«استانا اقشامى»
ەل جۇرەگى – ەلوردا شەجىرەسى

پرەزيدەنت سايلاۋىنا ۇمىتكەرلەر ۇسىنىلدى

0 48

«اۋىلدىڭ» ۇمىتكەرى – تولەۋتاي راحىمبەكوۆ

«اۋىل» حالىقتىق-دەموكراتيالىق پاتريوتتىق پارتياسىنىڭ كەزەكتەن تىس XV قۇرىلتايى ءوتتى. جيىندى اشىپ، ءسوز سويلەگەن پارتيا جەتەكشىسى ءالي بەكتاەۆ بەلگىلى ينجەنەر-عالىم، قوعام قايراتكەرى تولەۋتاي راحىمبەكوۆتىڭ كانديداتۋراسىن پرەزيدەنت سايلاۋىنا ۇمىتكەر رەتىندە ۇسىندى.

«تولەۋتاي ساتايۇلى را­حىمبەكوۆ – ەلگە ەسىمى ءمالىم، اسىرەسە اۋىل حالقىنا سىيلى ازامات، ەكونوميكا عىلىمدارىنىڭ دوكتورى. ينجەنەر بولىپ ەڭبەك جولىن باستاپ، اۋىل شارۋاشىلىعى سالاسىندا ءارتۇرلى دەڭگەيدەگى قىزمەتتەردى اتقاردى. ول – اۋىل شارۋاشىلىعىن دامىتۋ باعدارلاماسىن جاساۋ­شىلاردىڭ ءبىرى. جۋىردا 55 جاسقا تولادى» دەپ تانىس­تىردى ءالي بەكتاەۆ.
قۇرىلتاي مىنبەرىنەن ءسوز سويلەگەن تولەۋتاي ساتايۇلى ءوزىنىڭ ازاماتتىق ۇستانىمىن، بۇگىنگى تاڭداعى تول­عاقتى ماسەلەلەرگە قاتىس­تى وي-پىكىرلەرىن اشىق ايتتى.
ول قازاقستان الەمدەگى دا­مى­عان 30 ەلدىڭ قاتارىنا كىرۋ ءۇشىن اۋىل شارۋا­شىلىعى مەن عىلىمىن دامىتۋعا كۇش سالۋ قاجەتتىگىن جەتكىزدى. «قازاقستان حالقىنىڭ 43 پايىزى اۋىلدا تۇرادى. قالا مەن اۋىلدىڭ دامۋىن سالىستىرۋعا بولمايدى. مەنىڭشە، اۋىل حالقىنىڭ تابىسىن ءوسىرۋىمىز كەرەك. بۇل ماسەلە ەڭ ءبىرىنشى ورىنعا شىعۋى ءتيىس. ەلىمىزدەگى 1000-نان استام اۋىل تاراتىلدى. ەندەشە اۋىلداردى دامىتاتىن جاڭا ومىرشەڭ باعدارلاما دايىندايتىن كەز كەلدى» دەدى ول. قۇرىلتايدىڭ سوڭىنان دەلەگاتتار ءبىراۋىزدان تولەۋ­تاي راحىمبەكوۆتىڭ كانديداتۋراسىن قولداپ، داۋىس بەردى.

«ۇلت تاعدىرى» قوسانوۆتى قوستى

كەشە «ۇلت تاعدىرى» قوزعالىسى پرەزيدەنت سايلاۋىنا ۇمىتكەر رەتىندە تانىمال ساياساتكەر ءامىرجان قوسانوۆتى ۇسىندى. «ءبىز بۇگىن بىرلەستىكتىڭ جيىنىن وتكىزدىك. «ۇلت تاعدىرى» قوزعالىسى سايلاۋعا قاتىسادى جانە بەلگىلى ساياساتكەر ءامىرجان قوسانوۆتى ۇمىتكەر ەتىپ ۇسىنادى» دەپ مالىمدەدى قوعامدىق بىرلەستىكتىڭ جەتەكشىسى دوس كوشىم. ال ءامىرجان قوسانوۆ الماتىدا وتكەن ءباسپاسوز ءماسليحاتىندا سايلاۋ دوداسىنا قاتىسۋعا دايىن ەكەنىن حابارلادى.

