«استانا اقشامى»
ەل جۇرەگى – ەلوردا شەجىرەسى

شاكىرتتەرىنىڭ الدىنا شەراعاڭدى نەگە شىعارماسقا؟

0 72

استانا قالاسىنىڭ مادەنيەت جانە سپورت باسقارماسى بيىلعى «شابىت» شىعارماشىل جاستاردىڭ ءححى فەستيۆالى باعدارلاماسىنا التى جىلدىق ۇزىلىستەن سوڭ قوسىلىپ جاتقان «جۋرناليستيكا» اتالىمىندا شەرحان مۇرتازا اتىنداعى اتاۋلى سىيلىق تاپسىرىلاتىنى تۋرالى جاڭالىقتى تاراتتى.

بۇل وتە قۇپتارلىق شەشىم بولدى. شەرحان مۇرتازا قا­زاقتىڭ بەلدى-بەلدى باسى­لىم­دارىنىڭ باسشىسى جانە تەلەراديوكومپانيا توراعاسى رەتىندە دە، قالام قارىمى جاعىنان دا ۇلتتىق جۋرناليس­تيكا ءورىسىنىڭ كەڭەيۋىنە ولشەۋ­سىز ۇلەس قوستى. از سوزگە كوپ ماعىنا سىيدىرا ءبىلىپ، ءتىلىپ تۇسەر تىركەستەرى حالىق جادىنا جازىلىپ، وسى كۇندەرى قاناتتى سوزگە اينالدى.
كەيىننەن كورنەكتى قالامگەرلەر رەتىندە تانىلعان تالاي شاكىرت تاربيەلەپ، «شەرحاننىڭ شەكپەنى» ۇعىمى پايدا بولعانىنان دا ەل حاباردار. بەلگىلى ءبىر بايقاۋدىڭ ىشىندە ونىڭ اتىنداعى سىيلىق تاعا­يىندالعانى، ءتىپتى ازدىق ەتەدى دەپ ايتار ەدىك. جۋرناليستەر اراسىندا شەرحان مۇرتازا اتىنداعى رەسپۋبليكالىق بايقاۋ ۇيىمداستىرىلىپ، تۇراقتى تۇردە ءوتىپ تۇرسا، ءبىر عانيبەت بولار ەدى دەپ ويلايمىز.
بىلتىر كوزى تىرىسىندە 85 جىلدىق مەرەيتويىنا وراي تاراز قالاسىندا «زاماننىڭ زاڭعار تۇلعاسى» اتتى رەسپۋب­ليكالىق ءمۇشايرا ءوتتى. وسى ويىمىز سول ۋاقىتتا كەلگەن. شىندىعىنا كەلگەندە پروزالىق بايقاۋ بولماسا، پوەزيالىق جارىستىڭ شەراعاڭا قانداي قاتىسى بار دەپ ويلانعانىمىز دا راس. بىزدە ورالحان بوكەي اتىنداعى كوركەمسوز وقۋ شەبەرلەرىنىڭ رەسپۋبليكالىق، اقسەلەۋ سەيدىمبەك اتىنداعى جاس اقىندار، جازۋشىلار، كوسەمسوز شەبەرلەرىنىڭ قاراعاندى وبلىستىق بايقاۋلارى بار. ال وسى ەكەۋى دە شەرحان مۇرتازانىڭ شاكىرتتەرى ەكەنى انىق. شاكىرتتەرىنىڭ الدىنا شەراعاڭدى نەگە شىعارماسقا؟ شىندىقتىڭ شىراقشىسى بولا بىلگەن شەرحان مۇرتازا اتىندا جۋرناليستەر اراسىندا بايقاۋ ۇيىمداستىرىلىپ وتىرسا، قازاق جۋرناليستيكاسىنىڭ دا ساپاسى كوتەرىلەر ەدى بالكىم. جۋرناليس­تەر اراسىندا جىل سا­يىن ءوتىپ تۇراتىن بايقاۋ شەراعاڭ اتىن تۋ ەتىپ ءوتىپ تۇرسا قانداي عانيبەت؟!
ويدى وي تۇرتەدى. قازىر بىزگە پروزا مەن ادەبي سىنعا، ساتيراعا دا «قان جۇگىرتەتىن» بايقاۋلار كەرەك. ماسەلەن، ساعات اشىمباەۆ اتىنداعى سىنشىلار بايقاۋى. بۇل دا وسى سالالاردىڭ العا باسۋىنا سەپتىگىن تيگىزەتىنى بەلگىلى. شەرحان، ساعات سىندى قازاق كوركەم سوزىنە زور ۇلەس قوسقان قالامگەرلەردىڭ ۇلگىسى، «بولماساڭ دا، ۇقساپ باق» دەگەن ۇستانىم ايتار، جازار ءسوزىمىزدى تۇزەتەر ەدى.

پىكىر جازۋ

پوچتاڭىز جاريالانبايدى