«استانا اقشامى»
ەل جۇرەگى – ەلوردا شەجىرەسى

ءومىردىڭ سىناعىنان السىزدەر سۇرىنەدى

قازىرگى جاھاندانۋ زامانىندا كوپتەگەن ادامدار تەڭىز تولقىندارى سياقتى ءومىر قيىندىقتارىنا، تاعدىر تاۋقىمەتىنە بوي الدىرىپ جاتاتىنى شىندىق. ونىڭ اينالاسىندا جۇرەككە تىكەنەك سياقتى قادالاتىن، نە بولماسا كۇننىڭ جايما شۋاق نۇرى ىسپەتتەس جادىراتاتىن ساتتەرى دە بولاتىنى ءسوزسىز.

0 18

وسى ورايدا ءبىزدىڭ بۇگىنگى كەيىپكەرىمىز دە ءومىردىڭ اششى-تۇششىسىن كورگەن ازامات. نۇر-سۇلتان قالاسى اكىمدىگىنىڭ «ومىرلىك قيىن جاعدايدا قالعان ادامداردى الەۋمەتكە قوسۋ ورتالىعى» كوممۋنالدىق مەملەكەتتىك مەكەمەسىنە قابىلدانعان دۋلات كوپتى­لەۋوۆتىڭ جۇرەكجاردى اڭگىمەسى كىمگە بولسا دا وي سالاتىنى انىق. الپىستى القىمداعان ازاماتتىڭ ءوزى تۋرالى بۇكپەسىز اڭگىمەسىنەن كوڭىلگە تۇيگەنىمىز كوپ بولدى.
– مەن اياگوز قالاسىندا، ۇلكەن وتباسىندا دۇنيەگە كەلدىم. اكەم مارقۇم كوپ جىلدار بويى ۇلكەن مەكەمە باستىعىنىڭ ورىنباسارى قىزمەتىندە، شەشەم مارقۇم قارجى سالاسىندا قىزمەت ىستەپ، بەس بالانى تاربيەلەپ ءوسىردى. بالالارىنىڭ ۇلكەنى مەن بولدىم، مەنەن كەيىن ەكى ءىنىم، ەكى قارىنداسىم بار. ورتا مەكتەپتى بىتىرىسىمەن اسكەري بورىشىمدى ابىرويمەن اتقارىپ، ەلگە ورالدىم. ەندىگى رەتتە ءومىر جولىن تاڭداۋىمنىڭ كەزەگى تۇرعان ەدى. تاڭداۋىم قۇرىلىسشى ماماندىعى بولدى. سول ءۇمىتىمدى ارقالاپ تسەلينوگراد قالاسىنداعى قۇرىلىس تەحنيكۋمىنا كەلىپ ءتۇستىم. ونى 1977 جىلى اياقتاعان سوڭ قۇرىلىس سالاسىندا ەڭبەك ەتە باستادىم. تاڭداۋىمدى ودان ءارى جەتىلدىرۋ ماقساتىمەن 1978 جىلى تسەلينوگراد ينجەنەرلىك-قۇرىلىس ينستيتۋتىنىڭ ازاماتتىق قۇرىلىس فاكۋلتەتىنە وقۋعا ءتۇسىپ، ونى 1984 جىلى اياقتاپ، ينجەنەر-قۇرىلىسشى ماماندىعىنا يە بولدىم. ۇيلەنىپ، وتباسىن قۇرىپ، بالالى-شاعالىلار قاتارىنا قوسىلدىق. سول جىلى جولدامامەن تورعاي وبلىسىنداعى «تۋرگايسەلحوزسترويترەست» مەكەمەسىنىڭ جىلجىمالى مەحانيكالاندىرىلعان كولونناسىندا ماستەر، پروراب قىزمەتتەرىندە جۇمىس ىستەدىم. ارتىنشا، 1986 جىلى سول وبلىستىڭ امانتوعاي اۋدانىنىڭ «راسسۆەت» كەڭشارىندا اعا پروراب، 1992-1999 جىلدارى قوستاناي وبلىسى ناۋرىزىم اۋدانى سەلولىق قۇرىلىس كومبيناتىنىڭ ديرەكتورى قىزمەتتەرىن اتقاردىم. 