«استانا اقشامى»
ەل جۇرەگى – ەلوردا شەجىرەسى

شەتكى ايماقتار شەتتەمەسىن

0 50

استانا قالاسى ءماسليحاتى مەن تۇراقتى كوميسسياسى «نۇر وتان» پارتيا­سى دەپۋتاتتىق فراكتسياسىنىڭ وتىرىسى ءوتتى. كۇن تارتىبىندە 2019-2021 جىلدارعا ارنالعان قالا بيۋدجەتىنىڭ جوباسى قارالدى.

جيىندا العاشقى بولىپ ءسوز العان ستراتەگيالىق جانە بيۋدجەتتى جوسپارلاۋ باسقارماسىنىڭ باسشىسى راسۋل ورازعۇلوۆ قالا بيۋدجەتىندەگى 3 جىلدىق كىرىس-شىعىس پەن قانشا قارجىنىڭ قايدا جۇمسالاتىنى تۋرالى باياندادى.
– بولجامعا سايكەس، 3 جىلعى، ياعني 2019-2021 جىلدارداعى كىرىس مولشەرى 858 ميلليارد تەڭگەنى قۇراپ وتىر. سونىڭ ىشىندە سالىق ءتۇسىمى – 841 ميلليارد، سالىقتان تىس كىرىس – 3,8 ميلليارد تەڭگە، نەگىزگى كاپيتال ساتىلىمىنان
12,2 ميلليارد تەڭگە بولادى دەپ جوسپارلانۋدا. 2019 جىلعى كىرىس مولشەرى
272,5 ميلليارد تەڭگە بولسا، ونىڭ سالىقتان تىس كىرىسى – 1,2 ميلليارد، نەگىزگى كاپيتال ساتىلىمىنان 7,1 ميلليارد تەڭگە بولادى. ياعني كىرىس مولشەرىنىڭ 97 پايىزى سالىق تۇسىمىنەن بولادى دەپ كۇتىلۋدە. ال 3 جىلدىڭ شىعىن مولشەرى – 1 تريلليون 114 ميلليارد تەڭگە. سونىڭ ىشىندە 2019 جىلعى شىعىن مولشەرى بيىلعى بەكىتىلگەن بيۋدجەتتىك جوسپارعا سايكەس، 9 پايىزدىق وسىممەن ەسەپتەگەندە 422 ميلليارد تەڭگەنى قۇرايدى، – دەيدى باسقارما باسشىسى.
ونىڭ ايتۋىنشا، اۋدان اكىمدىكتەرىنە بيۋدجەتتەن 30 ملرد تەڭگەدەن اسا قارجى بولىنەدى. مىسالى، الماتى اۋدانىنا
8 ملرد 670 ملن تەڭگە بولىنسە (4,9 ملرد تەڭگەسى تازالىققا، 2,7 ملرد تەڭگەسى اباتتاندىرۋعا), بايقوڭىر اۋدانىنا 4 ملرد 315,6 ملن تەڭگە، (2,4 ملرد تەڭگە تازالىققا، 1,3 ملرد تەڭگە اباتتاندىرۋعا), سارىارقا اۋدانىنا 6 ملرد
613,1 ملن تەڭگە (3,8 ملرد – تازالىققا، 2,1 ملرد تەڭگە – اباتتاندىرۋ), ەسىل اۋدانىنا 11 ملرد 677,5 ملن تەڭگە (6,4 ملرد – تازالىققا، اباتتاندىرۋ – 4,4 ملرد تەڭگە) اۋدارىلادى. ال 37 ملرد 222,2 ملن تەڭگە قالانىڭ جىلۋ ەنەرگەتيكالىق كەشەن جۇيەسىن دامىتۋ جۇمىستارىنا بولىنبەك.
ءوز كەزەگىندە ءسوز العان دەپۋتات زەينوللا شىبكەنوۆ باسقارما باسشىسىنان بايقوڭىر اۋدانىنا قارجىنىڭ نەگە از بولىنگەنىن سۇرادى.
– جاڭا اۋدان ءۇشىن بۇل قارجى تىم از. ويتكەنى باسقالارىنا قاراعاندا ەڭ ارتتا قالعان اۋدان وسى. ونداعى «ءوندىرىس»، «كيرپيچنىي» سياقتى قالا سىرتىنداعى تۇرعىن الاپتاردىڭ ماسەلەسى شاش ەتەكتەن. جارىق تارتىلماعان، جولدارى جوندەلمەگەن كوشەلەر كوپ وندا. كەرىسىنشە، وسى اۋدانعا كوبىرەك قارجى ءبولىنۋى كەرەك ەدى، – دەدى ول.
بۇل سۇراققا جاۋاپ بەرگەن باسقارما باسشىسى بيۋدجەت قارجىسى نورماتيۆكە سايكەس، اۋدانداردىڭ ورنالاسۋ تىعىزدىعىنا قاراي قاراستىرىلعانىن اتاپ ءوتتى. ال جارىق تارتۋ ماسەلەسى مەملەكەتتىك-جەكەمەنشىك ارىپتەستىك باعدارلاماسى بويىنشا ينۆەستورلار ەسەبىنەن جۇرگىزىلەتىنىن جەتكىزدى. الايدا جاۋاپ­قا قاناعاتتانباعان دەپۋتاتتار نورماتيۆتەردى قايتا قاراستىرۋ كەرەكتىگىن ايتتى.

پىكىر جازۋ

پوچتاڭىز جاريالانبايدى