«Astana aqşamı»
El jüregi – elorda şejiresi

Türikterge qazaq küyin tanıstırğan japon jigiti

0 23

Alda-jalda jolıñız tüsip Stambulğa barsañız, Taksïm alañına soqpay ketpeñiz. Onda qazaq küyleri men änderin tartıp otıratın dombıraşı jigit bar. Qos işekti quyqıljıta şertkende, onıñ japon ekenine senw qïın.

Quj-quj qaynağan Stambul. Özim sekildi twrïsterdiñ jïi jü­retin mekeni Taksïm alañın­damın. Sïmït pen kofe ïisi añ­qı­ğan awanı qumarlana jutıp jay­baraqat kele jatqanmın. Kenet qulağıma sonday tanıs qoñır ün keldi. Dombıranıñ üni! Özge elde quddı bir bawı­rımdı tapqanday jüregim atqaqtap qoya berdi. Dawıs şıq­qan jaqqa jetkenşe asıq­tım. Dombıraşınıñ özin de taptım-­aw. Bir-eki awız sözge tar­tıp körsem, älgi jigitim japon bolıp şıqtı. Ol özin Akïra Takegwçï dep tanıstırdı. Japonïya­dağı Kanagava oblısına qaras­tı Kavasakï qalasınan eken.
– Mwzıkağa degen qızığwşı­lığım on eki jasımda oyandı. Jasöspirim kezimde elektrli gïta­rağa, keyinnen flamenko gïta­rağa qızıqtım. Odan soñ Orta Azïyadağı mwzıkalıq aspap­tarğa añsarım awdı. Osı salanı tübegeyli zerttemek bolıp wnïversïtetke tüserde de mwzıkanı, dälirek aytsam, etnostıq mwzıka mamandığın tañdadım. Wnïversïtette oqıp jürgenimde wdta oynawdı üyrendim, ol – türikterdiñ ulttıq mwzıkalıq aspabı. Oqwımdı ayaqtağan soñ, önerimdi äri qaray jetildirmek bolıp Stambulğa keldim. Bul meniñ Türkïyağa jasağan alğaşqı saparım edi, – deydi japon jigit.
Bastapqıda Stambulda üş ayday oqıp, sosın eline qayt­qan Akïra kafe-barlarda wdta oynap, näpaqa tawıp jüripti. Alayda öz ömirine qanağattanbağan ol näsibin özge elden izdemekşi bolıp, qaytadan Türkïyağa attanadı. Dombıramen tanıstığı da sol şaqtarda bastalsa kerek.
– 2016 jıl edi. Men Ankarada jürgenimde, Akdenïz attı noğaydıñ änşi jigitimen tanıstım. Dombıranı da ömirde tuñğış ret sonıñ qolınan körgen edim. Oğan deyin 2011 jılı teledïdardan Qazaqstannıñ tarïhına qatıstı derekti fïl'm­di tamaşalağanımda dombıra jaylı aqparattı estigenim bar. Akdenïzben tanıstığımnan soñ dombıranı üyrene bastadım, – dep eske aldı ol sol kezdi.
Oğan küy şertwdi Türkïyada turatın qazaq jigit üyretipti. Büginde Akïra on altı küydi jatqa biledi. Onıñ işinde «Aday», «Balbırawın», «Köroğlı» sekildi belgili twındılar bar. Küy tartıp otırğanda, munı izdep keletin qazaqtar köp eken. Olardıñ keybiri sondağı jergilikti turğındar bolsa, keybiri qazaqstandıq twrïster körinedi.
– Dombıranı üyrengen soñ, qazaqtıñ salt-dästüri men tarïhına da azdap köz jügirte bastadım. Mağan bärinen burın sizderdiñ öz şıqqan tekteri­ñiz­ben maqtanatındarıñız, özderiñizdi bar küyleriñizde qabıldaytındarıñız unaydı. Japondarğa osı qasïet jetispeydi. Mısalı, japonnıñ zamanawï keyipkerlerin köre qalsañız, şaştarı aq sarı, közderi ülken, bir sözben aytsaq, tür-tulğası – awmağan ewropalıq adamdardiki. Meniñşe, öziñniñ azïat ekeniñnen qaşw, onı umıtwğa tırısw – öte ülken qatelik. Osı tusta men sizderden ülgi alğım keledi, – dedi Akïra.
Aytpaqşı, Akïra bıltır Almatığa qonaq bolıp qaytıptı. Qazaqstannıñ halqın da, asın da, tabïğatın da unatqan ol bizdiñ eldiñ Balqan tübeginde ornalasqan keybir memlekettermen uqsastığın bayqaptı. Japon jigittiñ aytwınşa, Almatıda da Belgrad, Sofïya, Skop'e sekildi qalalarğa tän atmosfera saqtalğan. Aldağı waqıtta jolı tüsse elordağa da keler, bälkim.

 

Pikir jazw

Poçtañız jarïyalanbaydı