«استانا اقشامى»
ەل جۇرەگى – ەلوردا شەجىرەسى

ماسەلەلەر رەت-رەتىمەن شەشىلەدى

0 48

بايقوڭىر اۋدانىنىڭ اكىمى ەرلان قاناليموۆ №5 مەكتەپ-گيمنازيادا تۇرعىندارمەن كەزدەسۋ وتكىزىپ، 2018 جىلعى اتقارىلعان جۇمىستار جانە اعىمداعى جىلى جوسپارلانعان ءىس-شارالار جونىندە ەسەپ بەردى. اكىمنىڭ ايتۋىنشا، وتكەن جىلعى حالىقپەن كەزدەسۋدە كوتەرىلگەن 35 ۇسىنىستىڭ باسىم بولىگى ساتىمەن شەشىلگەن.

«ساقالدى» قۇرىلىستار سالىنىپ بىتەدى

بايقوڭىر اۋدانىنىڭ اۋماعىندا 2018 جىلى 18 پروبلەمالىق نىسان انىقتالعان، سونىڭ ىشىندە 6 نىسان قالانىڭ ورتالىق بولىگىندە ورنالاسقان. قالالىق ورتا ساپاسى جانە باقىلاۋ باسقارماسى 4 نىسانعا قاتىستى تەكسەرۋ جۇمىستارىن جۇرگىزگەن. جانىبەك تارحان جانە ە.برۋسيلوۆسكي كوشەلەرىنىڭ قيىلىسىنداعى ازەربايجان مادەني ورتالىعىنىڭ اكىمشىلىك عيماراتىنىڭ قۇرىلىسى جالعاسىپ جاتىر. ءبىر نىسان كەپىلدىك بەرۋشىگە ءوتۋ كەزەڭىندە، ال تاعى ءبىر نىسانعا باسقا مەردىگەر ىزدەستىرىلۋدە.

جەدەل تولەم نۇكتەلەرى اشىلادى

تۇرعىنداردى كوپ تولعاندىراتىن ماسەلەنىڭ ءبىرى – قوعامدىق كولىك. اۋداننىڭ اۋماعىمەن 48 اۆتوبۋس باعدارى وتەدى. سونىڭ ىشىندە 43-ءى – قالالىق، 3-ەۋى – ەكسپرەسس باعدار، 2-ەۋى – قالا ماڭىنداعى باعدار. اۋدان اكىمى بارلىعى 189 ايالدامانىڭ 49-ىندا پاۆيلون جوقتىعىن اشىق ايتتى. ەسكى ايالدامالار جولاۋشىلاردى سۋىقتان، جاۋىن-شاشىننان قورعامايدى. سول سەبەپتەن اكىمدىك پاۆيلوندار ورناتاتىن الاڭقايلاردى جاڭارتۋدىڭ ءىس-شارالار جوسپارىن جاساعان. سونداي-اق ەسكى نۇسقاداعى 13 ايالداماعا جاڭا پاۆيلون سالىنادى. «سىزدەردىڭ وتىنىشتەرىڭىز بويىنشا، كولىك كارتالارىن تولتىرۋ ماسەلەسىن شەشۋگە تىرىسىپ جاتىرمىز. قازىرگى تاڭدا «استانا LRT» جشس «PolyArt» جشس-مەن بىرلەسە وتىرىپ، كارتا تولتىرۋعا ارنالعان موبيلدىك قوسىمشانى ازىرلەۋدە. سونىمەن قاتار «AstraPlat» جەدەل تولەم نۇكتەلەرىن بازارلار مەن ساۋدا ۇيلەرىندە اشۋ ماسەلەسى قاراس­تىرىلۋدا» دەدى ەرلان قاناليموۆ.

جاتاقحانالارعا قاتىستى جەكە باعدارلاما

ءبىر بايقاعانىمىز، بيىلعى حالىقپەن كەزدەسۋدە جاتاقحانا تۇرعىندارىنىڭ تاراپىنان ساۋال­دار كوپ بولدى. رەسمي ەسەپ بويىنشا، بايقوڭىر اۋدانىندا 20 شاعىن وتباسىلىق جاتاقحانا بار. ولاردا 5816 ادام تۇرادى، جالپى اۋدانى 69 مىڭ شارشى مەتردەن اسادى. تاڭ قالارلىعى، ولاردىڭ ءبارى 1990 جىلداردا جەكەشەلەندىرىلىپ كەتكەن. سول سەبەپتەن ەكەۋىندە عانا قىزمەت كورسەتۋشى مەكەمە بار. اۋدان اكىمى قاراۋسىز قالعان جاتاقحانالاردىڭ ءتۇيت­كىلدى ماسەلەلەرىنىڭ كوپتىگىن جاسىرعان جوق. جارىعى مەن جىلۋى جوق، قاتتى تۇرمىس­تىق قالدىقتاردىڭ ءۇيىندىسى كوپ، ينجەنەرلىك جەلىلەر مەن كونسترۋكتسيالاردىڭ توزىعىنىڭ جەتكەنى جانە ت.ب. تۋراسىن ايتساق، تۇرعىندار ءوز تۇراعىن جوندەي المايدى.
جاتاقحانالارعا جۇرگىزىلگەن حالىق ساناعى مەن تەكسەرۋلەر قورىتىندىسىندا انىقتالعانىنداي، عيماراتتاردىڭ توزۋى 50 پايىزدى قۇراسا، ولاردىڭ تۇرعىندارىنىڭ 80 پايىزى بولمەلەردى جالعا العاندار ەكەن. قالا باسشىلىعى بۇل ماسەلەنى ەلەۋسىز قالدىرعان جوق. قازىرگى كەزدە ەلوردا اكىمدىگى اتالعان جاتاقحانالاردىڭ وتكىر ماسەلەسىن شەشۋگە ارنالعان جەكە باعدارلاما جوباسىن دايىنداۋعا كىرىسكەن. 20 جاتاقحانانىڭ ەكەۋى­نىڭ تۇرعىندارى «نۇرلى جەر» باعدارلاماسى بويىنشا 2018-2022 جىلدارعا ارنالعان قاناتقاقتى جوبانىڭ ەكىنشى كەزەڭى اياسىندا يانۋشكەۆيچ كوشەسىندەگى 12 (2020 جىلى) جانە 12/1 (2021 جىلى) ۇيلەرگە كوشىرىلەتىنى ءمالىم بولدى.

پىكىر جازۋ

پوچتاڭىز جاريالانبايدى