«Astana aqşamı»
El jüregi – elorda şejiresi

«Sabaña tüsiretin» sawıq

Kreş-rwm trendi Astanağa da jetti

0 221

Eger äldenege zığırdanıñız qaynap, boyıñızdı depressïya dendep, äne-mine jarılwğa şaq jürseñiz, Astanada siz baratın bir jer bar. «Razlom» dep atalatın kreş-rwm – qaladağı aşwlanşaq adamdarğa arnalğan äzirge jalğız orın.

Aşwıñızdı basw 300 dollar tura ma?

Kreş-rwm termïni ağılşınnıñ «crash» (qïrat, oyranda) jäne «room» (bölme) sözderiniñ tirkeswinen twğan. Onı keybir elderde «wrecking club», «break room», «anger room», «rage room» dep te ataydı. Biraq bäriniñ de beretin mağınası bir: adamdar älgi jerge kelip, aynalasındağı zattardı qïratw arqılı agressïyasın şığaradı.
Munday sawıq türi eñ alğaş ret 2008 jılı Tokïoda payda bolıptı. Sodan keyin jer-jerde tanımal bola bastağan. Qazir AQŞ-tıñ özinde 100-den asa kreş-rwm bar eken. Kirw qunı är jaqta ärtürli. Mısalı, Merïlendtegisi 15 dollar turadı: onda sındıratın zattardı öziñiz ala barasız. Sarayıñızdağı şañ basıp turğan teledïdar, isten şıqqan prïnter, könergen ıdıs-ayaq däl osı tusta kädeñizge jaraydı. Al Los-Andjelestegi kreş-rwmğa jolıñız tüsip, 300 dollar töleseñiz, buzıp-qïratw üşin sizge mekeme tarapınan 100-ge tarta tehnïka men jïhaz beriledi.

Sport pen sayasat ta jüykeni juqartadı

Adamdardı kreş-rwmğa kelwge ïtermeleytin sebepterdiñ qatarında turmıstıq jäne qızmettegi problemalarmen birge sporttağı janküyerlik kesirinen twatın stress te bar körinedi. Atlantadağı osınday ğïmarattıñ basşısı Melanï Maklïn CNN jwrnalïsine bergen suhbatında 2017 jılı Super Bowl LI oyınınan keyin aşwğa bwlıqqan «Falcons» fanattarınıñ köptep kelgenin jazadı. «Olar Tom Bredïdiñ swreti men «Patriots» komandasınıñ logosın alıp kelip, parşa-parşasın şığardı» deydi Melanï. Sonday-aq soñğı waqıttağı sayasï mäselelerdi de jurtşılıq jüregine jaqın qabıldaytın sïyaqtı. Olay deytinimiz, 2016 jılı AQŞ-tağı prezïdent saylawı kezinde adamdar kreş-rwmğa kirwge uzın-sonar kezekke turğan. Olar ğïmarat işine qoyılğan Donal'd Tramp pen Hïlarï Klïntonnıñ manekenderin ayamay julmalap, aşwların osılayşa basqan.

Astanadağı kreş-rwmda ne bar?

