«استانا اقشامى»
ەل جۇرەگى – ەلوردا شەجىرەسى

قوعام تىنىشتىعىن قامتاماسىز ەتۋ – ابىرويلى مىندەت

0 42

ەل تىنىشتىعىن، ازاماتتاردىڭ قاۋىپسىزدىگىن قامتاماسىز ەتۋدە ىشكى ىستەر سالاسى قىزمەتكەرلەرىنىڭ ەڭبەگى زور ەكەنى انىق.

جاقىندا وتكەن مينيسترلەر كابينەتىنىڭ كەڭەيتىلگەن القا جينالىسىندا قازاقستان رەسپۋبليكاسىنىڭ پرەزيدەنتى ق.توقاەۆ: «پوليتسيا جۇمىسى – قوعامنىڭ ءجىتى نازارىندا. سىزدەردىڭ قىزمەتتەرىڭىز ەل ازاماتتارىنىڭ مۇددەلەرىمەن جانە قاۋىپسىزدىگىمەن تىعىز بايلانىستى. پوليتسيا اشىق بولۋى ءتيىس. ول ءۇشىن حالىقپەن تىعىز بايلانىس قاجەت. وسى ماقساتتا ەلباسى باستاعان قۇقىق قورعاۋ جۇيە­سىن جالعاستىرامىز. نەگىزگى مىندەت – قازاقستاندىقتاردىڭ قۇقىقتارىن قورعاۋدى مۇلتىكسىز قامتاماسىز ەتۋ» دەپ اتاپ وتكەن بولاتىن. وسىناۋ جاۋاپتى مىندەتتى ابىرويمەن اتقارىپ ەسەلى ەڭبەگىمەن ەرەكشەلەنىپ جۇرگەن ەلوردالىق پوليتسيا قىزمەتكەرلەرى ءتول مەرەكەلەرىن اتاپ ءوتتى. سالتاناتتى ءىس-شاراعا قالا اكىمى التاي كولگىنوۆ قاتىسىپ، پوليتسەيلەرگە جانقيارلىق قىز­مەتى ءۇشىن العىسىن ءبىلدىردى.


– بۇگىن انتىنا بەرىك، رۋحى مىقتى، قوعامدىق ءتارتىپتى ءجىتى قاداعالاپ، قالامىزدىڭ قاۋىپسىزدىگىن قامتاماسىز ەتىپ جۇرگەن پوليتسيا قىزمەتكەرلەرىنىڭ ءتول مەرەكەسى قارساڭىندا كەزدەسىپ وتىرمىز، – دەپ باستادى ءوز ءسوزىن ەلوردا باسشىسى.
«ەلوردامىزداعى پوليتسيا قىزمەتكەرلەرىنە ارتىلعان جاۋاپكەرشىلىك تە، قويىلاتىن تالاپ تا جوعارى. تۇرعىندار سانى كۇن سايىن كوبەيىپ كەلە جاتقان مەگاپوليستىڭ تىنىشتىعىن كىرپىك قاقپاي قامتاماسىز ەتىپ كەلەسىزدەر. نۇر-سۇلتان قالاسى – وتانىمىزدىڭ جۇرەگى. كەز كەلگەن ەلدىڭ باس قالاسى – بارلىق سالا بويىنشا وزگەلەرگە ۇلگى. ءبىزدىڭ جاڭا استانامىز دا از ۋاقىتتىڭ ىشىندە تۇرعىندار ءۇشىن قولايلى، جايلى جانە ينفراقۇرىلىمى دامىعان قالاعا اينالدى. قانشا جەردەن قالا ۇلكەيسە دە، ونىڭ قوعامدىق قاۋىپسىزدىگى اقساپ جاتسا، تۇرعىندار ءۇشىن قولايسىزدىقتار تۋدىراتىنى جاسىرىن ەمەس. دەمەك، پوليتسيا قىزمەتكەرلەرىنىڭ ماتەريالدىق-تەحنيكالىق جاعدايىنا مەيلىنشە ءمان بەرۋ كەرەك. بۇل رەتتە ادام فاكتورىن ءبىرىنشى كەزەككە قويىپ، پوليتسيا جۇمىسىن جەڭىلدەتۋ ءۇشىن تسيفرلاندىرۋ جۇيەسىن جەتىلدىرە ءتۇسۋ قاجەت. قالاي ايتساق تا، قوعامدىق ءتارتىپتى باقىلاۋ وڭاي جۇمىس ەمەس. سوندىقتان ەلوردانىڭ دامۋى مەن گۇلدەنۋىنە سىزدەردىڭ قوسىپ جاتقان ۇلەستەرىڭىز وراسان زور دەپ باعالايمىن» دەگەن قالا باسشىسى ا.كولگىنوۆ پوليتسيا قىز­مەتكەرلەرىن ءتول مەرەكەسىمەن قۇتتىقتاپ، جاۋاپكەرشىلىگى باسىم جۇمىستارىنا ساتتىلىك تىلەدى.
اعىمداعى جىلدا باس قالا بويىنشا قىلمىس كورسەتكىشى 21 پايىزعا ازايىپتى. جىل باسىنان بەرى استانالىق پوليتسەيلەر 2 مىڭعا جۋىق قوعامدىق-ساياسي، مادەني-سپورتتىق شارالاردىڭ قاۋىپسىزدىگىن قامتاماسىز ەتتى. زاڭ بۇزۋشىلىققا، تارتىپسىزدىككە جول بەرىلمەدى. بۇدان شىعار قورىتىندى قوعامدىق ءتارتىپتى قالىپتاستىرۋدا پوليتسەيلەردىڭ قانشاما ۇيقىسىز تۇندەردى وتكىزگەن قاجىرلى ەڭبەگى جاتقانىن اڭعارۋ قيىن ەمەس.
كەزدەسۋ بارىسىندا بىرقاتار پوليتسيا قىزمەتكەرلەرىنە ناگرادالار مەن سىيلىقتار تابىس­تالدى. سالتاناتتى شارا سوڭى مەرەكەلىك كونتسەرتكە ۇلاستى.

بەيبىت وسپان

پىكىر جازۋ

پوچتاڭىز جاريالانبايدى