-->

ТҰРҒЫНДАРДЫҢ «ТҰРМЫСҚА» ҚОЙҒАН ТАЛАБЫ

erm_3368-2-asli

Жақында Facebook әлеуметтік желісінде Н.Тілендиев көшесі, 36 мекенжайы бойын­ша тұрып жатқан тұрғындардың хаты жарияланды. Онда аталмыш үйдің тұрғындары қызмет көрсететін «Тұрмыс» ЖШС компаниясының жөнсіз қымбат тарифтерін сынға алып, Астана қаласының әкімі Әсет Исекешевке істің мән-жайын анықтауға өтініш білдірді. «Астана ақшамы» газетінің редакциясы шырмауы көп, шеші­­мін күткен даудың себебін айқындауға тырысып көрді.

Жазбадағы мәліметтерге сәйкес, «Тұрмыс» тұрғын­дардан коммуналдық қызмет­терді жоғары тарифтермен төлеуді талап еткен. Мә­селе ше­шімін таппаса, бұл жағ­дайдың соңы әлеуметтік қақ­тығысқа да әкеп соқтыруы мүмкін делінген.
– «Тұрмыс» компаниясы біздің үйге екі жыл қатарынан қызмет көрсетіп келеді. Жылу беру маусымы басталғалы бері әр шаршы метрге 500 теңге төлеп келеміз. Ал негізінде қала бойынша бір шаршы метр үшін 80-150 теңге белгіленген. Жуырда тарифтерді қайта есептеуді талап еттік, соның нәтижесінде бір шаршы метр үшін 415 теңге төлейтін бол­дық, – дейді сол үйдің тұрғыны Рамзиля Островская.
Рамзиля Островскаяның сөзіне сүйенсек, о бастан бері бұл үйдің құрылысы даудан бас­талды. Құрылыс біте берген кезде, үйді салушы сот­та­­лып кетті. Қалған құрылыс жұ­­мыстары мемлекет қара­жаты­ның көмегімен аяқталды. Нә­тижесінде, әкімдік 250 пә­­терге ие болып отыр, ал 20 шақты пә­тер салған ком­п­анияға тиесілі.
– Иесі жоқ бос жатқан үй­лердің жылу мен басқа да қызмет­терінің төлемақысын «Тұр­мыс» компаниясы біздің мой­нымызға артып қойды. Ал бұл – мыңдаған шаршы метрді құ­рай­тын үйлер. Тағы бір айта ке­тетіні, мұнай базасынан дербес жылу беру орталығына келген жанармайды рәсімдейтін құ­жаттарды өз көзіммен көрдім. Онда жанар­майдың әр литрі­нің құны 113 теңгеден деп көрсе­тілген, ал бізге 131 теңгеге сатып отыр, – деп налыды Рамзиля.
Бұл үйдің күрмеуі қиын күр­делі мәселесі – орталық жылу беру мекемесіне қосылу мүмкіндігінің жоқтығы. Се­бебі, оған кейбір жылу беру орта­лығының қуаты жет­пейді. Сондай-ақ, қажетті инже­нер­лік инфрақұрылым жоқ. Тұр­ғындардың айтуынша, бір бөлмелі пәтердің жылуына ай сайын 30000 теңге төленеді. Бұған басқа да коммуналдық қызметтердің ақысын қосқанда, бір айда 45000 теңге шамасында төлем жасалады. Астана­лықтар бұл мәселені шешу үшін прокуратураға да бас сұққан, Астана қаласы Сарыарқа ау­данының әкімдігіне де жүгін­ген. Бірақ, өкінішке қарай, еш нәтиже жоқ, – дейді олар.
Тұрғындарды тағы бір мәселе мазалап отыр. «Тұрмыс» кә­сіпорнының қызметкерлері халыққа ескертіп, түсіндіру жұмыстарын жүргізбей жатып, осы үйдің кондоминиу­мын тіркеуден өткізді. Енді, кондоминиумның иесі «Тұр­мыс» болып шықты. «Бұл не үшін жасалып отырғаны айтпаса да түсінікті» дейді ша­ғымданушы тарап.
«Тұрмыс» компаниясы мен тұрғындардың арасындағы қарым-қатынасты келесідегідей жағдай жақсы айқындайды. Күнде таңертең үй тұрғындары жылумен қамтамасыз етіп тұр­ған мекемеге барып, құрал­дардың көрсеткіштерін жазып, мұқият бақылау жүргізіп отыр. Тұрғындардың айтуынша, бұл жанармай ұрлығын болдыр­мауға септігін тигізеді.
Ал екінші тараптың пікі­рінше, айтылған уәждің бар­лығы – тұрғындардың қар­жылай сауат­сыздығынан туындап отыр.
– Нұрғиса Тілендиев көшесі, 36 үй тұрғындары бізді бостан-босқа айыптап отыр. Олардың есебінен артық ақша алып отырмыз деген айып орынсыз. Жылу беру маусымынан бас­тап, тұрғындар көрсетілген қызмет үшін небәрі 11 млн теңге қаржы төледі. Ал олардың берешегі 28 млн теңгеден асып жығылады. Қазіргі таңда, біз жанармайды кепілдік хатпен, яғни, қарызға алып отырмыз. Біз тасымалдаушыларға 8 млн теңгеге жуық қарызымыз бар. Осы ретте қандай шара қолдануымыз керек? Егер жылу беруді тоқтатсақ, тағы шу шығады, – деп «Тұрмыс» ПИК директорының орынбасары Асылхан Әбілдинов өз пікірін білдірді.
Ал осы мекеменің бас есеп­шісі Гүлмира Рамазанова­ның айтуынша, мұндай қарым-қатынас олардың да мазасын қашырды. Қазіргі таңда, ең бас­тысы – жылу беру маусымын жақ­сылап аяқтау. Ал қалғаны – алдағы уақыттың еншісінде.

