan 1200 adamdı qısqa merzimdik oqıtwğa qosımşa qarjı bölindi. Sonday-aq, osınday oqwdı ayaqtağan azamattar üşin jäne «Bastaw bïznes», «Jas käsipker» bağdarlama­ları ayasında 1 mlrd teñge köleminde 2 mıñ grant bölingen.
«Jas käsipker» bağdarlamasına 18-29 jas aralığındağı jastar qatısa aladı. Ümitkerler aldımen käsipkerlik negizderin oqıp, bïznes-jattıqtırwşımen birge tïisti jobanı äzirleydi. Osı jobanı komïssïyağa usınıp, ol maquldanğan jağdayda 200 AEK – 505 mıñ teñgelik granttı alwğa qujattı tapsıradı. Qazirgi kezde bul bağdarlamağa ilikkisi kelgen jastardan 500-den astam ötiniş kelip tüsken. Olar osı waqıtta alğaşqı kezeñde tur, yağnï oqıtwdan ötip jatır.
Al «Bastaw bïznes» bağdarlamasına qatısw üşin adam jasına şektew qoyılmaydı. Basqa şart­tarı «Jas käsipker» bağdarlamasımen birdey. Tek joba qorğalğannan keyin ekinşi deñgeyli bankterge 5 jıl merzimine 6 payızdıq ösimmen şağın nesïe alw üşin qujat tapsırıladı. Osı bağdarlamağa ilikken adam 20 mln teñgege deyin nesïe ala aladı.
Bul twralı aytqan Nur-Sultan qalası käsipkerler palatasınıñ adamï kapïtaldı damıtw böliminiñ sarapşısı Aynur Rahmetova atalmış uyımnıñ bastamasımen qalada jumıspen qamtwdıñ mobïl'di ortalıqtarı aşılıp jatqanın jetkizdi. Onıñ aytwınşa, jospar boyınşa osınday 8 ortalıq aşılmaq. Qazirgi tañda onıñ törtewi jumıs istep jatır. Olar «Etalon», «Uljan», «Sapar» bazarlarında jäne eski temirjol vokzalı mañında aşılğan.
– Kelesi aptada «Tulpar» baza­rı men «Evrazïya» sawda üyinde tağı eki ortalıq aşwdı josparlap otır­mız. Bolaşaqta «Qosşı» kenti men awızeki tilde «Sïlïkatnıy» atalıp ketken awmaqtağı sayajay alabında osınday ortalıqtar aşılmaq, – dedi A.Rahmetova.

Pikir jazw

Poçtañız jarïyalanbaydı