«استانا اقشامى»
ەل جۇرەگى – ەلوردا شەجىرەسى

جەكە مۇلىككە جارنا تولەنبەيدى

0 115

28 شىلدە كۇنى كەيبىر باق-تاردا: «بارلىق قازاقستاندىقتاردى ازاماتتىق-قۇقىقتىق مامىلە جاساۋ بارىسىندا ساتقان كولىگى، ءۇيى سياقتى مەنشىك مۇلىگىنەن تاپقان تابىسىنىڭ 10 پايىزىن زەينەتاقى قورىنا اۋدارۋعا مىندەتتەۋ جونىندە زاڭ شىعىپتى» دەگەن اقپارات تاراپ، قوعامدى دۇرلىكتىردى.

اسىرەسە «فەيسبۋك» الەۋمەتتىك جە­لىسىن قولدانۋشىلار: «ءوز حالقىن تونايتىن زاڭعا قول قويعان پارلامەنت وتستاۆكاعا كەتسىن!» دەپ ودان سا­يىن داۋ-دامايدىڭ وتىنا ماي قۇيدى. الايدا رەسمي تۇلعالار بۇل ساۋال­عا جەدەل ءۇن قاتىپ، ءتۇسىندىرىپ بەردى.
الدىمەن ەڭبەك جانە حالىقتى الەۋ­مەتتىك قورعاۋ ءمينيسترىنىڭ ورىنباسارى سۆەتلانا جاقىپوۆا ءوزىنىڭ «فەيسبۋكتەگى» پاراقشاسى ارقىلى پاتەر مەن كولىك ساتۋدان تۇسكەن اقشادان ەشقانداي زەينەتاقى جارناسىن تولەۋدىڭ قاجەتى جوقتىعىن مالىمدەدى. ونىڭ ايتۋىنشا، بارلىق زەينەتاقى اۋدارىمدارى ازاماتتاردىڭ ەڭبەك تابىسىنان ۇستالادى. «مىسالى، كا­سىپورىن جۇمىسشىسىنىڭ ەڭبەك تابىسى – ونىڭ جالاقىسى، جەكە كاسىپكەردىڭ كىرىسى – كاسىپكەرلىك قىزمەتتەن تاپقان اقشاسى، جەكە نوتاريۋستىكى – ءوزى كورسەتكەن قىزمەتىنەن تۇسكەن تابىسى. ال ازاماتتىق-قۇقىقتىق كەلىسىمشارتتار نەگىزىندە بەلگىلى ءبىر جۇمىستاردى اتقاراتىن زاڭدى جانە جەكە تۇلعالار سول قىزمەتىنەن تاپقان تابىسىنا قاراي زەينەتاقى قورىنا اقشا اۋدارادى (جەكە مۇلكىن ساتقان قاراجاتتان ەمەس)» دەپ ءتۇسىندىردى ماسەلەنىڭ ءمانىسىن ۆيتسە-مينيستر.
سۆەتلانا جاقىپوۆا 14 شىلدەدە زاڭعا ەنگىزىلگەن تۇزەتۋلەرگە سايكەس، ازاماتتىق-قۇقىقتىق سيپاتتاعى كەلىسىم بويىنشا تابىس تاباتىن جەكە تۇلعالار ادۆوكات، سوت ورىنداۋشى، جەكەمەنشىك نوتاريۋس، كاسىبي مەدياتور، جەكە كاسىپكەر سياقتى بىرىڭعاي جيناقتاۋشى زەينەتاقى قورىنا مىندەتتى تۇردە تولەم جاسايتىنىن ايتتى. بۇل ماسەلەنىڭ نەگە حالىقتىڭ نازارىنان تىس قال­عانىنا ءماجىلىس دەپۋتاتى امانجان جامالوۆ جاۋاپ بەردى. «بۇرىن جارنا تولەۋ اركىمنىڭ ەركىندە بولدى. جارنا تولەنەتىن كىرىستەردىڭ تۇرلەرى ناقتىلانبادى. بۇل، نەگىزى، ۇكىمەتتىڭ قاۋلىسىمەن رەتتەلەدى. سول قاۋلىدا كىمنىڭ جانە قانداي كىرىستەردەن جارنا تولەيتىنى تولىق كورسەتىلگەن. الايدا ءبىز پارلامەنتتە «زەينەتاقىمەن قامتاماسىز ەتۋ تۋرالى» زاڭ قابىلداعاندا ۇكىمەت قاۋلىسىنا دا تۇزەتۋلەر ەنگىزىلۋى ءتيىس بولعان. ەندى، مىنە، سول ماسەلە حالىقتى الاڭداتىپ وتىر. بىراق زاڭعا ەنگىزىلگەن نورماتيۆتىك قۇقىق­تىق اكتىلەر ازاماتتاردى پاتەر ساتۋدان، دەپوزيت بويىنشا سىياقى پايىزدارىنان تۇسكەن قاراجاتتان زەينەتاقى جارناسىن تولەۋ­گە مىندەتتەمەيدى» دەدى امانجان جامالوۆ.

پىكىر جازۋ

پوچتاڭىز جاريالانبايدى