«مەن رەسمي تۇردە بۇل بىرلەستىككە مۇشە ەمەسپىن. بىراق توراعا قوعامدىق بىرلەستىك اتىنان مەنى ۇسىناتىنىن ايتتى. بۇل – ۇلكەن مارتەبە. سايلاۋعا تۇسەتىن كەز كەلگەن ادام مەملەكەتتىك ماسەلەلەردى جەتىك ءبىلۋى ءتيىس» دەدى ءامىرجان قوسانوۆ. ول سايلاۋدا جەڭىسكە جەتكەن جاعدايدا قان­داي قادامدار جاسايتىنى تۋرالى ويلارىمەن ءبولىستى. «اۋەلى كونستيتۋتسيا­لىق كەڭەس قۇرامىن. دەموكراتيا، ادىلەتتىلىك، ازاماتتاردىڭ مۇددەلەرى قورعالۋى ءتيىس. ەگەر سايلاۋعا ءبىز قاتىسپاساق، بيلىك باسقا ادامداردى تابادى. ولار دا بيلىكتى سىنايدى، بىراق ءبىز سياقتى ەمەس. ەگەر ءبىز ۇيدە وتىرساق، ءسوزىمىز ەشكىمگە ەستىلمەيدى» دەگەن ويىن ايتتى ول.

كوممۋنيستەر كانديداتىن تاڭدادى

كەشە ەلورداداعى «Park Inn» قوناقۇيىندە قازاقستان كوممۋنيستىك-حالىقتىق پارتياسىنىڭ كەزەكتەن تىس XIV قۇرىلتايى ءوتتى. حالىقشىل كوممۋنيستەر پرەزيدەنت سايلاۋىنا پارتيانىڭ اتىنان قاتىساتىن ۇمىتكەردى تاڭدادى. ول – جامبىل احمەتبەكوۆ. سونداي-اق پارتيانىڭ سايلاۋ الدىنداعى باعدارلاماسى جاريا ەتىلدى.

ورتالىق كوميتەت حاتشىسى ايقىن قوڭىروۆ: «ءبىز قو­عامداعى ەڭ كۇردەلى ماسەلەلەردى كۇن تارتىبىنە شىعارۋ ءۇشىن سايلاۋعا قاتىسامىز. ەلدەگى كەدەيلىك دەڭگەيىن قايتا ەسەپتەۋ كەرەك. ءبىلىم بەرۋ جۇيە­سىن دامىتۋدا كەڭەستىك تاجىريبەنى قولداناتىن كەز كەلدى. ءبىز ەەو مەن «ءبىر بەلدەۋ – ءبىر جول» جوباسى اياسىنداعى ينتەگراتسيانى قولدايمىز. حالىق وسى ۇستانىمى­مىزدى قۇرمەتتەيدى. بىزگە داۋىس بەرەدى دەپ ۇمىتتەنەمىز» دەپ مالىمدەدى.
ال جامبىل احمەتبەكوۆ «قوعام مۇددەسى ءۇشىن ادال ەڭبەك» دەپ اتالاتىن پارتيانىڭ سايلاۋ الدىنداعى باعدارلاماسىنىڭ جوباسىن جۇرتقا تانىس­تىردى. وسىمەن ەكىنشى مارتە سايلاۋ­عا تۇسەتىن ج.احمەتبەكوۆ 1961 جىلى اقمولا وبلىسى قورعالجىن اۋدانى جانتەكە اۋىلىندا تۋعان. تسەلينوگراد اۋىل شارۋاشىلىعى ينستيتۋتىن بىتىرگەن. ەڭبەك جولىن اۋىلدا مەحانيك بولىپ باستاپ، ءماجىلىس دەپۋتاتىنا دەيىن كوتەرىلدى. 2012 جىلدىڭ 20 قاڭتارىنان باستاپ قر پارلامەنتى ءماجىلىسىنىڭ دەپۋتاتى. ۇيلەنگەن، 4 بالاسى بار.

پىكىر جازۋ

پوچتاڭىز جاريالانبايدى