«استانا اقشامى»
ەل جۇرەگى – ەلوردا شەجىرەسى

قالا تازالىعى قاتاڭ باقىلاۋدا

0 80

23 ساۋىردە استانادا ەكولوگيالىق ايلىق پەن جالپىقالالىق سەنبىلىكتەر باستالادى. بۇل تۋرالى كەشە ادىلبەك جاقسىبەكوۆتىڭ توراعالىعىمەن وتكەن اپپارات وتىرىسىندا ايتىلدى.

IMG_5639

جيىن بارىسىندا ەلوردانىڭ سىرتقى كەلبەتىنە قاتىستى ماسەلەلەر كوتەرىلىپ، وسى باعىتتاعى جۇمىستار ايتۋلى داتالارعا ورايلاستىرۋمەن عانا شەكتەلمەۋى ءتيىس ەكەندىگى اتاپ ءوتىلدى. قالا باسشىسى استانادا حالىق پەن بيزنەستىڭ بەلسەندى قاتىسۋىمەن «تازا بەيسەنبى» شارالارى، ەكولوگيالىق پوليتسيامەن بىرگە رەيدتەر تۇراقتى تۇردە وتكىزىلۋى كەرەكتىگىن شەگەلەي تاپسىردى. بۇل رەتتە ءاربىر تۇرعىن، كاسىپكەر نەمەسە ۇيىم شاھاردى اباتتاندىرۋعا ءوزىنىڭ تىكەلەي قاتىستى ەكەندىگىن سەزىنۋى قاجەت.
باسقوسۋدا حالىقتى تىركەۋ جانە ەسەپكە الۋدى جەتىلدىرۋ پروبلەماسى دا تالقىلاندى. الداعى ۋاقىتتا استانادا كوشى-قون پوليتسياسىنىڭ قىزمەتىن رەتتەيتىن ارنايى ەرەجەلەر بەكىتىلۋى مۇمكىن. مۇنىمەن قوسا، تۇرعىن ۇيدە ءبىر ادامعا ەسەپتەلگەن بەلگىلى ءبىر شارشى مەتر­لەر بولعان جاعدايدا عانا ازاماتتاردى تىركەۋ، سونداي-اق، تۇرۋعا ارنالماعان ورىنجايلاردا (مىسالى، ساياجاي نەمەسە كەڭسە) تىركەۋگە تىيىم سالۋ ۇسىنىلدى.
ازاماتتاردىڭ تىركەۋسىز جانە ەسەپكە الىنباي تۇرۋى، سونىمەن قاتار، ولاردىڭ باقىلانبايتىن ىشكى كوشىپ-قونۋى بۇگىنگى كۇننىڭ ەڭ وزەكتى جاعداياتىنا اينالدى. استانادا وسى جايتقا بايلانىستى ەشقانداي شەكتەۋ شارالارىنىڭ بولماۋىنان جەكەلەگەن ءۇي يەلەرى ءبىر مەكەنجاي بويىنشا ونداعان، ءتىپتى، جۇزدەگەن ادامداردى تىركەپ قويعان. دەرەكتەرگە سۇيەنسەك، قالاداعى كەيبىر پاتەرلەردە 400-دەن استام ازامات تىركەلگەن جاعدايلار دا بولعان. بۇل رەتتە ءبىر پاتەرگە 100-200 ادام تىركەلۋ – كەڭىنەن تاراعان قۇبىلىس. كوپتەگەن پاتەر يەلەرى وسىلايشا اقشا تاۋىپ كەلەدى. الايدا ولار اكىمشىلىك ايىپپۇل تولەگەننەن كەيىن دە ادامداردى تىركەۋدى توقتاتار ەمەس.
«تۇتاستاي ءبىر كولەڭكەلى يندۋستريا جۇمىس ىستەۋدە. بۇل تارتىپسىزدىككە زاڭ جۇزىندە بەلگىلەنگەن شارالاردىڭ جوقتىعى ىقپال ەتەدى» دەدى استانا اكىمى ادىلبەك جاقسىبەكوۆ. ەلوردا باسشىسى ءتيىستى مەملەكەتتىك ورگاندارعا وسى ماسەلەمەن اينالىسۋدى جانە «استانانىڭ مارتەبەسى تۋرالى» زاڭعا تولىقتىرۋلار مەن وزگەرتۋلەر ەنگىزۋ بويىنشا ءتيىستى ۇسىنىستار ەنگىزۋدى مىندەتتەدى.

پىكىر جازۋ

پوچتاڭىز جاريالانبايدى