«استانا اقشامى»
ەل جۇرەگى – ەلوردا شەجىرەسى

جاردەماقى مولشەرى ءوستى

0 79

1 ساۋىردەن باستاپ ەلىمىزدە اتاۋلى الەۋمەتتىك كومەكتىڭ (ااك) جاڭا ءتۇرى تاعايىندالادى. بۇل كومەكتى وتباسىنىڭ ايلىق تابىسى ءبىر ادامعا شاققاندا 20 789 تەڭگەدەن اسپايتىن وتباسىلار الادى. جاڭا جۇيە بالالاردىڭ سانىنا قارامايدى. ياعني، ءار ادامعا شاققاندا ايلىق تابىسى 20 789 تەڭگەدەن اسپايتىن ءبىر بالاسى بار وتباسى دا بۇل جاردەماقىنى الادى.

اتاۋلى الەۋمەتتىك كومەك كوپبالالى جانە الەۋمەتتىك جاعىنان از قامتىلعان وتباسىلارعا بەرىلەدى. مىسالى، الەۋمەتتىك احۋالى تومەن وتباسىندا جالعىزباستى ايەل ءبىر بالاسىن اسىراپ وتىرۋى مۇمكىن. ونىڭ ايلىق جالاقىسى 40 مىڭ تەڭگە دەلىك. بۇل اقشانى ەكى ادامعا بولسەك، 20 مىڭنان كەلەدى. دەمەك، بۇل وتباسىنىڭ ءبىر ايلىق تابىسى ادام باسىنا شاققاندا كۇنكورىس دەڭگەيىنەن 70 پايىزىنان اسپايدى. ەندەشە، بۇل وتباسى اي سايىن 21 مىڭ تەڭگە جاردەماقى الۋعا قۇقىلى.
1 ساۋىردەن باستاپ تۇڭعىش پرەزيدەنت – ەلباسىنىڭ تاپسىرماسى بويىنشا كەدەيلىك شەگى ەڭ تومەنگى كۇنكورىس دەڭگەيىنەن 50 پايىزدان 70 پايىزعا دەيىن كوتەرىلدى. ول بۇرىنعى 14 849 تەڭگەدەن 20 789 تەڭگەگە كوبەيدى. ايتا كەتەرلىك جايت، نۇر-سۇلتان، الماتى قالالارى مەن ماڭعىس­تاۋ وبلىسىندا كۇنكورىس دەڭگەيى جوعارى بولعاندىقتان جاردەماقى مولشەرى 21 مىڭ تەڭگەنى قۇرايتىن بولادى.

جاردەماقىنى تولەيتىن كەزدە ەسكەرىلەتىن نارسەنىڭ ءبىرى – وتباسىنىڭ جيىنتىق تابىسى. بۇگىنگە دەيىن ءبىر ۇيدە تۇراتىن بارلىق ادامداردىڭ تابىسى ەسەپتەلىپ كەلدى. ال 1 ساۋىردەن باستاپ تەك جاقىن تۋىستارىنىڭ، ياعني، اتا-اناسى، بالالارى، اكەسى ءبىر، شەشەسى بولەك اعايىندار، اتا-اجەلەرىنىڭ تابىسى عانا ەسكەرىلەدى. وسى ادامدار ءبىر ۇيدە بىرگە تۇراتىن بولسا، ولاردىڭ تابىسى وتباسىنىڭ ورتاق كىرىسى دەپ سانالادى. سونداي-اق قوسالقى شارۋاشىلىق تا كىرىستىڭ كوزى رەتىندە قاراستىرىلادى. الايدا بۇل جەردەگى قۇزىرەت جەرگىلىكتى اتقارۋشى ورگاندارعا بەرىلىپ وتىر. وتباسىنىڭ قولىنداعى مالىن كىرىس رەتىندە ساناي ما، جوق پا، ونى اكىمدىكتەر وزدەرى شەشەدى.
جۇرتتىڭ كوكەيىندە كوپ ساۋال تۋىنداتقان ماسەلەنىڭ ءبىرى – قۇجاتتار جيناۋ. ەڭبەك جانە حا­لىقتى الەۋمەتتىك قورعاۋ مينيسترلىگى بۇل ماسەلەنى وڭ شەشتى دەۋگە بولادى. جاردەماقى الۋ ءۇشىن وتىنىشتەن باسقا ەشقانداي قۇجاتتار تاپسىرۋ قاجەت ەمەس. ءوتىنىشتى جەرگىلىكتى اكىمدىككە، حالىققا قىزمەت كورسەتۋ ورتالىعىنا تاپسىرىپ كەتۋگە بولادى. تەك ءوتىنىش اپارعان ادام جەكە كۋالىگىن كورسەتىپ، وتباسى مۇشەلەرىن تولىق جازىپ بەرەدى. ءوتىنىشتى 1 ساۋىردە عانا ەمەس، ايدىڭ ورتاسىندا دا بەرۋگە مۇمكىندىك بار. الايدا جاردەماقى 1 ساۋىردەن باستاپ ەسەپتەلەدى.

كومەك قايدا بەرىلەدى؟

1 ساۋىردەن باستاپ 5 ءتۇرلى مەكەنجايداعى – حالىققا قىزمەت كورسەتۋ ورتالىقتارىندا، 4 – اۋدان اكىمدەرىنىڭ اپپاراتىندا اتاۋلى الەۋمەتتىك كومەكتى (ااك) تاعايىنداۋ بويىنشا ازاماتتاردى قابىلداۋ ءىس-شارالارى باستالدى. بارلىق ورىنداردا 36 جاۋاپتى قىزمەتكەر بەكىتىلگەن. ارنايى وقىتىلعان ماماندار جۇمىس ورىندارىمەن جابدىقتالعان.
بۇگىنگە دەيىن 436 ادام ااك بويىنشا ارىزدانعان (ولارعا كەڭەس بەرىلدى), سونىڭ ىشىندە:
-342 –حالىققا قىزمەت كورسەتۋ ورتالىعى،
-25 – الماتى اۋدانى،
-19 – بايقوڭىر اۋدانى،
-10 – ەسىل اۋدانى،
-40- سارىارقا اۋدانى.
-128 ااك الۋعا قۇقىلى (الدىن الا ەسەپتەۋ بويىنشا):
-86-حالىققا قىزمەت كورسەتۋ ورتالىعى،
-14-الماتى اۋدانى،
-11-بايقوڭىر اۋدانى،
-10-ەسىل اۋدانى،
-7-سارىارقا اۋدانى.

انىقتاما ءۇشىن:

جاڭا فورماتتاعى ااك-پەن 2500 وتباسىن قامتاماسىز ەتۋ جوسپارلانعان، بارلىعى 12 060 ادام، قارجىلاندىرۋ سوماسى 1 ملرد 59 ملن تەڭگە (قاراستىرىلعانى – 116 ملن تەڭگە، رەسپۋبليكالىق بيۋدجەتتەن قوسىمشا 943 ملن تەڭگە ءبولۋ قاراستىرىلعان).
(نۇر-سۇلتان قالاسى بويىنشا)

پىكىر جازۋ

پوچتاڭىز جاريالانبايدى