«Astana aqşamı»
El jüregi – elorda şejiresi

Jeke mülikke jarna tölenbeydi

0 115

28 şilde küni keybir BAQ-tarda: «Barlıq qazaqstandıqtardı azamattıq-quqıqtıq mämile jasaw barısında satqan köligi, üyi sïyaqtı menşik müliginen tapqan tabısınıñ 10 payızın zeynetaqı qorına awdarwğa mindettew jöninde zañ şığıptı» degen aqparat tarap, qoğamdı dürliktirdi.

Äsirese «Feysbwk» älewmettik je­lisin qoldanwşılar: «Öz halqın tonaytın zañğa qol qoyğan Parlament otstavkağa ketsin!» dep odan sa­yın daw-damaydıñ otına may quydı. Alayda resmï tulğalar bul sawal­ğa jedel ün qatıp, tüsindirip berdi.
Aldımen Eñbek jäne halıqtı älew­mettik qorğaw mïnïstriniñ orınbasarı Svetlana Jaqıpova öziniñ «Feysbwktegi» paraqşası arqılı päter men kölik satwdan tüsken aqşadan eşqanday zeynetaqı jarnasın tölewdiñ qajeti joqtığın mälimdedi. Onıñ aytwınşa, barlıq zeynetaqı awdarımdarı azamattardıñ eñbek tabısınan ustaladı. «Mısalı, kä­siporın jumısşısınıñ eñbek tabısı – onıñ jalaqısı, jeke käsipkerdiñ kirisi – käsipkerlik qızmetten tapqan aqşası, jeke notarïwstiki – özi körsetken qızmetinen tüsken tabısı. Al azamattıq-quqıqtıq kelisimşarttar negizinde belgili bir jumıstardı atqaratın zañdı jäne jeke tulğalar sol qızmetinen tapqan tabısına qaray zeynetaqı qorına aqşa awdaradı (jeke mülkin satqan qarajattan emes)» dep tüsindirdi mäseleniñ mänisin vïce-mïnïstr.
Svetlana Jaqıpova 14 şildede zañğa engizilgen tüzetwlerge säykes, azamattıq-quqıqtıq sïpattağı kelisim boyınşa tabıs tabatın jeke tulğalar advokat, sot orındawşı, jekemenşik notarïws, käsibï medïator, jeke käsipker sïyaqtı Birıñğay jïnaqtawşı zeynetaqı qorına mindetti türde tölem jasaytının ayttı. Bul mäseleniñ nege halıqtıñ nazarınan tıs qal­ğanına Mäjilis depwtatı Amanjan Jamalov jawap berdi. «Burın jarna tölew ärkimniñ erkinde boldı. Jarna tölenetin kiristerdiñ türleri naqtılanbadı. Bul, negizi, Ükimettiñ qawlısımen retteledi. Sol qawlıda kimniñ jäne qanday kiristerden jarna töleytini tolıq körsetilgen. Alayda biz Parlamentte «Zeynetaqımen qamtamasız etw twralı» zañ qabıldağanda Ükimet qawlısına da tüzetwler engizilwi tïis bolğan. Endi, mine, sol mäsele halıqtı alañdatıp otır. Biraq zañğa engizilgen normatïvtik quqıq­tıq aktiler azamattardı päter satwdan, depozït boyınşa sıyaqı payızdarınan tüsken qarajattan zeynetaqı jarnasın tölew­ge mindettemeydi» dedi Amanjan Jamalov.

Pikir jazw

Poçtañız jarïyalanbaydı