«استانا اقشامى»
ەل جۇرەگى – ەلوردا شەجىرەسى

تۇلەكتەر شەبەرلەردەن ءتالىم الدى

0 33

نۇر-سۇلتان قالاسىندا «نۇر-سۇلتان – جارقىن بولاشاق مەكەنى» اتتى تەحنيكالىق جانە كاسىپتىك ءبىلىم بەرۋ ۇيىمدارىنىڭ شەبەرلىك ساباقتارى ءوتتى.

قالالىق ءبىلىم باسقارماسى ۇيىم­داستىرعان بۇل شاراعا ەلورداداعى 35 وقۋ ورنىنىڭ تۇلەكتەرى قاتىستى. ولارعا كاسىپتىك باعدار بەرۋ، جۇمىسشى جانە تەحنيكالىق ماماندىقتاردىڭ مارتەبەسىن كوتەرۋ ماقساتىندا وتكەن شارا كوللەدج ستۋدەنتتەرىنىڭ قىزمەت كورسەتۋ، ءبىلىم بەرۋ، مەديتسينا، اقپاراتتىق تەحنولوگيا، كولىك، بايلانىس، قۇرىلىس جانە كوممۋنالدىق شارۋاشىلىق ماماندىقتارى بويىنشا قالا تۇرعىندارى مەن تۇلەكتەرگە تەگىن قىزمەت كورسەتۋ، ماماندىق تاڭداۋ بويىنشا كەڭەس بەرۋ تۇرىندە ءوتتى.
– بۇل شارادا قالالىق كوللەدج ستۋدەنتتەرى ۇيرەنگەن بىلىمدەرىن پايدالانا وتىرىپ، ءوز ونەرلەرىن كورسەتەدى. بەس جىلدان بەرى وتكىزىلىپ كەلە جاتقان شارا ستۋدەنتتەردىڭ جۇمىسقا ورنالاسۋىنا وڭ سەرپىن بەرىپ قانا قويماي، ءوز تۇلەكتەرىمىز جاساعان ونىمدەردىڭ ەل ءىشى نارىعىنا وتۋىنە دە وتە ءتيىمدى، – دەدى قالالىق ءبىلىم باسقارماسى باسشىسىنىڭ ورىنباسارى دۋلات جاكەنۇلى.
ديزاين، العاشقى مەديتسينالىق كومەك كورسەتۋ، روبوتوتەحنيكا ءىسى بويىنشا كورسەتىلگەن شەبەرلىك ساباقتارى شاراعا قاتىسۋشىلار اراسىندا ۇلكەن قىزىعۋشىلىق تۋدىردى. «شەبەرلىك ساباقتارى بولادى دەگەن سوڭ، بالالار نە ۇيرەنىپ جاتىر ەكەن دەپ ادەيى كەلدىم. سەبەبى مەنىڭ دە ءوسىپ كەلە جاتقان بالالارىم بار. بولاشاقتا ولارعا قانداي ماماندىق وقىتۋ كەرەك دەگەن دە وتباسىمىزدىڭ وزەكتى ماسەلەسى. جاستاردىڭ ونەرلەرىن كورىپ قۋانىپ قالدىم. اسىرەسە، روبوت جاساعان بالالاردىڭ قابىلەتىنە ءتانتى بولدىم» دەيدى شاراعا قاتىسقان قالا تۇرعىنى مايرا التىنبەكوۆا.

پىكىر جازۋ

پوچتاڭىز جاريالانبايدى