«Астана ақшамы»
Ел жүрегі – елорда шежіресі

Жаңа үлгідегі мектеп-лицей

0 24

Nur Otan партиясы төрағасының бірінші орынбасары Бауыржан Байбек пен Нұр-Сұлтан қаласының әкімі Алтай Көлгінов екі жыл бұрын «CA Garden Schools» жеке компаниясының басқаруына берілген №54 мектеп-лицейдің жұмысымен танысты.Екі жыл ішінде инвестор жөндеу жұмыстары мен материалдық-техникалық базаны жаңартуға 100 млн теңгеден астам қаражат салған. Оpen spase үлгісінде жұмыс істейтін co-working алаңдары, intellectum қосымша білім беру бөлмесі және лекция­ға, шығармашылыққа, медиаға арналған үш бөліктен тұратын garden hub лекция бөлмелері сияқты жаңа жұмыс алаңдары ашылды. Бірінші қабаттағы директордың кабинеті мұғалімдер бөлмесі болып қайта жабдықталды.
Мектеп директоры Шәкәрім Сейсенбайдың айтуынша, білім беру жүйесін жетілдіру мақсатында мұғалімдер үнемі біліктілік арттыру курстарынан өтеді. Мұндағы мұғалімдер мереке күндері кезекшілік жасау сияқты басқа да өз міндеттеріне кірмейтін жұмыстармен әуреленбейді. Ал мектеп түлектері еліміз бен шет елдердегі үздік университеттерге оқуға түсті. Nur Otan партиясы төрағасының бірінші орынбасары мектептегі оң өзгерістерге бизнес енгізген менеджмент жүйесінің арқасында қол жеткізілгендігін және мұндай тәжірибені басқа оқу орындарына таратудың маңыздылығын атап өтті.
«Елдегі адами капиталдың сапасы мұғалімдерге және білім беру деңгейіне байланысты. Сондықтан жүйені заңнамалық деңгейде жетілдіру үшін партия тарапынан біз осындай білім ордаларының сәтті қадамдарын зерделеудеміз. Сонымен қатар Nur Otan партиясының төрағасы Н.Назарбаевтың бастамасымен осы мамандықтың мәртебесін көтеруге, мұғалімдерге жүктемені азайтуға және олардың міндетіне кірмейтін жұмыстарды атқаруына жол бермеуге бағытталған «Мұғалімнің мәртебесі туралы» заң жобасы жасалды. Мемлекет басшысы Қасым-Жомарт Тоқаев алдағы төрт жылда мұғалімдердің еңбекақысын екі есеге көтеруді тапсырды. Nur Otan мұғалімдерге көмектесу, жағдай жасау және олардың мүдделерін қорғау үшін осы бағытта белсенді жұмыс істейді» деді Бауыржан Байбек.

Пікір жазу

Почтаңыз жарияланбайды