Гүлмира Рамазанова,  «Тұрмыс» ЖШС компаниясының бас есепшісі: – Біз өз қызметкер­лерімізге бірнеше ай бойы жалақы төлей алмай отыр­мыз. Өйткені, тұр­ғын­дар төлемақыны дер кезінде өтемей жатыр. Біз бірнеше рет аталмыш үйдің тұрғындарын бас қосуға шақырдық, бірақ әрдайым белгіленген уақытта жиналысқа кел­мейді. Ал кондоминиум мәселесіне келетін болсақ, бұл процесс заң шеңберінде шешілді. Енді жанармай жағдайын айқындайық, тұрғындар айтып тұрған 10 пайыздық қосым амор­тизациялық шығынға жатады. Яғни, дербес жылу беру орталығын қажетті қосалқы бөлшектермен қамтамасыз ету және үш оператордың еңбекақысы. Бар болғаны осы. Заң бо­йынша, біз амортиза­ция­лық шығынды 25 пайызға дейін белгілеуімізге болады. Бірақ біз тұрғындардың қиын жағдайын ескеріп, жәрдем көрсетудеміз, – деп түсіндірді Гүлмира Рамазанова.

Бірнеше айға созылған нәти­жесіз келіссөздер жақын арада шешілуге тиіс. Себебі, «Тұрмыс» мекемесі мен тұр­ғындар Астана қаласы әкімінің орынбасары Қосман Айтмұ­хаметовтің қабылдауына жазылды. Біз де даудың нүктесі сол кезде қойылатынына сенім білдіреміз.

Гүлдана ТАЛҒАТҚЫЗЫ

2 комментария

  1. Опять представители Турмыс врут, когда это было, они назначают собрание и жильцы не ходят????? Всегда инициаторами собраний являются, как раз-то жильцы, а вот руководство Турмыс через раз присутствуют на этих собраниях!!!!! Почему, они не сказали, о двух инжнерах /мертвые души/????? Бессовестно и нагло врут!!!! Пусть уходят, достали уже

  2. Какие пожертвования!!!! Что за бред несут снова, три оператора которых несуществует… снова жильцы виноваты… почему с этим ТОО ТУРМЫС никто не может решить вопрос…. я не понимаю одного они не прикасаемые что ли????? В нашем доме одни молодые семьи живут, у всех маленькие дети… в холоде сидят ДЕТИ!!!! Их дети также сидят ли в холоде??? Когда же наша городская власть решит вопрос????

Оставить комментарий

Ваш email не будет опубликован.Необходимы поля отмечены *

*