Elordada kreş-rwm aşw ïdeya­sı jas käsipker Sırım Sızdıqovqa Japonïyağa saya­hatı kezinde kelipti. «Jergilikti turğındardıñ bir kïosk­ke aqşa tölep kirip, işin­degi bükil zattardı sın­dı­rıp jatqanın alğaş körgenimde, qattı tañğaldım. Söytsem, olar öz stresterin osılayşa şığaradı eken. Soñğı waqıtta ärtürli tur­mıs­tıq ne jumıstağı problemalardıñ kesirinen adamdar psïhologïyalıq turğıda qattı şarşaydı. Endeşe osınday kreş-rwm aşıp, olardıñ säl de bolsa jaman energïyadan qutılwına nege kömektespes­ke?!» deydi ol.
Bul ortalıq üş bölmeden turadı. Birinşisinde – 6000 teñgelik «light paket», ekinşisinde – 8000 teñgelik «medium paket», al üşinşi bölmede 9000 teñgelik «hard paket» tarïfteriniñ zattarı qoyılğan. Bağasına qaray sizge qïratıp-sındırwğa beriletin dünïelerdiñ de sanı öse tüsedi. Mäselen, äldenege qattı aşwlanıp, teriñizge sıymay tursañız, «hard paketti» tañdap, teledïdar, onıñ astına qoyatın şını tuğır, tärelke, bokal, banka, staqan, üstel, avtomobïl' şïnası, sporttıq grwşa sekildi dünïelerdiñ tas-talqanın şığarıp, qïratıp tastawıñızğa ruqsat. Aytpaqşı, bölmege kirer aldında sizge toqpaq, kwvalda, balğa jäne süymen sïyaqtı qarwlar usınıladı. Munımen qosa, qawipsizdik maqsatında üstiñizge aq arnawlı jumıs kïimi, qolıñızğa qolğap, köziñizge közäynek kïgizedi.
Sırımnıñ aytwınşa, kreş-rwm aşılğan eki aydan beri munda 60 şaqtı kisi kelipti. Astanalıqtardıñ jaña orınğa degen qızığwşılığınıñ birtindep artıp bara jatqanın onıñ älewmettik jelidegi akkawntına qaldırılğan pikirlerden bayqawğa boladı. Mısalı, Äsem esimdi ïnternet qoldanwşısı «Bölmede bar dawısıñmen ayqawlawğa da boladı depsizder. Olay etsek, bizdiñ dawısımızdı körşi bölmedegiler estï almay ma?» dep jazsa, Jandos attı jigit «Mereke künderi de jumıs isteysizder me?» dep suraptı. Soğan qarağanda, iştegi agressïyanı şığarwğa qulıqtı adamdardıñ şınımen az bolmağanı ma?! Al bul joldıñ olardıñ aşwın baswda kömegi qanşalıqtı küşti?

Agressïyanı agressïyamen şığarw zïyan

Esteriñizde bolsa, «Ädemi äyel» fïl'minde Edvard rölindegi Rïçard Gïrdiñ Vïvïandı oynağan Djwlïya Robertske aytatın sözi bar. «Men äkeme qatıstı aşwımdı tüsinip, onı dawıstap mo­­yındawıma bes jıl waqıt ketti» deydi sonda älgi keyipker. Keybirewler Edvard sekildi adamdardıñ ja­ñağıday kreş-rwmdarğa barwın qoldawı mümkin. Alayda psïhologïya salasınıñ mamandarı bul ädistiñ onşalıqtı jemisti emes ekenin aytadı. Çïkagodağı Anger Management Education mektebiniñ negizin salwşı, 40 jıldıq psïhologtıq täjirïbesi bar Bernard Golden:
– 1970 jıldarı Bobo qwır­şaqtarın urw nemese jastıqtı qabırğağa soqqılaw sekildi täsilder terapïya barısında keñinen qoldanıldı. Munday äreket arqılı pacïentterge aşwın sırtqa şı­­ğarwğa kömektesw közdeldi. Biraq keyinirek onıñ tïimsiz ekeni anıqtaldı. Öytkeni adam bir äreketti qaytalap istey berse, onıñ mïı sol närselerdi keleside de jasağanın qalap, nätïjesinde soğan aparatın joldardı izdewmen boladı. YAğnï adam är aşwlanğan sayın agressïya­sın jañağıday joldarmen şığaratın bolsa, sol äreketti keleside de qaytalaw üşin jïi aşwlana beredi, – deydi.
Demek, kreş-rwmdarğa barıp, bölmeniñ astan-kesteñin şığarsañız, bir sätke jeñildep qalwıñız mümkin. Esesine sizdiñ aşwlanşaqtıq ädetiñiz munımen basılmaydı, kerisinşe, üdey tüsedi. Onıñ ornına tınıştıqta jalğız oylanıp, öz emocïyañızdıñ tübine üñilip ne bolmasa medïtacïya jasağanıñız äldeqayda paydalıraq.
Sondıqtan «qïratwğa arnalğan bölmelerge» jay ğana dosıñızben birge oyın-sawıq retinde nemese jaña närseni bayqap körw üşin barsañız boladı. Al aşwıñızdı baswğa järdemdesetin basqaşa jol izdegeniñiz jön sekildi.

 

 

Pikir jazw

Poçtañız jarïyalanbaydı