«Astana aqşamı»
El jüregi – elorda şejiresi

ÖMİRDİÑ SINAĞINAN ÄLSİZDER SÜRİNEDİ

Qazirgi jahandanw zamanında köptegen adamdar teñiz tolqındarı sïyaqtı ömir qïındıqtarına, tağdır tawqımetine boy aldırıp jatatını şındıq. Onıñ aynalasında jürekke tikenek sïyaqtı qadalatın, ne bolmasa künniñ jayma şwaq nurı ispettes jadıratatın sätteri de bolatını sözsiz.

0 18

Osı orayda bizdiñ bügingi keyipkerimiz de ömirdiñ aşı-tuşısın körgen azamat. Nur-Sultan qalası äkimdiginiñ «Ömirlik qïın jağdayda qalğan adamdardı älewmetke qosw ortalığı» kommwnaldıq memlekettik mekemesine qabıldanğan Dwlat Köpti­lewovtiñ jürekjardı äñgimesi kimge bolsa da oy salatını anıq. Alpıstı alqımdağan azamattıñ özi twralı bükpesiz äñgimesinen köñilge tüygenimiz köp boldı.
– Men Ayagöz qalasında, ülken otbasında dünïege keldim. Äkem marqum köp jıldar boyı ülken mekeme bastığınıñ orınbasarı qızmetinde, şeşem marqum qarjı salasında qızmet istep, bes balanı tärbïelep ösirdi. Balalarınıñ ülkeni men boldım, menen keyin eki inim, eki qarındasım bar. Orta mektepti bitirisimen äskerï borışımdı abıroymen atqarıp, elge oraldım. Endigi rette ömir jolın tañdawımnıñ kezegi turğan edi. Tañdawım qurılısşı mamandığı boldı. Sol ümitimdi arqalap Celïnograd qalasındağı qurılıs tehnïkwmına kelip tüstim. Onı 1977 jılı ayaqtağan soñ qurılıs salasında eñbek ete bastadım. Tañdawımdı odan äri jetildirw maqsatımen 1978 jılı Celïnograd ïnjenerlik-qurılıs ïnstïtwtınıñ azamattıq qurılıs fakwl'tetine oqwğa tüsip, onı 1984 jılı ayaqtap, ïnjener-qurılısşı mamandığına ïe boldım. Üylenip, otbasın qurıp, balalı-şağalılar qatarına qosıldıq. Sol jılı joldamamen Torğay oblısındağı «Twrgaysel'hozstroytrest» mekemesiniñ jıljımalı mehanïkalandırılğan kolonnasında master, prorab qızmetterinde jumıs istedim. Artınşa, 1986 jılı sol oblıstıñ Amantoğay awdanınıñ «Rassvet» keñşarında ağa prorab, 1992-1999 jıldarı Qostanay oblısı Nawrızım awdanı selolıq qurılıs kombïnatınıñ dïrektorı qızmetterin atqardım. 2001 jılı awdan jabılıp, trestti tarqata bastadı. Bir-birine jalğasqan sätsizdikter de sol jıldarı bastaldı. Nesine jasıramız, qazaqta «köre almawşılıq» degen qasïet bar ğoy. Onıñ jeteginde «qastandıq jasaw» degen de qalıs qalmağan şığar. Sonımen ne kerek, 2001 jılı meniñ üyim örtendi. Üyde jatqan meniñ barlıq ömirlik mañızı bar qujattarım, qızmetimniñ qarjılıq mälimetteri bar asa mañızdı qujattar janıp ketti. Sol sätterde mağan öşigip jürgenderdiñ bet perdesi aşıldı. Biraq meniñ ömirimniñ astan-kesteni şıqtı. Bir ökiniştisi, arandatwşılardıñ ıqpalına meniñ äyelimniñ de qosılıp jürgeni äli künge deyin jüregime şanşwday qadaldı.
Äyelimmen birjola ajırasıp, aqırında Aqmola qalasına kelip, ärtürli şağın jekemenşik qurılıs kompanïyalarında senimhat boyınşa jumıs istep, künköris amalımen ğana ömir sürwge dwşar boldım. Osı bir qïın kezeñde asqaq armanımnıñ orındalatınınan küder üzip, qulazığan sätterde «aşı swmen» jüregimdi jubatqan kezderim de bolğanın nesine jasıramın. Kädimgidey işimdikke salınıp, maqsatsız jüretindi şığardım. Bul meniñ älsizdigim boldı. Degenmen bäri artta qaldı. Adam balası amaldap ömir süredi ğoy. Osı waqıtqa deyin qujattarımnıñ tüpnusqaları bolmawınan, sonday-aq zeynettik demalıs şağımnıñ jaqındawına baylanıstı amalsızdan osı mekemege kelip, kömek surawğa mäjbür boldım. Abıroy bolğanda, bul şeşimim durıs bolıp şıqtı. Ortalıq basşısı Marat Köptilewov kelgen bette meniñ jağdayımdı bilgennen keyin «Ağa, wayımdamañız, barlıq qujattarıñızdı qalpına keltirip beremiz, ol – bizdiñ mindetimiz» dep, tolqığan köñilime basw ayttı. Ortalıqqa kelgeli de bir jılday bolıp qaldı. Älewmettik qızmetkerler qujattarımdı qalpına keltirdi. Osı mekemeniñ jäne onıñ barlıq qızmetkerlerine şeksiz alğısımdı bildiremin. Endi el qatarlı jumısqa kirisip, tağdırdıñ sınağınan sürinbewge bekinip otırmın. Kezinde qwğında jürgen ultımızdıñ belgili sayasï qayratkerleriniñ biri «qarnımnıñ aşqanına emes, qadirimniñ qaşqanına jılaymın» degen eken. Osınday küy meniñ de basımnan ötti dewge boladı. Bul jağday men üşin ömirdiñ sabağı boldı, biraq ol jüregimniñ tükpirinde öşpes iz qaldırdı. Meniñ ötken jolımdı keyingi jastar qaytalamasa eken dep tileymin, – dep tüyindedi öz sözin ömirdiñ kermek dämin tartqan azamat janarınan senim otı jarqıldap.

Pikir jazw

Poçtañız jarïyalanbaydı