«استانا اقشامى»
ەل جۇرەگى – ەلوردا شەجىرەسى

قازاق سالماعىنداعى قاقتىعىس

0 87

اقتاۋ قالاسىندا بوكستان ەرەسەكتەر اراسىنداعى قازاقستان چەمپيوناتى مارەسىنە جەتتى. بۇل ەل بىرىنشىلىگىندە قاتىسۋشىلار سانى جونىنەن رەكورد جاسالدى. چەمپيوندىق اتاق ءۇشىن 300-گە جۋىق بوكسشى شارشى الاڭعا كوتەرىلدى.


ءبىر اپتاعا جالعاسقان جارىس قورىتىندىسىندا تۇركىستان وبلىسىنىڭ قۇراماسى ءبىرىنشى ورىننان كورىندى. اتاپ ايتقاندا، بۇل ايماقتىڭ بىلعارى قولعاپ شەبەرلەرى 2 التىن، 3 كۇمىس جانە 2 قولا مەدال الدى. كوماندالىق ەكىنشى ورىنعا ماڭعىستاۋ وبلىسى (1-3-4) يە بولسا، ۇزدىك ۇشتىكتى جامبىل وبلىسى (1-2-3) بوكسشىلارى تۇيىندەدى.
بۇل جارىسقا ۇلتتىق قۇرامانىڭ بوكسشىلارى تۇگەلدەي دەرلىك قاتىس­تى. قازاقستان بوكس فەدەراتسياسىنىڭ تالابى سونداي بولدى. سوندىقتان دا بىرىنشىلىكتەگى باسەكە دە تارتىستى ءوتتى. ءدال جارىس الدىندا ۇزاق جىلدار ەل نامىسىن قورعاعان، ەكى دۇركىن وليمپيادا ويىندارىنىڭ كۇمىس جۇلدەگەرى اتانعان ادىلبەك نيازىمبەتوۆ پەن بەلگىلى بوكسشى انتون پينچۋك ۇلكەن سپورتپەن قوشتاسقانىن جاريالادى.
سونىمەن تاجىريبەلى شەبەرلەرمەن قاتار جاس دارىندىلار قولعاپ ءتۇيىس­تىرگەن بايراقتى بىرىنشىلىكتە شىن جۇيرىكتەر توپ جاردى دەۋگە نەگىز بار. بۇل رەتتە جاستار اراسىنان جۇلقىنىپ شىققان اقمولالىق ورازبەك اسىلقۇلوۆ پەن تۇركىستاندىق ساكەن بيبوسىنوۆتىڭ ونەرى جانكۇيەر قاۋىمنىڭ ەسىندە ساقتالىپ قالعانى ءسوزسىز. كوپشىلىكتىڭ كۇتكەنى 69 كەلىدەگى شىمبەرگەنوۆ پەن ءجۇسىپوۆتىڭ جەكپە-جەگى ەدى. ەكەۋى دە – ۇلتتىق قۇرامانىڭ نەگىزگى بوكسشىلارى. كۇتكەندەي اسلانبەك پەن ابىلايحان فينالدا جولىقتى. وتە تارتىستى ايقاستا قاراعاندىلىق ءجۇسىپوۆ تازا جەڭىسكە جەتتى. ول بەلگىلى قارسىلاسىن ءبىر رەت نوكداۋنعا جىبەرىپ تە ۇلگەردى. ءسويتىپ «قازاق سالماعىنداعى» قاقتىعىستا قاراعاندىلىق بوكسشىنىڭ باعى جاندى. تاعى ءبىر قوسارىمىز، وسى چەمپيوناتتا نەگىزىنەن، بۇرىننان ۇلتتىق قۇرامانىڭ ساپىندا تالاي سىنعا تۇسكەن جىگىتتەر توپ جاردى.
سونىمەن 2018 جىلعى قازاقستان چەمپيوندارى مىنا بوكسشىلار التىن جۇلدەگەر اتاندى:
49 كەلى – تەمىرتاس ءجۇسىپوۆ،
اقمولا وبلىسى
52 كەلى – ءانۋار مۇزاپاروۆ،
الماتى وبلىسى
56 كەلى – قايرات ەراليەۆ،
تۇركىستان وبلىسى
60 كەلى – زاكير سافيۋللين،
شىمكەنت قالاسى
64 كەلى – ءساناتالى تولتاەۆ،
ماڭعىستاۋ وبلىسى
69 كەلى – ابلايحان ءجۇسىپوۆ،
قاراعاندى وبلىسى
75 كەلى – ءابىلحان امانقۇل،
جامبىل وبلىسى
81 كەلى – بەك نۇرماعانبەت،
تۇركىستان وبلىسى
91 كەلى – ۆاسيلي لەۆيت،
استانا قالاسى
+91 كەلى قامشىبەك قوڭقاباەۆ،
قىزىلوردا وبلىسى

پىكىر جازۋ

پوچتاڭىز جاريالانبايدى