«استانا اقشامى»
ەل جۇرەگى – ەلوردا شەجىرەسى

تۇنگى سوتتىڭ تيىمدىلىگى

0 134

بيىل ماۋسىمنىڭ 5-ىنەن بەرى استانانىڭ مامانداندىرىلعان اكىمشىلىك سوتىنىڭ سۋدياسى ۇلدانا سۇلەيمەنوۆا جول-كولىك وقيعالارىنا قاتىستى ىستەردى جۇمىس ۋاقىتىنان تىس كەزدە قاراي باستادى.

بۇل ءۇردىس باس قالاعا جوعارعى سوت توراعاسىنىڭ وسى جىلدىڭ اقپان ايىندا سينگاپۋر مەملەكەتىنە بارىپ كەلگەن ساپارىنان كەيىن ەنگىزىلگەن ەدى. وسى «تۇنگى سوت» اتاۋىنا يە بول­عان سوت ۇدەرىسى كەيىنگى كەزدە كەشكى 18.30-دان 22.00-گە دەيىن جۇرگىزىلىپ ءجۇر. تاياۋدا سوت قاراۋىنا 18 ءىس ءتۇستى. ولاردىڭ بارلىعى دا اكىمشىلىك قۇقىق بۇزۋشىلىق كودەكسىنىڭ 610-بابى بويىنشا، اتاپ ايتقاندا، جۇرگىزۋشىلەردىڭ جول ەرەجەلەرىن ساقتاماي، جول-كولىك وقيعاسى كەزىندە ادام دەنساۋلىعىنا زالال كەلتىرۋى، كولىك قۇرالدارىنىڭ نەمەسە باسقا دا دۇنيە­لەردىڭ بۇلىنۋىنە قاتىستى بولدى.
كەلىپ تۇسكەن ءىستىڭ جۇمىس ۋاقىتىنان تىس سوت ۇدەرىسىندە قارالۋى ءۇشىن بىرنەشە شارتتار ساقتالۋى كەرەك. ماسەلەن، ءبىرىنشى تالاپ – جۇرگىزۋشىنىڭ ءوز كىناسىن تولىق مويىنداۋى، كەلتىرىلگەن شىعىندى وتەۋ­گە پەيىلدى بولۋى، داۋ-داماي تۋعىزباي، ءىستىڭ جۇمىس ۋاقىتىنان تىس كەزدە قارالۋىنا كەلىسۋى. ايتالىق، سۋديا ۇلدانا سۇلەيمەنوۆا جول-كولىك وقيعاسىنا بايلانىستى كىنالى نيكولاي گۋبسكي مەن جابىرلەنۋشى ۆيكتور تيتورينكونىڭ ءىسىن قاراپ، كىناسىن تولىق مو­يىنداۋىنا بايلانىستى ن.گۋبسكيدىڭ ايىپپۇلىن 48100 تەڭگەدەن 33670 تەڭگەگە تومەندەتتى. تاعى ءبىر ايتا كەتەرلىگى، بۇرىن مۇنداي سوت ۇدەرىستەرىن ادامدار ەكى-ءۇش اي كۇتەتىن بولسا، قازىر ەكى تاراپتىڭ ءىس ماتەريالىن جۇمىستان تىس ۋاقىتتا قاراپ، ون كۇننىڭ ىشىندە شەشىم شىعارىلىپ وتىر. بۇل ۋاقىت ۇنەمدەۋگە ءتيىمدى ەكەندىگى ءسوزسىز.
– بۇل قاناتقاقتى جوبا قازاقستان رەسپۋبليكاسى جوعارعى سوتى توراعاسىنىڭ وكىمىمەن ازىرگە استانا، الماتى، وسكەمەن جانە اقتوبە قالالارىنىڭ سوتتارىنا ەنگىزىلىپ وتىر. تۇنگى سوت ازىرگە جول-كولىك وقيعالارىنا قاتىستى ىستەردى عانا قارايدى. وعان قوسىمشا قارجى دا قاراستىرىلماعان، تەك ىشكى سوتتار قورى ەسەبىنەن جۇزەگە اسىرىلىپ كەلەدى. جوبا مەرزىمى وسى جىلدىڭ 31 جەلتوقسانىندا اياقتالادى، – دەيدى جوبا جەتەكشىسى مادەنيەت وماربەكوۆا.

پىكىر جازۋ

پوچتاڭىز جاريالانبايدى