«استانا اقشامى»
ەل جۇرەگى – ەلوردا شەجىرەسى

وزىمىزگە دە بايلانىستى

نەمەسە تەلەفونمەن سويلەسىپ جۇرە بەرەتىن اۆتوبۋس شوپىرلارىن كىم تارتىپكە شاقىرادى؟

0 18

قالالىق قوعامدىق كولىكتەرىنىڭ جايى – ابدەن جاۋىر بولعان جايت. كەلىسەمىن، بىراق جولاۋشىلار قاۋىپسىزدىگى دە ماڭىزدى. سول سەبەپتى بۇل ماسەلەگە قايتا قايىرىلىپ، ەسىڭىزگە سالامىز.

قالادا ونعا تارتا جولاۋ­شىلار تاسىمالىنا تارتىلعان كومپانيالار بار. جۇرگىزۋشىلەردىڭ دە ءتۇر-ءتۇرى كەزدەسەدى. سونىڭ ىشىندە وزدەرىنە اسا «سەنىمدىلەرى» قورقىتادى. ويتكەنى وسىنداي امبەباپ جۇرگىزۋشىلەردىڭ ءبىر قولى اۆتوبۋستىڭ رولىندە بولسا، ەكىنشى قولىنان قالتا تەلەفونى تۇسپەيدى. كەيدە زەرىگىپ اڭگىمەسىنە قۇلاق تۇرەسىڭ. كۇ­يىپ جاتقان شارۋا ەمەس، بوس ءسوز. جامانى، كوپشىلىكتىڭ تاڭەرتەڭ جۇمىسقا اسىعىپ سالونعا سىيماعان ساتتەرىندە دە، كوشە كولىككە تولعان كەزدەرىندە دە ايىرماسى جوق. جۇرگىزۋشىنىڭ اۋزى بوسامايدى. تەلەفوننان اماندىق ءبىلىپ، ار جاعىندا ەكى اۋىز بوس ءسوز ءۇشىن ءوزىن دە قاتەرگە تىگىپ، كولىككە تيەلگەن حالىقتىڭ تاعدىرىمەن ويناۋعا بولا ما؟ ونى ءوزىڭىز شەشەسىز. ءبىر-ەكى ەسكەرتپەمەن جۇرگىزۋشىنى تىيا المايسىز. ءارى ەرەجە بويىنشا كولىك جۇرگىزۋشىسىن الاڭداتۋعا بولمايدى.
مۇندايدا نە ىستەۋ كەرەك؟ الدىمەن كولىك جۇرگىزۋشىسىنىڭ اتى-ءجونىن ءبىلىپ الىڭىز، سودان كەيىن اۆتوبۋستىڭ مەملەكەتتىك ءنومىرىن ءتۇرتىپ الىڭىز. جانە قاي ۋاقىتتا قانداي ايالدامادان ءمىنىپ، قايسى ايالدامادان شىققانىڭىزدى ەسكە ساقتاپ قويىڭىز. سوسىن اسىقپاي 109 ءنومىرىن تەرىپ، تەلەفون كوتەرگەن كەزەكشىلەرگە بولعان جايدى جەتكىزىڭىز. ءارى قاراي iKomek «استانا LRT» كومپانياسىمەن حابارلاسىپ، ءسىزدىڭ شاعىمىڭىزدى جەتكىزەدى. ولار ءوز كەزەگىندە ءتارتىپ بۇزعان جۇرگىزۋشىگە ەسكەرتۋ جاساپ، تيىسىنشە شەشىم شىعارادى. ەگەر تىم «سوزشەڭ» جۇرگىزۋشى بولسا، قالا تۇرعىندارىنان تۇسكەن بىرنەشە شاعىمنىڭ نەگىزىندە ونىڭ جامان ادەتتەن ايىعىپ، وڭ ناتيجە شىعارۋىنا ىقپال ەتەدى دەپ ويلايمىز. تۇرعىنداردىڭ بەلسەندىلىگى قىزمەتتىڭ ساپاسىنا دا اسەرى بارىن ۇمىتپاڭىزدار.

پىكىر جازۋ

پوچتاڭىز جاريالانبايدى