«استانا اقشامى»
ەل جۇرەگى – ەلوردا شەجىرەسى

لاتىنشا جازۋدىڭ ەملە ەرەجەسى ماقۇلداندى

0 164

لاتىن الىپبيىنە كوشۋ ەلىمىزدەگى تاريحي وقيعالاردىڭ ءبىرى سانالادى. وتكەن جىلدىڭ سوڭىندا ۇلتتىق كوميسسيا لاتىن گرافيكاسىنا نەگىزدەلگەن قازاق جازۋىنىڭ ەملە ەرەجەسىن ماقۇلدادى. ەندى، مىنە، جاڭا ەملە ەرەجەسى جارىققا شىعىپ، جۇرتشىلىققا تانىستىرىلىپ وتىر.


ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ جەتەكشى عىلىمي قىزمەتكەرى، ۇلتتىق كوميسسيا جانىنان قۇرىلعان ورفوگرافيالىق توپتىڭ مۇشەسى گۇلفار مامىربەكتىڭ ايتۋىنشا، كەز كەلگەن تىلدە ەملە ەرەجەلەرى كوپشىلىككە بىردەي ورتاق بولۋى شارت. ەگەر ەملەدە بىرىزدىلىك ساقتالماسا، قيىندىق پەن الا-قۇلالىق ورىن الاتىنى ءمالىم. بۇل جاڭا ەملەگە دەيىن دە جازبا ءتىلىمىزدىڭ نورمالانعان جۇيەسى، جازىلىمداعى تۇراقتانعان وزىندىك قاعيدالارى بولدى. سوندىقتان جاڭا ەملەنىڭ باسىم بولىگىندە ءداستۇرلى جازۋ نورماسى ساقتالدى.
– جاڭا ەملەنى قۇراستىرۋ بارىسىنداعى اۋقىمدى جۇمىس­تاردى جۇزەگە اسىرىپ، ەملەنىڭ تولىققاندى دايىن بولىپ شىعۋىنا قر مادەنيەت جانە سپورت مينيسترلىگى ءتىل ساياساتى كوميتەتىنە قاراستى «ءتىل-قازىنا» ۇلتتىق عىلىمي-پراكتيكالىق ورتالىعى مۇرىندىق بولدى. ال ەملە ەرەجەلەرىن ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ عالىمدارى قۇراستىرىپ شىقتى. بۇل ەملە جاريالانعانعا دەيىن بىرنەشە تالقىلاۋدان، ساراپتاۋدان، سۇرىپتاۋدان جانە سىنامادان ءوتىپ، حالىققا ۇسىنىلىپ وتىر. جاڭا ءالىپبي ۇلتتىق ءتىلدىڭ ەرەكشەلىكتەرى مەن زاڭدىلىقتارىن ساقتاۋعا ۇلكەن جول اشقانى انىق. ارينە، ءالىپبي اۋىستىرعاندا جازۋعا رەفورما جاسالادى، سوندىقتان دا ەملەدەگى وزگەرىس­تەر قالىڭ جۇرتشىلىققا بىردەي ۇناۋى دا، ۇناماۋى دا، ءتۇرلى سىن، پىكىرلەردىڭ ورىن الۋى دا مۇمكىن. جەتپىس جىل بويى، اسىرەسە شەتتىلدىك سوزدەردى ورىس ورفوگرافياسىمەن تاڭبالاپ، ورىس ورفوەپياسىمەن ايتىپ ۇيرەنىپ قالعان حالىق ءۇشىن ولاردى «سىندىرۋدىڭ» ەملەدەگى ۇلگىلەرى ورەسكەل بولىپ قابىلدانۋى دا – زاڭدىلىق. جالپى الەمدىك تاجىريبە بويىنشا ەملە ەرەجەلەرىن حالىقپەن ساناسپاي-اق، ارنايى قۇرىلعان توپ مۇشەلەرى مەن ءتىل ماماندارى دايىندايدى دا، زاڭ تۇرىندە قولدانىسقا ەندىرەدى. حالىق سوعان باعىنادى. ال بىزدەگى ارتىقشىلىق، ەملە ەرەجەسى قوعامدىق تالقىلاۋدان، ساراپشىلار سۇرىپتاۋىنان ءوتىپ بارىپ ماقۇلدانىپ وتىر. ەڭ باس­تىسى، ەگەمەن ەلدىڭ تاۋەلسىز جازۋىنا جاسالعان العاشقى قادام قۇتتى بولسىن!، – دەدى ءتىلشى-عالىم.

پىكىر جازۋ

پوچتاڭىز جاريالانبايدى