-->

ҚЫТАЙ МЕН АВСТРИЯҒА ПАВИЛЬОН БЕРІЛДІ

kbb_2157-2-asli

Кеше ЭКСПО аумағында орна­ласқан Қытай және Австрия елде­рінің павильондары қатысушы делегат­тарға тапсырылды.

Былтыр 30 қазанда халық­аралық павильондардың құ­рылысы толық аяқталған болатын. Қазіргі таңда көрмеге қатысуға ниет білдірген 115 мемлекеттің 103-іне павильондары табысталды. Ал қалған 12 павильон осы айдың соңына дейін берілмек.
Қытай павильонының конс­трукциялық топ басшысы Дже Джиенің айтуынша, күншығыс елі үшін Астанада өтетін «ЭКСПО» көрмесіне қатысу аса маңызды.
– Біз 1000,27 шаршы метр ауданды құрайтын павильонды сұрап алдық. Павильонның басты тақырыбы – «Болашақ энергиясы. Жасыл жібек жолы». Демек, дәстүрлі энергия көздерін жаңғырмалы энергия көздеріне ауыстыру, қоршаған ортаны қорғау сияқты маңызды мәселелерді алға тартқымыз келеді. Көрмеге жаңа энергия саласында қыз­мет ететін қытайлық он кәсіп­кер шақырылды. Сондай-ақ, еліміздің 25 қаласындағы түрлі саладағы бизнесмендер Астанаға ат басын бұрады. Біз тауарлардан гөрі электр қуаты мен ядролық энергия саласындағы жаңа технологияларды көрсеткіміз келеді, – деді ол.
Еліміздегі Австрияның тө­тенше және өкілетті елшісі Герхард Сайллер журналис­тердің сауалына жауап бере отырып, Австрияның павильоны қандай болатынын баяндап берді. «Конструкция болаттан жасалған үш бөліктен тұратын болады. Олар павильонымыздың «With brain, heart and muscle power» (Ақылмен, жүрекпен және күш-қайратпен) атты тұжырымдамасына сәйкес келеді. Жаңа энергияның мүм­кіндіктерін тамашалай алатын арнайы орын әзірлейміз. Көрмеге келушілер үшін дем­алуға арналған лаундж бар жұмыс істеп тұрады. Сондай-ақ, Австрияға қызығушылық танытқандар барлық мәліметті дәл сол жерде ала алатын болады. Павильонның бюджеті 5 млн еуроны құрайды. Ал оның ауданы 866 шаршы метрді алып жатыр. Австрия павильоны мәдени іс-шараларға да жете көңіл бөледі» деп сөзін аяқтады елші.
Айта кетейік, павильондарды безендіру жұмыстары мамыр айының ортасына дейін аяқталуы тиіс.

Гүлдана ТАЛҒАТҚЫЗЫ

Жауап қалдыру

Сіздің email-адресіңіз жарияланбайды.Қажетті өрістер таңбаланған *

*