«استانا اقشامى»
ەل جۇرەگى – ەلوردا شەجىرەسى

جاستار قان تاپسىردى

0 25

ەلورداداعى ترانسفۋزيولوگيا عىلىمي-وندىرىستىك ورتالىعى – استانانىڭ 22 دەنساۋلىق ساقتاۋ ۇيىمىن قاۋىپسىز قان كومپونەنتتەرىمەن قامتاماسىز ەتەتىن كەشەندى مەكەمە. وسى ورتالىقتا ارىستا بولعان توتەنشە جاعدايعا قاتىستى ەرىكتىلەردىڭ قان تاپسىرۋى ۇيىمداستىرىلدى.

قايىرىمدى ىسكە مۇرىندىق بولعان – قالانىڭ بەلسەندى جاستارى. ولار «مەن ارىسپەن بىرگەمىن!» ۇرانىن ورتاعا تاستاپ، الەۋمەتتىك جەلىلەردە ءوزارا پىكىر الماسىپ، وسىنداي شەشىمگە كەلدى. جاستار ورتالىقتا قان تاپسىرىپ، وعان تولەنەتىن 1 اەك 0,25 پايىزىن – 512 تەڭگەنى ارىستا بولعان توتەنشە وقيعانىڭ سالدارىن قالپىنا كەلتىرۋگە اۋداراتىنىن جەتكىزدى.
– ءشامشىنىڭ انىمەن وسكەن جاستاردىڭ اراسىندا ارىستا بولعان وقيعاعا بەيجاي قالاتىن ەشكىم جوق شىعار. كەشەدەن بەرى استانانىڭ بەلسەندى جاستارى حابارلاسىپ، ءوز ارەكەتتەرىمىزدى اقىلداستىق. استانانىڭ بەس جەرىندە كيىم-كەشەك، ازىق-تۇلىك سياق­تى كوپشىلىكتىڭ كومەگىن قابىلدايتىن ورىن اشتىق، – دەدى نۇر-سۇلتان قالاسى قوعامدىق دامۋ ىستەرى باسقارماسى جاستارمەن جۇمىس ءبولىمىنىڭ باسشىسى باقىت جۇنىسبەكوۆ.
– كۇن سايىن 100-130 ادام قان تاپسىرۋعا كەلىپ جاتادى. ونىڭ 90 پايىزى – ءوز ەركىمەن اقىسىز اتقاراتىندار. بۇل ماسەلەدە تاپشىلىق جوق بولسا دا، ىزگى نيەتتەرىن ىستەرىمەن دالەلدەگەن جاستاردىڭ بەلسەندىلىگى قۋانتادى، – دەيدى دونورلاردى جيناقتاۋ بولىمشەسىنىڭ مەڭگەرۋشىسى ەلميرا كوپەەۆا.

پىكىر جازۋ

پوچتاڭىز جاريالانبايدى