«استانا اقشامى»
ەل جۇرەگى – ەلوردا شەجىرەسى

مۇراعات شەرتەر شەجىرە-سىر كوپ

0 72

ارحيۆ تۋرالى ايتقاندا، ادامدار ونى وتكەن وقيعانىڭ شىندىعىن ناقتىلايتىن، دەرەكتىڭ شىنايىلىعىنا، دالدىگىنە كوز جەتكىزەتىن مەكەمە رەتىندە بىلەدى، سولاي قابىلدايدى. ول سولاي. بىراق ارحيۆتە جۇمىس ىستەيتىن بىزدەر ءارحيۆتىڭ ءرولىن ودان گورى كەڭىرەك، ماڭىزدىراق باعالايمىز. قۇجات بۇل اۋا سياقتى، ول باردا ءبىز ونى بايقامايمىز. ول – كەرەك ەمەس كەزدە وتكەننىڭ دەرەگىن ساقتايتىن، شاڭ باسقان قاعازدار جيىنتىعى. ال بىراق تاجىريبەدە باسقاشا، نۇر-سۇلتان قالاسىنىڭ مەملەكەتتىك ارحيۆىنە جىلىنا 9-10 مىڭ ادام اكىمشىلىك-قۇقىقتىق سيپاتتاعى سۇرانىسپەن كەلەدى.

ەلباسى «ۇلى دالانىڭ جەتى قىرى» ماقالاسىمەن ۇلت تاريحىن تانىپ-ءبىلۋدىڭ جاڭا كەزەڭىن باستاپ بەرىپ وتىر، الەمدىك وركەنيەتكە قوسقان ۇلەسىمىز بەن جاھاندىق دامۋ ۇردىسىنە تيگىزگەن زور سەپتىگىمىزدى قايتادان زەردەلەپ، دۇنيە جۇزىنە جاڭاشا دارىپتەۋگە ۇندەيدى. ماقالادا كورسەتىلگەن باسىم باعىتتاردىڭ ءبىرى – تاريحي سانامىزدى جاڭعىرتۋعا مول مۇمكىندىك بەرەتىن «ارحيۆ-2025» جەتى جىلدىق باعدارلاماسىن جۇزەگە اسىرۋ جانە مەكتەپتەر مەن بارلىق وڭىردەگى ولكەتانۋ مۋزەيلەرىنىڭ جانىنان تاريحي-ارحەولوگيالىق قوزعالىستار قۇرۋ.
وسى رەتتە جاس ۇرپاققا ءوز تاريحىنا دەگەن ماقتانىش سەزىمىن ۇيالاتىپ، وتانشىلدىق تاربيە بەرۋ، مادەني دەڭگەيىن كوتەرۋ، تۋعان جەرىنىڭ تابيعاتىن، حالقىن، شارۋاشىلىعىن، تاريحىن، مادەنيەتىن بىلۋگە دەگەن قۇشتارلىق سەزىمىن وياتۋ ماقساتىندا نۇر-سۇلتان قالاسى مەملەكەتتىك ءارحيۆىنىڭ جانىنان تاريحي-ولكەتانۋلىق ەكسپوزيتسيا اشۋ جوسپارلانىپ وتىر.
تۋعان جەردىڭ تەكتى تاريحىنان سۋسىنداپ وسكەن ۇرپاق قانا ەل قامىنا جارار ازامات بولىپ وسەتىنى بەلگىلى. ماقساتىمىز – حالقىمىزدىڭ مىڭداعان جىلدار بەلەسىندە جيناقتاعان تاريحي جەتىستىكتەرى مەن مادەني بايلىعىن تاۋەلسىزدىگىمىزدىڭ رۋحاني ازىعىنا اينالدىرۋ، وقۋشىلاردىڭ الەۋمەتتىك بەلسەندىلىگىن ارتتىرۋ، ولاردىڭ شىعارماشىلىق ىنتاسى مەن ارەكەتىن بابالار ءداستۇرىن جالعاس­تىرۋعا باعىتتاۋ، قوعامنىڭ قىزىعۋشىلىعىن ارتتىرۋ.
«حالىق پەن ارحيۆ – سينونيمدەس ۇعىم، ءارحيۆى بولماي، شەجىرەسى بولماي، ۇلت – ۇلت بولمايدى. ار­حيۆ قورلارىن بايىتۋ كەرەك. ەل­دىڭ ەل ەكەندىگىن، تامىرىمىز­دىڭ تەرەڭ جايىلۋىن ويلاساق، ارحيۆتەردى ناسيحاتتاپ، ارحيۆ قىزمەتكەرى بولىپ جۇرەيىك» دەپ ەدى زەينوللا قابدولوۆ اعامىز ارحيۆيستەرمەن ءبىر كەزدەسۋىندە.
حالىققا ءوز تاريحىن كورسەتەتىن ۋاقىت كەلدى. ۇلكەن تاريحي-ولكەتانۋلىق كورمە ۇيىم­داس­تىرۋ باعىتىندا جۇرگىزىلە باستاعان جۇمىسقا بارلىعىڭىز اتسالىسادى دەپ ويلايمىن.
قولدارىڭىزداعى قۇجاتتاردى، دەرەكتەردى لاقتىرىپ تاس­تاۋعا اسىقپاڭىزدار نەمەسە تەك وزىمدىكى دەپ قوينىڭىزعا تىقپاڭىزدار، ارحيۆكە وتكىزىڭىزدەر.
استانانىڭ تاريحي كورمەسىن بىرگە جاسايىق. نۇر-سۇلتان قالاسىنىڭ تاريحى – بۇل ءتا­ۋەلسىزدىك تاريحى، بۇل – مەملەكەتتىڭ تاريحى، بۇل – ۇلتتىڭ تا­ريحى.

عازيزا يساحان،
نۇر-سۇلتان قالالىق
­مەملەكەتتىك ءارحيۆى

عىلىمي-زەرتتەۋ
ءبولىمىنىڭ باسشىسى

پىكىر جازۋ

پوچتاڭىز جاريالانبايدى