«Astana aqşamı»
El jüregi – elorda şejiresi

Jastarğa jalğa baspana beriledi

0 26

Memleket basşısı Q.Toqaev 29 jasqa deyingi azamattarğa 16 jeltoqsannan bastap Nur-Sultan, Almatı jäne Şımkent qalalarında päter salwdı tapsırğan bolatın. Osı tapsırmağa oray jumıs istep jürgen jastarğa satıp alw quqığınsız jalğa baspana beriletin boldı.

Ol twralı Ortalıq kommwnïkacïyalar qızmetinde Aqparat jäne qoğamdıq damw mïnïstrligi (AQDM) Jastar jäne otbası isteri komïtetiniñ törağası Madïyar Qojahmet mälim etti.

Memleket basşısı jastarğa arnap Nur-Sultan, Almatı, Şımkent qalalarınıñ ärqaysında jıl sayın keminde 1000 päterden salwdı mindettedi. Ereje boyınşa jaldamalı päter ïelenwge nïet etkender atalğan qalalarda kemi 2 jıl turwı tïis. Jäne jıljımaytın mülki bolmawı kerek. Sonday-aq ümitkerlerdiñ bastapqı jarnanı jïnawğa qızığwşılığı oyanwı üşin bankterde jeke esepşotı bolwı şart.
– Jobanıñ maqsatı – jastardı baspanalı bolwğa ıntalandırw, qoldaw körsetw. Jaldamalı päter alğısı keletin azamattıñ qızmettegi jetistikterin rastaytın qujattarı usınılsa qosımşa jeñildikter beriledi. Al otbasın qurıp, balası bolsa, arnayı bağalar qarastırılğan, – dedi Aqparat jäne qoğamdıq damw mïnïstrligi Jastar jäne otbası isteri komïtetiniñ törağası Madïyar Qojahmet Ortalıq kommwnïkacïyalar qızmetinde ötken jïında.
Statïstïkağa süyensek, qazirgi waqıtta respwblïkamızda 14-29 jas aralığında 4 mïllïonğa jwıq jas bar. Onıñ 245 mıñı – Nur-Sultan qalasında, 700 mıñı – Almatı qalasında, 260 mıñı Şımkent qalasında turadı. Osı üş qalada üş jılda 9 mıñ päter tapsırıladı dep josparlanıp otır. Päterler 5 jılğa jalğa beriledi. Olardıñ jalğa berw aqısı ayına 10-12 mıñ teñgeni quraydı. Bul esepke kommwnaldıq tölemder kirmeydi. Bağdarlamanı jüzege asırw üşin byudjetten 21 mïllïard teñge bölindi.
– Qazirgi waqıtta osı päterlerdiñ konkwrstıq qujattarı dayındalıp jatır. Jospar boyınşa qaraşa ayınan bastap qujattar qabıldanadı. Ol üşin arnayı bir jerge barıp kezekke turwdıñ qajeti joq. Qujattardı qabıldaw Smart Astana platformasında tolığımen elektrondı türde uyımdastırıladı, – dedi Nur-Sultan qalası äkimdiginiñ Qoğamdıq damw isteri basqarmasınıñ bölim basşısı Talğat Rahmanberdi.
Jastarğa arnalğan jaldamalı turğın üy bağdarlamasınıñ alğaşqı kezeñi 2021 jılğa deyin jumıs isteydi. Odan keyin bağdarlamanı jetildirw jäne onı elimizdegi basqa qalalarda da jalğastırw şaraları jüzege asırıladı. Ükimetten päter jalğa berilgen merzim işinde jastardıñ özderiniñ jeke baspanaları üşin tïisti qarjını jïnap alwğa mümkindigi bar.
Jalğa beriletin üylerdi bölw kezinde jas otbasılarğa, narıqta neğurılım suranısqa ïe 100 mamandıq ïelerine, jas käsipkerlerge, byudjettik uyımdar qızmetkerlerine basımdıq beriledi. Jaldamalı baspanağa ïe bolw üşin qajet qujattar tizimi mïnïstrliktiñ saytında körsetilgen.
Ereje boyınşa negizgi talaptardıñ biri – ötiniş berwşiniñ tabıs közi 40 AEK-ten tömen bolmawı kerek. Bul – şamamen 101 mıñ teñge. Öytkeni üy ïelenwşi jaldamalı päterdiñ aqısı men kommwnaldıq qızmet tölemderinen basqa, tabısınıñ belgili bir böligin ay sa­yın ekinşi deñgeyli bankterde depozït jïnaqtaw üşin de salıp otırwı kerek. Joğarıdağı esepke süyensek, osı bes jıl işinde 1,5-2 mïllïon teñge qarajat jïnaladı. Osı bastapqı jarna üş qalanıñ üy narığındağı bağası 7-8 mïllïon teñge bolatın ekonom sanattağı baspanalardıñ birine ïe bolwğa jetkilikti.

 

Pikir jazw

Poçtañız jarïyalanbaydı