«استانا اقشامى»
ەل جۇرەگى – ەلوردا شەجىرەسى

ۇلجاننىڭ ۇزەڭگىسى

ءبىر سۋرەتتىڭ سىرى

0 122

اباي ارقىلى الەمگە تانىلعان قۇنانباي شاڭىراعىنىڭ ءبىر مۇراسى ارعى بەتتە، دالىرەك ايتساق، قحر التاي ايماعىندا تۇر.

«ۇلجاننىڭ ۇزەڭگىسى» دەپ اتالاتىن بۇل جادىگەردى التاي قالاسى شىرىكشي اۋىلىنىڭ تۇرعىنى قاجىاحمەت تاپالۇلى ساقتاپ، بۇگىنگە جەتكىزگەن. قاجىاحمەت اقساقالدىڭ ايتۋىنشا، سىرتىنا كۇمىس قاقتاعان بۇل قوستابان ۇزەڭگى شىڭعىس تاۋىنىڭ ەتەگىندەگى قۇنانباي اۋىلىنان اردا التاي توسىندەگى سالقىن ساۋىر القابىنا ۇزاتىلعان قىزدىڭ جاساۋىمەن بىرگە كەلىپتى.
– مەنىڭ ارعى اتام كىشتاي باي كەزىندە قۇنانباي اۋىلىمەن ىرگەلەس وتىرعان، قىز الىسىپ، قىز بەرىسكەن قۇدا ەكەن. ۇزاق جىل ۇلجان شەشەمىزدىڭ قىزمەتىندە بولعان ءبىر بويجەتكەن كەرەي اۋىلىنا ۇزاتىلعاندا، ۇلجان انامىز ات مىنگىزىپ اتتاندىرىپتى. مىنا ۇزەڭگى – سول ءتورت تۇرمانى تۇگەل كۇمىس ەردەن قالعان جۇرناق. ەرىن جانە قالعان تۇرمانىن «مادەنيەت زور توڭكەرىسى» كەزىندە بەلسەندىلەر كوزىن قۇرتتى. ال ۇزەڭگىسىن كامەش دەگەن پىسىق جەڭگەم تىعىپ الىپ قالىپتى دا، وگىزگە ەرتتەيتىن ىڭىرشاققا تاعىپ قويىپتى. وگىزدىڭ قابىرعاسىندا جۇرگەن ۇزەڭگىنى ەشكىم بايقاماي، «ءتورت كونەنى قۇرتقان داۋىردەن» امان قالىپ، بۇگىنگە جەتتى، – دەيدى قاجىاحمەت اقساقال.
200 جىلعا جۋىق تاريحى بار جادىگەردىڭ جاي قولدان شىقپاعانى كورىنىپ تۇر. سىرتىنا قاقتاعان كۇمىستىڭ ازداپ ۇشقانى بولماسا، «سىرلى اياقتىڭ سىرى كەتسە دە، سىنى كەتپەيدى» دەگەندەي، شەبەر قولدان شىققان ۇزەڭگىنىڭ جاسالۋىنىڭ ءوزى كوز تارتادى. قاجىاحمەت اقساقال العاشىندا بۇل ۇزەڭگىنى اباي ۇرپاقتارىنىڭ وزىنە تابىس ەتسەم دەپ تە ويلاپتى. الايدا التاي قالالىق مۇراجاي بۇل ۇزەڭگىنى قاجىاحمەت اقساقالدىڭ قولىنان الدەقاشان الىپ كەتكەن. قازىر سول مۇراجايدا ساقتاۋلى.

پىكىر جازۋ

پوچتاڭىز جاريالانبايدى