2001 جىلى اۋدان جابىلىپ، ترەستتى تارقاتا باستادى. ءبىر-بىرىنە جالعاسقان ساتسىزدىكتەر دە سول جىلدارى باستالدى. نەسىنە جاسىرامىز، قازاقتا «كورە الماۋشىلىق» دەگەن قاسيەت بار عوي. ونىڭ جەتەگىندە «قاستاندىق جاساۋ» دەگەن دە قالىس قالماعان شىعار. سونىمەن نە كەرەك، 2001 جىلى مەنىڭ ءۇيىم ورتەندى. ۇيدە جاتقان مەنىڭ بارلىق ومىرلىك ماڭىزى بار قۇجاتتارىم، قىزمەتىمنىڭ قارجىلىق مالىمەتتەرى بار اسا ماڭىزدى قۇجاتتار جانىپ كەتتى. سول ساتتەردە ماعان وشىگىپ جۇرگەندەردىڭ بەت پەردەسى اشىلدى. بىراق مەنىڭ ءومىرىمنىڭ استان-كەستەنى شىقتى. ءبىر وكىنىشتىسى، ارانداتۋشىلاردىڭ ىقپالىنا مەنىڭ ايەلىمنىڭ دە قوسىلىپ جۇرگەنى ءالى كۇنگە دەيىن جۇرەگىمە شانشۋداي قادالدى.
ايەلىممەن ءبىرجولا اجىراسىپ، اقىرىندا اقمولا قالاسىنا كەلىپ، ءارتۇرلى شاعىن جەكەمەنشىك قۇرىلىس كومپانيالارىندا سەنىمحات بويىنشا جۇمىس ىستەپ، كۇنكورىس امالىمەن عانا ءومىر سۇرۋگە دۋشار بولدىم. وسى ءبىر قيىن كەزەڭدە اسقاق ارمانىمنىڭ ورىندالاتىنىنان كۇدەر ءۇزىپ، قۇلازىعان ساتتەردە «اششى سۋمەن» جۇرەگىمدى جۇباتقان كەزدەرىم دە بولعانىن نەسىنە جاسىرامىن. كادىمگىدەي ىشىمدىككە سالىنىپ، ماقساتسىز جۇرەتىندى شىعاردىم. بۇل مەنىڭ السىزدىگىم بولدى. دەگەنمەن ءبارى ارتتا قالدى. ادام بالاسى امالداپ ءومىر سۇرەدى عوي. وسى ۋاقىتقا دەيىن قۇجاتتارىمنىڭ تۇپنۇسقالارى بولماۋىنان، سونداي-اق زەينەتتىك دەمالىس شاعىمنىڭ جاقىنداۋىنا بايلانىستى امالسىزدان وسى مەكەمەگە كەلىپ، كومەك سۇراۋعا ءماجبۇر بولدىم. ابىروي بولعاندا، بۇل شەشىمىم دۇرىس بولىپ شىقتى. ورتالىق باسشىسى مارات كوپتىلەۋوۆ كەلگەن بەتتە مەنىڭ جاعدايىمدى بىلگەننەن كەيىن «اعا، ۋايىمداماڭىز، بارلىق قۇجاتتارىڭىزدى قالپىنا كەلتىرىپ بەرەمىز، ول – ءبىزدىڭ مىندەتىمىز» دەپ، تولقىعان كوڭىلىمە باسۋ ايتتى. ورتالىققا كەلگەلى دە ءبىر جىلداي بولىپ قالدى. الەۋمەتتىك قىزمەتكەرلەر قۇجاتتارىمدى قالپىنا كەلتىردى. وسى مەكەمەنىڭ جانە ونىڭ بارلىق قىزمەتكەرلەرىنە شەكسىز العىسىمدى بىلدىرەمىن. ەندى ەل قاتارلى جۇمىسقا كىرىسىپ، تاعدىردىڭ سىناعىنان سۇرىنبەۋگە بەكىنىپ وتىرمىن. كەزىندە قۋعىندا جۇرگەن ۇلتىمىزدىڭ بەلگىلى ساياسي قايراتكەرلەرىنىڭ ءبىرى «قارنىمنىڭ اشقانىنا ەمەس، قادىرىمنىڭ قاشقانىنا جىلايمىن» دەگەن ەكەن. وسىنداي كۇي مەنىڭ دە باسىمنان ءوتتى دەۋگە بولادى. بۇل جاعداي مەن ءۇشىن ءومىردىڭ ساباعى بولدى، بىراق ول جۇرەگىمنىڭ تۇكپىرىندە وشپەس ءىز قالدىردى. مەنىڭ وتكەن جولىمدى كەيىنگى جاستار قايتالاماسا ەكەن دەپ تىلەيمىن، – دەپ تۇيىندەدى ءوز ءسوزىن ءومىردىڭ كەرمەك ءدامىن تارتقان ازامات جانارىنان سەنىم وتى جارقىلداپ.

پىكىر جازۋ

پوچتاڭىز جاريالانبايدى